In fairness kang kanhi Government Service Insurance System president and general manager Winston Garcia, kwalipikado kaayo siya sa pagka-kongresista ug bisan sa pagka-senador.
Nasayod ko sa kalibre ni Winston niadtong sakop pa siya sa Cebu Provincial Board panahon ni former governor Vicente “Tingting” Dela Serna.
Si Winston maoy “fiscalizer” ug maoy labing isog ug supakero sa Hunta Probinsyal.
Giratsada niya ug expose kaniadto ang mga kuwestiyonableng transaksyon.
Maglaum ko nga kun makalingkod siya sa Kongreso, ang Winston Garcia nga akong nailhan nga usa ka “crusader” sa kaayohan maoy mopatigbabaw.
Pero unsa ka tinuod nga nahingangha na lang si kanhi senador Sonny Osmeña sa balita bahin sa plano ni Winston nga modagan pagka-kongresista sa 3rd district kay ang plano ni Sonny siya maoy molansar nga way kontra human sa sabot-sabot ni PJ Garcia?
Si Sonny unang namahayag nga pabor siya kang Kongresista Pablo John Garcia nga molansar pagkagobernador human giingong huyang ang liderato ni Hilario “Jun-jun” Davide III pagka-chairman sa Liberal Party dinhi sa Sugbo.
* * *
Nagkatawa na lang ko sa balita kagahapon nga nipasaka og kasong kalapasan sa child abuse law sa Cebu City Prosecutor’s Office ang mga kadagkuan sa Saint Theresa’s College batok sa mga ginikanan/guardian niadtong upat ka mga bata nga wa nila papasoha sa graduation tungod sa law-ay nilang picture nga gipublikar sa Facebook account.
Ang gibasihan nila sa kiha mao ang giingong kapakyas sa mga ginikanan/guardian pag-disiplina sa mga bata nga maoy hinungdan nga nabutang sa huna-huna sa mga hingtungdang mga estudyante nga insakto ang ilang gihimo sa pagpa-picture nga nag-bikini, paggunit og beer ug pagpanigarilyo.
Hinuon katungod kini sa taga-STC.
Pero kadtong gihimo sa taga-STC nga wa papasoha sa graduation ang lima ka mga minor de edad ug wa pasudla bisan sa gate, dili ba dakung kalapasan sa child abuse?
Panahon na nga tinud-on sa ubang mga ginikanan ang pagpa-contempt sa taga-STC niadtong ilang wa pagtuman sa kamandoan ni Regional Trial Court Judge Wilfredo Navarro nga papasohon ang mga tinun-an kay na-establisar na karon nga may jurisdiction ang maong huwes human miklaro ang ikaduhang huwes sa Family Court nga si Judge Manuel Patalinghug nga kining maong kaso mahug ra sa regular court ug dili sa family court.
* * *
Salamat nga nakauli na sa iyang pamilya kadtong bata nga 12 anyos nga akong gipublikar sa akong lindog dinhi sa CDN niadtong Lunes nga taga-Kinatarcan, Santa Fe nga wa pasakya sa eroplano diha sa Mactan nga gidala unta sa dili niya paryente paingon sa Palawan.
Sigun sa kabanay ni Romeo Montolo nga ang 12 anyos nga unang na-missing gikan sa Mactan gipahatud na lang sa taxi paingon sa North Terminal ug dayon gipasakay sa bus ug didto gipasugat sa ginikanan sa Daanbantayan.
Natinga lang sab ko kun nganong gitugtan sa taga airport nga makabiya ang bata sa ilang kustodiya kun estrikto sila diha sa pagtubos sa mga minor de edad nga ikauban sa mga pasahero nga dili paryente.
Asa man diay ning Task Force on Human Trafficking nga giumol diha sa airport ug sa ubang mga dapit? Nagtugtog sa pansitan? O nag-ayo lang sa sinugdanan? O papogi points lang?
In fairness hinuon ni Regional State Prosecutor Fernando Gubalane mipahibawo kagahapon kanako nga way insidente nga nahitabo bahin sa 12 anyos nga wa pasakya ug eroplano segun sa pagsubay ni piskal Liceria Rabillas.
* * *
Nagpadayon karon ang second batch nga summer training sa duwang basketball sa Sunsport Basketball Training Camp uban nilang coach Jojo Romarate diha sa Sacred Heart Sports Club.
Alang kini sa mga batang gagmay ug mga batan-on.
Matud ni coach Jojo nga hangtud karong petsa 25 sa Mayo ang training ug gibahin kini sa duha ka schedule tungod kay daghan na sila ug mga estudyante.
Gani nagplano pa siya nga dunay extension nga training diha sa dakbayan sa Mandaue tungod kay dunay taga-Mandaue nga misalmot sa ilang training camp dinhi sa dakbayan sa Sugbo.
Sama lagi sa akong giingon kaniadto nga mas bintaha gyud ang bata nga mag-agi og ingon ani nga training kay sa magsigeg duwa sa computer ug sa ubang electronic device ning panahon sa summer nga makadaot sa panglawas.