Laing pari dinhi sa Sugbo gireklamo sa iyang mga parokyano | Inquirer News
Close  
Super Hirit

Laing pari dinhi sa Sugbo gireklamo sa iyang mga parokyano

/ 09:17 AM February 29, 2012

Kagahapon, upat ka mga parokyano sa Holy Cross Parish Church diha sa barangay Basak Pardo ang miadto  sa among sibyanaan  sa dySS Super Radyo ug mipadayag sa ilang mga reklamo batok sa ilang parish priest nga si Padre Henry Visitacion.

Ang mga nangreklamo mao sila si Dr. Roman del Fierra Jr.,  Roberto Conde,  Alberto  Ocañada ug Vivian Osorio Armamento.

ADVERTISEMENT

Daghang mga isyu nga ilang gitug-an  batok sa pari ug gani dunay  petisyon  nga pirmado sa 800 ka mga parokyano  nga nanghangyo  kang Cebu Archbishop Jose  Palma  nga papahawaon na sa ilang parokya  ang pari  lakip na ang mga naglangkub sa Parish Pastoral Council.

Apan matud pa medyo nagbungol-bungol lang si Palma.

FEATURED STORIES

Nag-una  sa ilang reklamo mao ang plaza sa simbahan nga dili na makaagi  ang mga residente  human gikoral taliwa nga  ang tag-iya sa luna nga maoy nag-donate  sa simbahan  mihimo og katin-awan nga mohatag gyud ang Simbahan ug insaktong gidak-on nga road-right-of way.

Laing reklamo mao nga overstaying na  ang pari diin miabot na og walo ka tuig inay kutob ra unta sa lima ka tuig.  Nangasuko usab ang mga parokyano tungod kay di mohilog ang pari sa mga tiguwang nga di na makasulti.

Wa sab sila malipay sa pari kay matud pa dili moduaw sa mga tiguwang nga masakiton kun way prior appointment ug kun way sakyanan nga mohatod ug mokuha kaniya.

Nasagmuyo usab sila nga gamiton sa pari ang pulpito pagkomentaryo sa mga parokyano  nga  misupak kaniya.

Alang nila wa silay grasya nga maangkon human sa Misa kay di na gyud sila ganahan sa batasan.

Naningkamot ko nga makatubag si Padre Visitacion atol sa programang “Imbestigador”  nga akoy nagdala kagahapon  apan miingon ang iyang sekretarya nga  si Magda Cuerpo  nga  natulog pa ang pari.

Miingon ang sekretarya nga  anaa  na sa korte ang isyu bahin sa road right-of- way.  Alang  niya nga way rason nga papahawaon ang pari kay tarong ug namasangil siya nga gusto lang gyud ug kagubot ang ubang parokyano.

ADVERTISEMENT

Maayo unta nga tagdon ni Arsobispo Palma kining maong problema.

* * *

Alegre na gyud ang kalamboan sa pulitika dinhi sa  dakbayan sa Sugbo kay migimaw na ang mga personalidad nga makig-alyado ni incumbent Cebu City Mayor Michael Rama sa umaabot tuig 2013 nga eleksyon.

Paspas kaayo ang mga kalamboan sa pulitika kay gikan niadtong Domingo nga mianonsyo na si kanhi kongresista Antonio Cuenco nga mosuporta siya kang Rama nagpadayag na sab sa iyang ka seryoso  si Cebu City Councilor Edgardo Labella nga maoy mag-bise mayor.

Pero  ang dakung butang ug sagubangonon kaayo sa kampo ni Rama mao ang political machinery sa Bando Osmeña Pundok Kauswagan (BO-PK) pinangulohan  ni Kongresista Tomas Osmeña kinsa buot molangkat pagbalik sa liderato sa Cebu City Hall.

Unsa kaandam ang kampo ni Rama nga makigtigi  sa pagpangandam sa BO-PK nga duna na nay insaktong grupo sa bisan asang  suok dinhi sa dakbayan sa Sugbo?

Ambot  lang kun sa katihik sa liderato sa Liberal Party nga sakop sila si Rama makasustiner  ba kaha inig sugod sa kampanya?

Maayong  huna-hunaon sa atong mga amigo nga kining kwarta mao gyuy  dakung hinungdan sa pagdaug.

* * *

Wa gyud mopakita og mga pagmahay  ang katabang sa panimay nga si Aubrey Enriquez Soria nga misunog sa panimalay sa iyang amo sa Banilad ning dakbayan nga nakapaig sab sa laing katabang nga si Cornelia Tagalog.

Akong nakita niya nga mora gyud ug way nahitabo sa iyang gihimong krimen.

Ang depensa ni Aubrey aron siya  kaloy-an, iyang gipasabot nga  nahimo niya ang pagkawat sa kwarta ug mga kabtangan sa iyang amo  ug misunog sa kontrata sa iyang  pagpangempleyo tungod sa kawad-on ug pagkapasmo  sa iyang duha ka mga gagmay’ng  anak.

Alang nako bisan  pa siguro nga siya naglisod  sa panginabuhi apan dili gyud rason nga mangawat na lang siya.

Nganong mosulod man gyud sa kinabuhi’ng  minyo  kun di andam?

Kining hitaboa  maghatag  kini og leksyon sa tanan nga di gyud  mokompyansa  niining mga tawo nga mosulod og  katabang   sa  panimay.

Dili gyud  garantiya  kining  gikan  sa agency.  Mas  bintaha nga  ang katabang  kaila  gyud sa pamilya  nga alagaran.

Read Next
Don't miss out on the latest news and information.

Subscribe to INQUIRER PLUS to get access to The Philippine Daily Inquirer & other 70+ titles, share up to 5 gadgets, listen to the news, download as early as 4am & share articles on social media. Call 896 6000.

TAGS:
For feedback, complaints, or inquiries, contact us.


© Copyright 1997-2021 INQUIRER.net | All Rights Reserved

We use cookies to ensure you get the best experience on our website. By continuing, you are agreeing to our use of cookies. To find out more, please click this link.