Labella maoy epektibong negosyador sa Apas

Dili angayng padak-on pa ni Kongresista Tomas Osmeña ang isyu nga kauban sa law firm sila si Cebu City Councilor Edgardo Labella ug manlalaban Roberto Palmares kinsa maoy abogado ni Mariano Godinez, tag-iya sa lote  diha sa sitio San Miguel,  barangay Apas nga giokupahan sa gatusan ka mga pamilya nga sagad mga sundalo kinsa panggub-on na.

Ang importante nga dunay konsehal Labella nga maoy pambato sa Cebu city government nga maoy makahangyo ngadto ni Palmares nga i-angan-angan lang una ang pagpangguba og lugwayan na sab aron paglikay  sa kagubot.

Akong nakita nga nasuya ug sensitibo lang si Kongresista  Osmeña sa isyu hangtud nga namasangil nga nagdrama lang sila si Palmares ug konsehal  Labella tungod kay di na nila kaalyado sa Bando Osmeña-Pundok Kauswagan (BO-PK).

Ang giapas man gud karon ni Osmeña mao ang kredito ug kinsay “hero” nga makasalbar sa mga nagpuyo sa luna ni Mr. Godinez.

Niadtong Biyernes  mihatag na og “go signal” si  Judge Soliver Peras  kang court sheriff El Cid Caballes nga moguba na gyud human nga iyang gipa-recall ang order pagpa-hold in abeyance sa implementation sa writ of demolition kay wa siyay gahum pagpugong sa kamanduan sa  Court of Appeals ug nakita sa  huwes nga taas na kaayo ang lugway ug dili rason nga  mapugngan ang demolition sa R.A. 7279.

Si Caballes miingon nga aron way daghang trampas  magpadala gyud siya og notice ngadto sa mga nagpuyo sa dili pa mangguba sa hingpit.

Pero bisan pa man nga dili dawaton nila ni Benjamin Militar abogado sa mga residente ang offer sa compromise agreement nga  mohatag og katapusang unom ka buwan nga lugway sa pagpuyo sa mga residente mas maayong ihatag  nila ni Palmares ug Godinez pagpakita nga sila sinsero gyud.

Anaa ang akong simpatiya sa mga apektadong residente ug maglaum ko nga mohatag og lugway ang tag-iya  ug kun mahimo motabang siya sa  gobyerno pagpahiluna sa mga nagpuyo.

* * *

Akong na-interview personal ang kontrobersyal nga kanhi Mayor sa Lezo Aklan nga si  Alfredo Arsenio niadtong Biyernes sa buntag didto sa Regional Trial Court branch 16 agig paghatag kaniya og higayon  sa mga nanggawas nga mga istorya nga gihatagan siya og “special treatment” ni Cebu Provincial Detention and Rehabilitation Center suspended jail warden Napoleon Miranda.

Mipasabot ang kanhi  mayor nga resulta lang gyud sa  kaluoy ngadto kaniya ang tanang mga pabor nga nahatag nila ni warden Miranda ug di gyud matawag nga “special treatment.”

Matud sa mayor nga dili siya impluwensyado. Dili siya  kwartahan ug wa siyay kwartang  gihatag ngadto sa mga mo-escort kaniya ug ngadto kang warden Miranda.

Dakug pagtuo si kanhi mayor Arsenio nga biktima lang siya sa “cross fire” o bingkil  tali sa warden ug sa iyang  ubang mga gwardya.

Parte sa isyu kun duna ba siyay koneksyon sa mga kadagkuan sa Kapitolyo iyang  giklaro nga wa gyud. Wa siyay political connection sa mga  Garcia ug wa siyay mga kaila o higala nga mga Sugbuanong  politiko ngan nga stranger siya  dinhi sa Sugbo.

Hinuon nakasabot siya ni Gov. Gwendolyn Garcia sa tinguha nga ibalhin siya kay bisan siya kun maoy natungnan mao say iyang himuon.

Nagtinguha ang kanhi mayor nga magpabilin lang siya sa CPDRC kay iyang nakita nga  mas safe ug secure siya ug gawas pa ganahan kaayo sa  rehabilitation program sa gobernadora. Apan dawaton niya kun unsa may mando ni RTC Judge Sylva Paderanga nga maoy nagdungog sa iyang kaso.

Nangayo siya og dispensa sa gobernadora nga  naduhig sa isyu ug iyang  gipaabot ang mensahe nga ipadayon niini ang maayong  pagdumala sa prisohan.

Bahin sa kasong  pagpatay sa among kauban nga magsisibya sa Bombo Radyo nga si Heherson Hinolan daan na niya  kining gihimakak.

Iyang gipasabot nga mahigalaon siya sa mga sakop sa media. Ug matud niya nakasabot siya sa sentimiento sa mga sakop sa media sa pagtratar sa iyang kaso.

* * *

Gawas sa Saint Theresa’s College (STC) ug sa South Western University (SWU) nga wa mopapaso sa ilang mga estudyante, nakontrobersyal sab karon ang Talisay City College.

Ang STC administration mibarug sa polisiya nga magdisiplina sa mga estudyante batok sa giingong mga law-ay nga hulagway nga gipublikar sa Facebook.

Samtang ang SWU gireklamo kay nagbuot-buot    pag-apil sa pre-board exam isip curriculum diin giingong nangahagbong ang mga estudyante.

Samtang sa Talisay City College dunay lima ka mga estudyante sa kursong Industrial Technology ang namiligro kay dili na tugtan nga maka-enroll sa third year tungod sa kasong vandalism.

* * *

Si anhing Antonio Fabian Santos ra gyud maoy nasayod  kun kinsay  mga tawong interesado sa iyang kinabuhi sa wa pa siya patya.

Sigurado ko nga dili gun-for-hire ang responsable sa pagpatay kaniya ngan nga iyang gipasakay sa sakyanan ug didto nahitabo ang pagpamusil  sulod mismo sa iyang sakyanan sa barangay Kalunasan.

Daku kog pagtuo nga kauban ra sa sindikato ang responsable.

Bisan ang uban niyang mga classmates nakadungog na og mga negatibong reports bahin sa biktima nga anak sa tag-iya sa sikat nga Villa Teresita Resort sa Biasong, Talisay.

Unsa ka tinuod nga nalambigit ang bikitma sa drug operations, video karera ug illegal nga suwertres ug masiao?