Mga tanghaga sa kaso ni SPO2 Dacillo

Medyo dunay mga gumunhap diha sa Cebu City Prosecutor’s Office sa pagtratar ug pagresolbar sa kasong  pagpamusil patay ni SPO2 Crecente Dacillo ngadto sa iyang silingan nga si Primo Gallego Jr. kinsa giingong naselosan sa akusadong pulis niadtong Marso 19 sa dayong kilumkilom diha sa sitio Laguna, barangay Bulacao ning dakbayan.

Ang makaluluoy nga inahan sa  biktima nga si Angelina ug ang mga  kabanay miprotesta kaniadto sa gipasakang kaso sa Homicide Section kay  igo rang gikasohan ang pulis sa kasong  homicide ug dili murder.

Nagtinguha sila nga kasong murder ang ipasaka tungod kay ang ilang mga testigo miingon nga wa gyuy armas ang iyang anak atol sa pagkahitabo ug bunga lang gyud sa selos ang tanan kay naglain ang huna-huna sa pulis sukad ang biktima adto na magpalitan sa ilang tindahan diin ang asawa maoy tigbantay.

Ang nakapait wa molampos sa ilang tinguha  nga kasong murder ang ipasaka  sa korte batok kang SPO2 Dacillo  tungod kay niadtong Martes Santo gisekreto pagduso ang kasong homicide ngadto sa husgado ug girekomendar nga makapiyansa ang pulis ug P40,000.

Akong nasabtan nga  medyo kwestiyonable kaayo ug gidispuga ang pagresolbar sa kaso kay way resolusyon ug way finding of facts and conclusion nga unta ang pulis gipaubos sa 15 days preliminary investigation human kini  mi-waiver.

Natinga sab ko kun unsang  pagkaunsaa nga ang kaso gikan kang  piskal Mario Ley Gidayawan nga maoy  inquest  fiscal nabalhin ug kalit kang  piskal Gandhi Truya.

Unya ang nagpirma sa information  mao  si Asst. City Prosecutor Maria Luisa Ratilla inay trabaho  ni  Cebu  City Prosecutor Nicolas Sellon ang pag-review og tarong sa  kaso.

Laing butang nga akong natingad-an kay dihang akong gisugyot ni Sir Dijan kinsa  maoy  tig-file sa mga kaso ngadto sa  korte nga ipatan-aw ug balik si City Prosecutor Sellon ang naandam nga information apan wa matuman.

Bisan misaad siya nga iyang ipaabot ni Sellon  nianang pagkabuntag sa Martes Santo apan natinga  na lang  ko pagkahapon kay gidayon pag-file ang  kasong homicide batok sa  pulis.

Gipasabot ni Sir Dijan nga siya  mismo natinga kay dihang milakaw lang siya og kadyot  nawala an  record ug  iya  na lang nahibaw-an nga napasaka na sa korte.

Kinsa may nagdala diay sa record? Ang hudiyo nga naabot  pagpangita ni Kristo sa piskaliya?

Mao ni ang nakapait sa mga pobre kay di gyud hatagan og patas nga away sa bisan asang aspeto.

* * *

Pakaulaw  ra  man tawon ni sila  Compostela Mayor Joel Quiño, Vice Mayor  Nanette Danggoy ug mga kaubanan sa konseho nga nagpalabang ug appropriation ordinance nga mibalor ug P6.9 million aron mabayran sila og makadawat sa ilang back wages nga maoy mag-representar sa ilang sweldo niadtong wa sila makaasumer sa katungdanan.

Simple ra gyud kaayo ang logic ning maong controversy. Unsaon gud tawon pagdawat og suweldo sa kawani o opisyal sa mapribado o magobyerno nga buhatan nga wa pa gani makasugod og trabaho?

Wa  sila  mangayabag?  Nganong wa man sila mangayo og opinion sa Commission On Audit, Department  of Finance, Department of Budget and Management, Department of Interior and Local Government, Civil Service Commission ug sa Ombudsman?

Nabalaka na ko sa  mahitabo sa lungsod sa Compostela ubos sa kamot  nilang Mayor Quiño.

Abi ba  nako nga mga tarong  ni silang grupoha. Pagtarong mo diha uy!

* * *

Unsa  man gyud  ka  impluwensyado ug unsa  man gyud ka  kwartahan si  kanhi Lezo Aklan mayor Alfredo Arsenio kinsa giakusahan  sa  kasong pagpusil patay sa kanhi broadcaster sa Bombo Radyo Aklan nga si anhing Herson Hinolan?

Ang kaso batok sa kanhi mayor  ania dinhi sa Sugbo gihusay tungod sa  mando sa Korte Suprema human nga gipanghulga ang mga testigo ning maong  krimen.

Ngilngig ba gyud og kapit si  kanhi mayor Arsenio tungod kay bisan  ang atong mga gwardya ug acting  jail warden sa Cebu Provincial  Detention and Rehabilitation Center (CPDRC)  makahatag man kaniya ugospecial treatment?

Nahitabo na ang dayag kaayo nga special treatment dihang gitugtan sa escort ang kanhi mayor nga makakaon sa usa ka restaurant inay iderekta og padlock sa iyang selda sa CPDRC gikan sa court hearing.

Unya karong bag-o sigun sa akong nadawat nga impormasyon bisag way  dalaw nga gitugot niadtong adlawa sa Marso 24 apan gitugtan ang mga supporters ug mga kabanay sa kanhi mayor  nga makapahigayon og birthday party unya ang mga pagkaon nga gipasulod ug ubang  mga butang wa mag-agi sa  inspection.

Kinahanglang manubag gyud si warden Napoleon Miranda sa  maong  kontrobersiya kay akong nahibaw-an nga siya pa maoy nagdala sa mga package ug sud-an sa  kanhi mayor.

* * *

Abi ba nako nga nagkasabot na og tarong ang grupo nilang City Mayor  Michael Rama kun unsay i-hingan sa  ilang partido pag-alkontra ug  pagpalukapa sa grupo ni Kongresista Tomas Osmeña nga  mao ang Bando Osmeña-Pundok Kauswagan kon BO-PK.

Si Rama ug iyang majority sa grupo gusto nga mohingan og “Team Rama” apan ang lain nilang hinanib nga si kanhi kongresista Antonio Cuenco gusto nga iduso ang United Cebu Democratic Party.

Sa paghimo pa lang og pangan sa partido morag nagkalain-lain na ang direksyon.

Nganong wa man gud daan hikaya  nilang Rama ug Cuenco kining mga butanga?

Kataw-an baya mo diha nilang Osmeña ug Vice Mayor Joy Augustus Young.