Wala sa akong batasan nga magpa-libre

Bilib ko ni Padre Scipio “Jojo” Deligero kinsa maoy leader sa team ministry sa Minglanilla nga among kanhi kura paruko sa among simbahan didto sa Santa Monica Parish Church nga anaa nahimutang sa among silingang barangay sa Cawayan, Dalaguete kay hangtud karon nagpabilin ang iyang mga lunod-patay nga mga tigpaluyo.

Nakasabot ko sa akong mga paryente ug mga ig-agaw nga taga barangay Casay kun unsa ka pinangga nila ang pari kay gani gihilakan man siya samtang gibalhin sa dakbayan sa Mandaue sa wa pa siya mabutang diha sa Minglanilla.

Apan nagmahay lang ko sa tunada sa uban niyang mga supporters kay niadtong Sabado samtang mitambong ko sa kasal sa akong pag-umangkon nilang Inday Raylen ug Jojo nakadungog ko og mga istorya nga kuno ako way utang kabubut-on ni Padre Jojo tungod sa among mga komentaryo ni Sir Bobby Nalzaro sa iyang pagdumala karon diha sa Minglanilla.

Pwerte nakong huna-huna kun unsay akong utang sa pari.

Dihay miingon nga utangan ko sa pari ug wa koy puangod kay si Padre Jojo ang gipabunyag sa akong anak nga si Karen ug maoy migasto. Miulbo akong kaspa ning istoryaha kay di gyud kini tinuod.

Wa nako pakan-a akong asawa ug duha ka mga anak og kinawat ug kinurakot.

Obligado ko nga moklaro niining maong isyu samtang buhi pa kining akong pinanggang inahan nga maoy usa sa nahimong suod sa pari ug maoy solsolan sa akong mga ig-agaw ug paryente.

Akong angkonon nga siya maoy nagbunyag sa akong anak niadtong walo na ka tuig ang nakalabay. Nagbansiwag ang pangan ni Padre Jojo sa baptismal certificate sa akong anak didto sa Alliance of Two Hearts.

Tungod lagi intawon sa kasuod niya sa akong pinanggang inahan ug sa akong ig-agaw nga si Inday Belly wa ko makabalibad kanila nga ang pari maoy mobunyag ug adto ang reception sa “The Barkadas Restaurant” sa may Banilad, Mandaue nga giingong gipanag-iya sa mga Quisumbing apan ang gipadumala mao ang mga kanhi seminarians nga mga amigo ni Padre Jojo.

Ambot kun libre ba ang insaktong termino didto sa reception nga mibayad ko ug dul-an P5,000 diin 15 ra kami ang nangaon uban ni Padre Jojo.

Akong gikwenta-kwenta daku ra kaayo ang akong nabayran sa “The Barkadas Restraurant.”

Kun gilawos pa lang nako ang mga nanambong sa usa ka “Eat All You Can” dinhi sa dakbayan sa Sugbo ug way respeto sa akong inahan ug sa pari naa pa unta koy daghang mahibilin nga panggatas ug pang-diaper sa akong unica hija niadtong higayona.

Pero unsaon man lagi nga niadtong bata pa ko naandan na gyud sa akong mga ginikanan nga unahon gyud ang pari. Tagoan gyud ang mga lamiang sud-an para sa pari unya di gyud sugdan ang kumbira kun wa ang pari. Pagkapaet! Daghang mangapasmo!

Tingali unfair kini sa mga Quisumbing nga na-mention ug apil ning akong lindog. Pero ambot kun unsay motibo ni Padre Jojo nganong adto gyud didto ang reception unya samtang nakainom na siya naghisgot na og mga butang sa pagsud og pamulitika sa mga Quisumbing.

Diha siyay gipangsulti kaniadto nga mosud og kontrata sa among network sa political ads sa mga Quisumbing pero ako siyang giprangkahan nga moadto lang sa opisina kay dili nako katungdanan ang pagpakig-deal og mga kontrata.

Mao nga wa ko matingala dihang nakontrobersiya si Padre Jojo nga miendorso og mga pangan sa mga politiko nga paluyuhan diha dakbayan sa Mandaue.

Ug maayong mahibaw-an kini sa tanan nga way bisan usa ka pulitiko nga makatulisok nako karon nga miduol ko kanila ug makig-deal og kontrata nga ingon ani sa dul-an 20 na ka tuig sa industriya sa panibya.

Bisan akong mga ig-agaw ug mga paryente nga nanglansar kaniadto, nagmahay-mahay man gani nga di ko kapasulod kanila og political ads sa among network kay naglikay gyud ko niining mga butanga.

* * *

Akong naadto pag-Sabado ang sinkhole didto sa sitio Cacarpo, barangay Casay, Dalaguete.

Ang sinkhole nga miporma na og lingin gikan sa pagka-heart-shapes nga may baba nga 8 ngadto sa 9 metros anaa sa lote sa akong mga paryente nga mga Enopia diin midistansiya kini og sobra usa ka kilometro gikan sa tugkaran sa among panimay sa Casay.

Atol sa among pagduaw daghan sab ang naengganyo paglili sanglit midistansya ra kini og gikan 250 metros ngadto sa 300 metros.

Akong tan-aw nga moanam og kadaku ang maong sinkhole kay pagbiya nako didto dihay mga dagkung liki duol sa bangag.

With all due respect sa among bag-ong kapitan medyo may pagkuwang pa gyud nga malikayan ang disgrasya sa mga buot motan-aw kay way mga tanod nga gipabantay.

Igo rang gipalibutan ang bangag sa hikot nga straw unya gibutangan og karatola nga dili paduolan kay peligro.

Alang nako mas maayo man gyud unta nga dunay taga-barangay nga mobadlong sa mga tawo nga magpalayo lang sa sinkhole kay niadtong pagduaw namo tabla hikog ang ubang mga nanan-aw kay wa gyuy kurat nga nagpaduol sa mga nangliki nga yuta nga posibleng mobagsak sa lawom nga bangag.

Manghinaut ko nga tagdon kini ni Mayor Ronald Allan Sesante aron paglikay gyud sa disgrasya.