Na-issue ang retirement ni Director Borgonia

Dunay mireklamo ni Sir Bobby Nalzaro sa dySS kagahapon kay gipaamot sila og dagkung kantidad alang sa  surprise farewell party ni Director Recaredo Borgonia sa Department of Education in Central Visayas (DepEd-7)  kinsa mo-retire na karong buwana.

Way problema kun dunay party. Ang nakaporke  kay  gipaapil  pagpa-contribute ang mga principal ug P1,000 nga di makatambong  sa party nga giingong  himoon sa petsa  14 ug  petsa 15 sa Marso.

Sa  eklamo,  tag P4,000 ang amot sa mga schools division supervisors, tag  P2,000 sa mga division heads ug  matud  pa nasabutan nga mohatag sila og P65,000.00 nga pabalon ni Director Borgonia.

Ang  gipasanginlan  nga  nanghingusog  mao  si Yda Cabantan  kinsa  maoy  administrative officer sa regional office sa DepEd-7.

Apan  si Cabantan  nga  na-interview mihimakak sa  pasangil ug iyang giklaro nga ang nagpasiugda mao ang mga schools division superintendents.

Ug iyang  giklaro nga wa  gyuy apil sa plano si Director Borgonia ug si Assistant Director Carmelita Dulangon.

Akong gitawgan si Director Borgonia sa isyu ug iyang giklaro nga  wa gyud  intawon siya magsugo ni bisan kinsa nga mangayog  amot.

Duna siyay gidudahan nga mga responsable ug iyang gihulagway nga kining maong isyu usa ka pagdaot kaniya.

Apan alang nako kun gugma gyud sa mga kadagkuan sa DepEd  nga partihan si Director Borgonia mas maayong wagtangon  nila ang dagkung contribution.

Mag  pot luck  nalang aron minus gasto ug way magtagawtaw kay naglisud baya ang panahon ron.

* * *

Mangahas na sab ko karong Sabado nga mopahigayon og kukabildo atul sa among programang “Dialogue On The Air” sa dySS tali sa mga parishioners ug kang Padre Henry Visitacion sa Holy Cross Parish diha sa barangay Basak Pardo.

Gi-petisyonan ang pari sa iyang mga parokyano tungod kay wa mohatag og road-right-of-way sa mga parokyano  ug matud pa di maayo  og batasan.

Matud pa sa mga nagpasiugda sa petisyon nga  miabot na  og 800 ka mga nipirma ug ila nang giduso ni Archbishop Jose Palma.

Pero in fairness ni Padre Visitacion dunay pipila ka mga residente  ang miklaro  nga samtang uyon sila nga pailisan ang pari apan supak sila nga  mag-abli og road-right-of-way kay matud pa daghang mga dautang elemento.

Ang magtiayong Adora ug Michael Casey nga maoy gikontrahan pag-ayo sa pari miklaro pinaagi sa ilang abogado nga si malalaban Manuel Santiago nga wa pa modaug si Padre Visitacion sa kasong sibil nga ilang  giduso nga ilang gitinguha  nga mabalik ang road-right-of-way.

* * *

Swerte lang ta dinhi sa dakbayan sa Sugbo nga anaa dinhi nagpundok ang halos tanang mga ahensya sa gobyerno ug unay kaayo kita sa mga serbisyo nga mahatag ilabina panahon sa mga problema.

Ang makaluluoy mao ang kalungsoran  ilabina nga lagyo na kaayo kay kuli gyud nga maabot ang serbisyo sa kagamhanan.

Sama sa nahitabo karon didto sa Tuburan nga dunay daghang gipangtipos ug miabot na og upat ang patay tungod sa tubig nga kontaminado. Susama kini sa nahitabo didto sa Alegria nga di pa lang dugay.

Bisag nagbalik-balik na  kining  problema  dinhi sa ato, wa pa gyud maleksyon ang mga alagad sa gobyerno.

Di gyud magpakabana ang mga frontline agencies sama sa Department of Health nga mohimo og regular examination kon inspection  sa tanang mga water system. Unya na manginspection kun dunay mangamatay.

* * *

Maglaum ko nga maangkon na ang hingpit nga kalinaw diha sa lungsod sa Compostela human naproklamar ug nakalingkod na sila si Mayor Joel Quiño ug mga kaubanan.

With all due respect  niining protesta nila ni kanhi Mayor Ritchie Wagas, alang nako usa ra gyud kini ka pagsamok-samok sa pagdumala sa lungsod.

Nganong di na man lang paabuton ang nagkaduol nga eleksyon sunod tuig?

Ang tarong nga tawo dili magsigeg pang-harass sa present administration. Mas maayo man gani nga motabang ang mga pildero  pagpabarug og balik sa  ilang lungsod nga taud-taud nang nasakrispisyo sa politika.