Unsay gidalian sa Senate Impeachment Court?
Makapatingala ug wa ko kasabot kun nganong magdali ang Senate Impeachment Court nga mopagawas na og desisyon karong adlawa o ba kaha ugma Martes batok kang Chief Justice Renato Corona.
Nagdali sila pag-abswelto ni Corona?
Niining ilang pinaspasay, unsa may oras sa impeachment court paglili sa peso ug dollar accounts ni Corona human mipirma na kini og unconditional waiver?
Gituyo ni aron moresulta sa pagkapalpak hangtud maoy sukaranan sa kagubot?
Sayang kaayo nga di ma-establisar og tarong kun unsay tinuod sa gipang-deposito nga kwarta ni Corona.
Sa pagdiskuti og tarong, masubay man gyud kun unsay tinuod. Insakto ba si Corona nga ang iyang dollar account mobalor lang og $2.4 million sukwahi sa expose ni Ombudsman Conchita Carpio -Morales nga giingong miabot ug $12 million?
Usa sa mga butang nga tan-awon mao ang iyang mga bank transactions pagsubay kun wa bay mga kinalit-kalit nga mga lakang si Corona pagbalhin sa iyang mga kwarta sa laing mga accounts.
Sutaon sab kun duna bay mga misteryoso nga dagkung kantidad nga nabutang sa iyang mga accounts niadtong hinapos nga bahin sa termino ni kanhi presidente Arroyo kay dunay gipakatap nga mga text messages nga si Renato usa sa mga gipasahan og korona sa katigayunan nga kinawat gikan sa kaban sa gobyerno.
* * *
Pagkanindot sa gitug-an ni Department of Education in Centreal Visayas Acting Regional Director Carmelita Dulangon ug iyang mga kaubang mga opisyales nga mga schools division superintendents nga mimando sila sa ilang mga magtutudlo nga kinahanglang mapahiyumon samtang motimbaya ug mohangop sa mga estudyante sa dayong sugod sa klase sunod Lunes, Hunyo 4.
Atol sa among programang “Dialogue On The Air” niadtong Sabado nga gitambungan sa tibuuk puwersa sa DepEd-7, gipahibawo ni Dulangon nga may rason gyud nga mo-smile ang atong mga magtutudlo kay effective karong Hunyo modawat na sila og dagkung increase sa suhulan.
Sa data nga akong nahuptan, ang teacher I nga maoy pinaka-ubos og ranggo mokita na siya og sobra P20 mil dala sa basic ug allowances.
Maglaum ko nga suklian nila kini og maayong serbisyo aron makabaton ang mga tinun-an ug de-kalidad nga edukasyon.
Ilang gipasigarbo nga andam na ang tanan sa opening sa klase ug ilang gipasalig nga way bata nga balibaran sa pag-enroll.
* * *
Seryoso gyud diay si Gov. Gwendolyn Garcia nga molansar pagka-senador karong sunod tuig nga eleksyon human nanumpa siya isip bag-ong sakop sa grupo ni Vice President Jejomar Binay sa Partido Demokratikong Pilipino-Lakas Ng Bayan (PDP-Laban).
Alang nako mas maayong dayunon ni Governor Garcia kining iyang ambisyon aron dunay dugang pwersa ug tingog ang mga Bisaya didto sa Senado kana kun hatagan siya ug mandato sa kinabag-an.
Sakto sab ning iyang diskarte nga misakay sa lig-ong partido nga kaalyado sila Binay ug kanhi presidente Joseph Estrada aron may kahigayunan.
Bisan tingali si kanhi presidente Gloria Macapagal -Arroyo posibleng makaitsa sa iyang suporta ngadto ni Gwen ngan nga suod sab kaayo sila.
Sama sa akong giingon, dili maglisud si Governor Gwen nga mangonbinse sa Kabisay-an ug Mindanao kay ngan nga siya Bisaya sigurado gyud nga siya suportahan.
In fairness ni Gwen, qualified kaayo siya sa Senado ikomparar sa ubang mga senador nga naglingkod karon.
* * *
Si Ma’am Baby Omega Flores trabahante sa korte ug iyang mga kauban nga choir sa Cebu Metropolitan Cathedral ang nangreklamo intawon kagahapon batok sa management sa Blue Reef Resort diha sa Marigondon dakbayan sa Lapu-lapu.
Inay maglipay-lipay sila didto apan bangungot hinuon ang ilang nahi-aguman.
Matud nila nga sobra ka estrikto ang tagdumala kay gi-confiscate ang ilang kutsilyo nga ihiwa sa inasal ug poso.
Gi-esplikahan sila nga maoy polisiya ug giingnan sila nga dunay chopping area ang maong resort.
Wa silay nahimo mao nga gitunol nalang ang dala nilang kutsilyo.
Dihang ilang gisubay ang chopping area, medyo nanimaho ug ilang nakita nga hugaw kay duol ra sa comfort room ug dunay mga basura.
Inconvenient sab kaayo alang kanila ang pag-chop kay way lamesa unya usa ra ka lababo ang atua didto.
Mao nga buot unta silang mobalhin og laing kaligo-anan apan di mosugot ang management nga ilang bawion ang ilang gibayad.
Mao nga ila nalang giantos didto nga dalang pagmahay.
Misamot ang ilang kapungot ug nagkurog sa kabalaka dihang dunay nag-away unya ilang nakita nga dunay ubang mga lamesa nga nakapalusot og kutsilyo.
Matud pa nila nga dugay kaayong naabot ang gwardya sa Blue Reef Resort aron pagpakgang sa mga nag-away nga nakapalisang kaayo nila.
Mao gyud ni ang nakadaut niining mga beach resort nga dunay mga palisiya nga tinunto kaayo.
Niadtong nangaligo sab mi sa Rendezvous Beach Resort dili mi pakantahon sa among dala nga videoke apan wa namo panumbalinga kay tinunto gyud kaayo kay ilang gipasudlan og lain-laing pundok sa mga tawo nga mangayog kuwarta nga nagdala og gitara unya yabag kaayong manganta. Hehehe.
