“Biktima sa anomaliya ang mga palayason?”

Init kaayo ang diskusyon niadtong Sabado  sa  hapon sa among programa’ng “Dialogue On The Air” nga nagmanukad  among sibya didto sa Elementary School sa Barrio Luz kay nag-abot  ang mga residente nga demolisonon ug ang mga opisyales sa Homeowners Association  nga mi-insister na sa pagpaguba sa 32 ka mga panimay sa mas  labing dali nga panahon.

Alang  kang Diosdada Martinez nga mas nailhang “Daday” kinsa maoy tigpamaba sa mga Homeowners  Association ug presidente sa Sitio Mabuhay  nga di na  kinahanglang langayon pa ang pagpatuman sa writ  of demolition  ni Judge Ramon Daomilas.

Matud ni Martinez nga di gyud sila mosogot nga paliton sa Cebu City Government  ang  lugar  sa 32  ka mga okopante nga ipa-agi  ug expropriation proceedings kay ila na’ng gi-award sa ilang mga sakop sa pamilya .

Gani iya pang  gisaway sila si City Mayor Michael Rama, Atty. Collin Rosell  Division Head sa Division for the Welfare of the Urban Poor (DWUP) ug ubang mga opisyales sa Siudad  kay  matud  pa gisakyan ug  pamulitika ang isyu.

Akong  nasabtan gikan kang  Martinez nga nangatandog na ang ilang  mga garbo kay sukad  pa kaniadtu  gihinganlan na sila ug dili maayong mga sakop sa katilingban unya wa gyud  magpasakop sa ilang asosasyon ug  nagmakuli pagbayad sa lote nga ilang  gipuy-an ang pang-demolison bisan ilang  gipangtanyagan kaniadtu.

Apan ang mga apektadong residente  nga akong  gi-imbitar sa programa, nanghinaut nga dili  gyud sila  papahawa-on sa lugar  kay sila  maoy “actual occupants” ubos sa Provincial Ordinance No. 93-1.

Nagduda sila nga dunay tinunto kay bisag mipadayag  sila kaniadtu ug  interest nga maoy mopalit apan dili dawaton ang ilang  mga bayad sa asosasyon.

Sila si Generosa Corbeta ug mga kaubanan nga gub-onon miklaro nga di tinuud  ang gipasi-atab ni Daday Martinez nga mihingan sila sa naulahi ug mga  kaubanan  sa asosasyon nga mga “sungayan”, “kawatan” “mangingilad, ug “burukinto”.

Ang gitumbok ni Daday Martinez nga  maoy nagsigeg  panaway kanila mao  ang usa  ka Vangie Abejo nga way labot sa grupo kay anaa  nagpuyo  sa  Ermita.

Apan  akong tinubdan miingon nga bisag  magluhod-luhod pa’g  pasaylo  ang mga apektadong residente sa asosasyon   dili na gyud  matuis ang desisyon sa  pagpahawa kay  ang lote  nga  gi-okopahan  karon sa mga demolisonon atua  na gi-award sa mga sapi-an.

Kun tinuud man kini mora’g  nasayop ang gobyerno pagdeklarar ug socialized  housing site sa  maong lugar kay nakasulod man ang mga kuwartahan. Inay ang mga  magpuyo  pulos gyud unta  mga kabus.

Bisan si Martinez  gikuwestiyon  kini karon kay empleyada siya sa City Hall ubos sa DWUP apan nahimong usa sa mga  beneficiary.

Daghan ang  nagduda  nga iyang gigamit iyang gahom  isip kawani sa DWUP aron  makasulod  diha sa Barangay Luz.

Si court sheriff Joseph Olmedo nga maoy  mopatuman sa demolition nga mitambong usab sa programa mipasabot  nga iyang tumanon ang mandu ni Judge Daomilas nga konsultahon  ang tanang nalambigit  sa problema sa dili pa  hingpit  ipatuman ang writ of demolition.

Si Atty. Rossel miingon nga ang unang  relocation site nga gitagana sa may Budlaan di gyud maayo  kay risgo human nasulod sa 30 meters radius sa dakung bultahi nga koryente sa  linya.

Samtang ang relocation site sa Laguerta Lahug di pa gyud  haom  nga puy-an kay wa pay koryente, tubig ug kalsada.

Mipadayag intawon  ang mga apektado nga di sila sayon-sayonon sa pagpabalhin kay tawo  sab sila.

Si Carlo Duga-duga tigpamaba sa City Hall  miingon nga ang pagtagad  ni Mayor Rama sa mga apektado dili gyud pamulitika kun dili social obligation kini sa  mayor nga motagad usab sa mga biktima.

Matud niya nga kun namulitika pa ang  mayor dili kini modapig sa 32 ka mga apektado kun dili adto kini molaban sa 300 ka mga lehitimong miembro  sa  asosasyon nga maoy mopapahawa sa mga  makalolooy.

* * *

Alegre gyud  kun  modayon si Annabelle Rama paglansar sa pagka-kongresista  sa North District dinhi sa dakbayan sa  Sugbu kontra  ni kongresista Cutie Del Mar  o ba kaha  sa amahan nga si kanhi  kongresista  Raul Del Mar.

Naka-ingon ko nga alegre kini kay nahibawo na gyud kita sa kalibre  ni Annabelle  kun motabe atubangan sa  kamera way brake-brake ug way kambiyo-kambiyo. Hehehe.

In fairness ngadto ni Annabelle  makamao tingali siya sa trabaho sa kongreso.

Hinoon matud niya  nga andam kaayo siya’ng moserbisyo ug magkat-on. Nakat-on gani si Manny Pacquaio, Annabelle nabay  dili .

Pagkatinuud gituyo  ni City Mayor Rama  nga si Annabelle maoy  palansaron kay magamit  kaayo  ni Annabelle iyang mga anak sa showbiz  sa ilang pulitikanhong ambisyon.

Apil  na kini sa strategy  sa  pulititka.

* * *

Congratulations ni Cebu Assistant City Prosecutor Alexander Acosta kinsa  natudlo karong bag-o isip  presiding judge sa RTC Branch 9.

Siya  maoy  mopadayon  sa pagresolbar  niining nag-ong-ong  nga demolisyon sa gatusan ka mga  panimay  diha sa Sitio San Miguel Barangay  Apas.

Apil sa dagkung kaso nga iyang tiwason mao ang kontrobersiyal nga  buruka  tali sa kagamhanan sa dakbayan sa Sugbo ug  ingon man sa  kabanay’ng  Rallos.