‘Dili na makabasol namo si Padre Henry’
Dili gyud ko makasabot kun nganong magpaisa sa ihi ug magpataas sa garbo kining atong mga kaparian ug mga kadagkuan sa Simbahang Katoliko ngadto sa ilang mga parokyano.
Nga unta ang katayuan sa Simbahan mao ang pagsabwag sa maayong binuhatan sa Ginoo apil na ang pagpangalagad ngadto sa iyang mga gingsakpan ug pagpaambit sa insaktong gugma.
Naunsa nman kining mga butanga nga gihinay-hinay na man og guba sa ubang mga alagad sa Simbahan?
Sama karon sa laing kontrobersiya diha sa Holy Cross Parish sa barangay Basak Pardo.
Wa gyud ko makasabot ni Padre Henry Visitacion kinsa maoy kasamtangang parish priest kay wa na siya motuman sa gikasabutan kaniadto sa nag-donate sa lote nga maghatag gyud ang simbahan ug road right of way.
Kun ako pay Cebu Archbishop Jose Palma, di na kinahanglan nga ako pang paabton sa husgado kining maong kontrobersiya.
Siya mismo dili buta ug dili bungol sa mga dokumento ug istorya gikan sa mga tag-iya sa lote nga maghatag gyud ang simbahan ug insaktong agianan.
Niadtong Sabado diin didto kami nagpahigayon sa among programa’ng “Dialogue On The Air” sa dySS Super Radyo, klaro gyud kaayo nga gipalapdan ni Padre Henry ang koral sa simbahan nga maoy hinungdan nga nasakripisyo ug nahiubos intawon ang mga nagpuyo nga mga parokyano.
Alang nako, importante gyud kaayo nga mabalik ang kalsada aron sab intawon nga maagian sa bombero kun dunay sunog ug maagian sa atong police patrol ingkaso kun dunay krimen nga mahitabo sa maong lugar.
Salikwaot kaayong paminawon nga ang pari maoy masentro sa reklamo sa iyang mga parishioners kay sama sa akong gibalik-balik, sila maoy front liners sa pagpaambit sa tinuod nga gugma.
Pwerteng paita gyud kay atol sa programa dunay mga parokyano nga mipadayag bahin sa kangil-ad sa batasan ni Padre Henry sama sa wa pagbunyag sa mga bata tungod kay na-late og abot ang mga ginikanan.
Gireklamo usab ang pari sa dili paghilog sa mga tiguwang nga masakiton kun way prior appointment. Gipasanginlan ang pari nga gi-commercial ang panerbisyo kay kun mga kabus ang mangayo sa serbisyo, kuli kaayong molihok ang pari.
Gireklamo usab si Padre nga dunay gika-iring-iring sa usa sa mga sakop niya.
Dili na makabasol namo si Padre Visitacion kay bisag gitawgan ug gipadalhan gyud og formal communications apan nagmakuli gyud sa pag-atubang sa mga alegasyon.
Si Msgr. Esteban Binghay, episcopal vicar sa Simbahan, nagpahibawo sa unahan nga di gyud motunga si Padre Henry kay on leave duha ka simana ug di mosugot nga ang venue sa programa adto mismo manukad sa tiilan sa simbahan.
Mao nga kami maoy nag-initiate nga ang venue didto ra kilid sa simbahan, sa residensya sa magtiayong Adora ug Michael Casey nga gidaug-daug ni Padre Henry.
Among mga kauban sa Balitang Bisdak nga sila si Monching Auxtero ug Aron Blanco nga misuway sa pagkuha sa habig sa pari apan gipangasab-an sila sa madre.
Mao na ba kini ang batasan sa atong mga kadagkuan sa Simbahan?
Ambot kun tinuod ba gyud nga hulipan na si Padre Henry human ng milapas na siya og upat ka tuig diha sa Holy Cross Parish.
Ang akong kasaligang tinubdan nagkanayon nga si Msgr. Renren Beltran maoy mopuli. Apan wa pa ma-implementar ni Archbishop Palma kay na-busy sa canonization ni Blessed Pedro Calungsod.
Manghinaut ko nga makabaton na og kalinaw ang mga parokyano ubos sa pagdumala ni Monsignor Beltran.
* * *
Pwerte gyud intawong pangugat nila ni Asst. Regional Director Carmelita Dulangon ug mga kaubanang opisyal sa Department of Education in Central Visayas (DepEd-7) sa paghatag og katin-awan bahin sa isyu nga nangolekta silag dagkung kantidad alang unta sa surprise farewell kon tribute party alang kang Director Ricaredo Borgonia kinsa moretiro na karong Marso 15.
Sila si ARD Dulangon ug mga kaubanan sa DepEd-7 nga gilangkuban nila ni Dr. Mila Gabia, planning chief; Dr. Vivian Ginete, RMSPP chief ug Supt. Caridad Labe sa Naga Division mipatim-aw intawon didto sa among venue sa “Dialogue On The Air” sa Basak Pardo niadtong Sabado ug ilang gipasabot nga bakak ang ubang impormasyon nga nakuha ni Sir Bobby Nalzaro.
Ang insakto mao nga tag P2,000 ra gyud ang ilang contribution ug di tinuod nga tag P4,000 ug di tinuod nga nangayo sab sila og P1,000 sa mga principal.
Di sab tinuod ang isyu nga nagpahimo sila og picture frame kon portrait alang kang Director Borgonia nga mobalor og P60,0000 kay di makaya sa bulsa.
Matud nila ni ARD Dulangon nga initiative nila ni Cebu City Schools Division Supt. Rhea Mar Angtud ang pagpahimo ug wa gyuy labot ang mga principal.
Naglaum sila sa tighatud og istorya nga undangon na intawon ang pagpagawas sa dili tinuod nga mga pamasangil nga makadaut kanila.
Pero in fairness, kun tubagon lang gyud nila ang mga isyu way pangan nga maguba ug madaut.
Bisan asa, anaa gyud kining mga intriga.
Magpasalamat lang sab ko nila ni Director Borgonia, ARD Dulangon ug mga kaubanan nga dili mga onion-skinned sa mga isyu nga gibato.
