Technology karon
Kada tuig mopagawas ang Time Magazine og issue kabahin sa mga bag-ong invention ug produkto. Daghan ang makahimuot pero duna say uban nga magduda ka kon di ba lang kini promotion gimmick lang sa usa ka kumpaniya.
Karon mopagawas usab ang Salins Hulbot og pop technology report uban kang Nyor Daku (ND) ug Nyor Gamay (NG).
NG: Una may bag-o ron, Nyor?
ND: Bag-ong ligo?
NG: Ikaw, Nyor. Planet K mentality gyud ka. Wa gyud ka mausab. Ang buot nako ipaibot mao kon unsay mga produkto ron nga murag maibog ta ba.
ND: Sama nainang mga di nato mapalit.
NG: Mao. Pero sagdi na lang maayo na lang sad nang naa tay damguhon ba gawas sa mga babaye sa cosmetic counters.
ND: Mao diay nay bisyo ron nimo ha, gabas-gabas sa mga cosmetic area sa mga mall. Duna produkto nga coming nga murag mohaum anang imong bisyo. Ang coming nga Nokia 808. Camera phone ni, Nyor. Carl Zeiss ang lente, 41MP ang 1/1.2 nga sensor. Sa ato pa dako pa ni og sensor kay sa mga superzoom nga cameras. Unya gigamitan nila kini sa ilang kaugalingong pixel over sampling technology. Tinuod 41 MP kini, Nyor, apan ang makuha mong hulagway niani 3MP, 5MP ug 8MP lang gidak-on. Tungod kay matag 7 ka pixel nga gamiton sa pagkuhag hulagway ila kining i-sampling ngadto sa usa ka single pixel ug ang mahitabo hait ug limpyo ang kada pixel nga mahabilin.
NG: Unsa may kahulogan ani, Nyor?
ND: Una, nindut na ang kuha niani sa mga medyo ngiob nga lugar. Ikaduha, tungod sa gabaha nga gidaghanon sa mga pixel nindut na ang kuha sa digital zoom niani kay maka crop naman ang camera niani nga sa ingon 8MP lang gihapon ang resolution sa kuha. Niadto gud kon 5MP ra ka unya mo digital zoom ka, ang hulagway nga imong nakuha ma 1MP na lang usay minus pa gani niani.
NG: Unya unsa may mahimo nako niani?
ND: Mura ka nag James Bond Nyor nga magpahipi lang unya makakuha nakag video o nindut nga portrait sa mga hitsura-ang sales ladies sa mga cosmetic counters. Kay di sama sa mga optical zoom cameras nga may mobutho kon mo-isolate kag usa ka subject, kining 808 tungod kay dgital zoom ra man, dili ka masakpang may gazero-in na diay kag target.
NG: Mao ba, Nyor? Speaking of James Bond and the act of pahipi, ang Mercedes Benz padung nas pagkopya sa invisible nga sakyanan ni James Bond nga makahimo nag pagtago ug pahipi daplin sa dalan nga di na makit-an.
ND: Mao ba, Nyor? Giunsa man ni nila?
NG: Giputos nilag mga LED mat ang maong sakayanan ug ang kada kilid niani duna nay camera. Ang mga LED mat dunay mga gagmitoy nga mga LED lights nga giprogram pag salida kon unsay nakuha sa camera sa luyo o opposite nga side. Sa ato pa gi-camouflage nila ang sakyanan ginamit ang live video nga nakuha sa camera sa pikas nga bahin niani
ND: Nindut nas minuminu ug lamatlamat Nyor. Pero nakahibawo ka ba nga duna nay tambal ron sa racism?
NG: Tambal, as in tablitas o mga butang nga matumar?
ND: Actually, Nyor, daan na ni nga tambal—Propranolol ang tawag niani ug tambal kini sa high blood.
NG: Kay ngano man Nyor, duna diay atakihon sa alta presyon kon makakita silag di sama nilag pamanit ug hitsura?
ND: Aw, dili gyud hinuon ingon niana, Nyor. Kay matud pas usa ka doctor, bisan ang mga tao nga modapig theoretically sa equality sa tanang ethnic groups mosurok gihapon ang dugo kon makakita og dili ingon nila nga mga binuhat. Namatikdan sa mga doctor nga mipainom Propranolol sa 36 ka pasyenting puti nga mga lalake nga di na kini saputon kon makahimamat og mga tao nga lahi niyag kaliwat. Gatuo ang mga scientist didto nga may kalabutan ang pipila ka parte sa nervous system nga kusog moreact negatively kon ang tag-iya niani makasugat og binuhat sa laing ethnicity.Ug agtuo sila nga maapiktuhan kini sa Propranolol.
NG: Maayo tag naa say ipainum nga ang makakita nato madani dayon nato.
ND: Naa man Nyor. Lumay ug Vino Kulafu isagul unya ayuhon lag shake.
