Kani gyud si Chona Mae
Nakadungog na kos binuang kabahin ni Chona Mae apan kaganina sa usa ka photography workshop nalipat ko dihang ang akong kauban miingon, “Kini gyus Chona Mae.” Gatuo ko nga ngan kinis usa sa mga participant og ngangutana kog “Kinsa may Chona Mae?” Ug nangatawa ang tanan.
Usahay ma wa man gud ning atong presence of mind. Sama pananglitan niadtong tsunami scare. Bisag nakahibawo ka pa nga walay Japan-size nga tsunami ang modagsa sa Cebu kon makit-an mo ang bagang panun sa tao nga managan paingon kanimo ug makita mo ang kahadluk sa ilang mata matakdan kas ilang kahadluk.
Pagkahuman sa linug niadtong Lunes, pitsa 5, miadto ko sa CNU para mohatud og CD sa akong higalang si Januar ug motan-aw sa ilang promotion sa mga Binisayang pelikula nga maapil sa Cinema One film festival nga sugdan sa SM karong adlawa.
Paghuman milakaw ako paingon sa eskina sa may 7 Arts para mosakay og jeep nga Alumnus (08G). Gipili ko ang may bakante ng front seat. Daw Sinulog ang kadaghan sa mga tao sa kadalanan kay gipapauli man tanan paghuman sa linug.
Steady ra ang dagan sa akong gisakyan hangtud naabut kami sa eskina sa USJR diin mihunong kini tungod sa stoplight. Apan kalit lang nga may nanagan gikan sa Carbon market. Abi kog dihay gadinungabay. Apan nagkadaghan ang nanaganay nga nakuyawan akog basig dunay gahuramintado og pusil ang dala niani. Nakuyawan ko kay front seat raba ko naglingkud ug simbakug mopaingon ang bala diri nako.
Pag green light daghang nanakay sa jeeney nga nanawag na sa Sto. Niño ug sa Birhin sa Regla ug may nadunggan akong miingon nga nakasud na ang tubig sa Carbon. May babaye nga mitupad kanako sa front seat nga ga sige og ingon sa driver, “Migo, go nata migo, go ayawg hunong kay maabtan unya tas tubig.” Mitubag ang driver nga di siya maka go kay basig maligsan ang mga tao. Nianing tungora nakaingon ko nga layo ra nis tinuod kay kon diha pay dakong tubig, ganiha ra kaming gilunopan. Wa kaantos ang babaye sa iyang kulba nanaug kinis jeepney.
Nangutana ang batan-ong driver kanako kon asa kami muagi, ug giingnan ko kini nga kon molikay mis tubig sa highway mi musaka. Mo nga Leon Kilat-Colon-Climaco ang among rota paingon sa CCMC. Dihay laing misakay sa akong tupad pero nanaug ra usab. Dihay gasungkud nga mipatong sa hood nga gibadlong sa driver. Pagliku namo sa gikan sa Climaco dihay usa ka pamilya nga naglakip sa mga apohan ug apo nga nagdag salbabida.
Dihang na stock-up nami sa CCMC mihangad ko sa usa ka taas nga building ug nakit-an ko nga ang mga tao sa taas wa manan-aw paingon sa dagat ug diri na manambo kanamo—sa ato pa, way tubig nga misaka sa pier. Wa madugay may misinggit sa barangay hall didto og “balik mo! balik mo! way tubig! way tsunami!”
Kinsa may kapasiudga niadtong kaguliyang? Suma pas mga binuang, diha kunoy ginikanan nga mipasibya sa radyo kabahin sa iyang anak nga si Chona Mae nga wa pa mauli sa ila. Kini kuno ug ang tsunami warning number 2 sa Philvocs maoy nakapakulba sa mga tao. Ug dihang may miagi kuno nga barko nga mihimug bawod sa ga taub nga tubig, nag hysteria na ang mga tao.
Karon duna nay mga testigos nga usa ka broadcaster ug usa ka barangay opisyal ang gapasiugda sa false alarm. Gipanghimakak hinuon kinis mga gipasanginlan.
Kini gong kuwang sa information drive ang atong mga kagamhanan wa nila mapaila kanato kining si Chona Mae, kung kinsa siya, unsay iyang batasan ug unsay atong buhaton kon moabot siya.
