Nyor Daku (NK): Nyor, morag swertehon rong tuiga ang lungsod sa Cordova sa Isla sa Mactan.
Nyor Gamay (NG): Ug nganong nakaingon man sab ka niana, Nyor?
ND: Tungod kini sa ilang abay.
NG: Abay ba uy?
ND: Ang ila bang totem, ila bang power animal, ila bang familiar.
NG: Unsa man ba? Power animal? Unsa, bakasi nila?
ND: Tumpak!
NG: Ug nganong magda man nilag swerte ang bakasi karong tuiga?
ND: Be, unsa man rong tuiga sa Chinese Astrology?
NG: Year of the Dragon.
ND: Kumpletoha.
NG: Na hala, Year of the Water Dragon. Pero intawon, Nyor. Di man na dragon ang bakasi.
ND: Unsay di? Niay definition sa Wikipedia, Nyor, ay: The English word “dragon” derives from Greek d????? (drákon), “dragon, serpent of huge size, water-snake,” which probably comes from the verb d?a?e?? (drakeîn) “to see clearly.”
NG: Water snake tingali, pero di man huge ang bakasi, Nyor. Gagmay ra man na sila Nyor.
ND: Modern prorotype man na sila, Nyor. Di ba nagkamodern ang produkto nagkagamay man ang gidak-on niini?
NG: Nyor ayaw inatwog pugsa kay modugo.
ND: Wa intawon na nako pugsa, Nyor, uy. Symbolic ra man na ang dragon. Di ba ang principle sa magic mao man ang “like follows like.” Kun de buenas ang dragon, labi na karon nga iyang tuig, de buenason sab ang mga nakaangkon ug mga hayop nga may susama nga hulagway sa dragon.
NG: A di ko motuo anang imong hinangaw Nyor. Di ko kadawat nga dragon na ang bakasi. Wa man nay umoy.
ND: Way umoy? Wa ka kahibawo nga mao nay makahatag og panuhod sa mag edaran para sila makakayud?
NG: Atik ra na, Nyor. Kay kun hitsuraay lang, mas duol sa dragon ang halo.
ND: Kun dragon man gani nang iguana Nyor, di na siya water dragon. Bati sab na siyag nawong Nyor.
NG: Mao nay dragon, kahadlukan. Sagdi lag di ni siya water dragon kay bakilid dragon man sab ni siya.
ND: Western ra kayo imong dragon, Nyor. Kay ang eastern nga dragon, usa man ka mangihatagon nga hari. Di man siya mangtas nga manghasi pinaagi sa pagbugwak og kayo.
NG: Di sab ka makaingon nga buotan ang mga dragon sa east. Di ba si Godzilla nga Japanese dragon mangguba man og building? Ug ang bakunawa sa Plipinas, nga maoy dragon sa atong ancestors, molamoy man og buwan?
ND: Nindot kanang imong mga obserbasyon, Nyor. Apan alang sa mga Insik, Nyor, nga maoy gamugna ning kalendaryo sa mga hayop, ang Year of the Water Dragon “brings many possibilities for good fortune.” Maayo tingai nga magsugod nakag panakop og halo, tuko ug tabili unya ibaligya mo kini isip tambal sa lain-laing mga sakit sama sa ubo, hubak, panuhot ug uban pa. Magmalampuson ka nianing maong negosyo, Nyor. Bantay-bantay las Department of Environment and Natural Resources kay basig ikaw unyay ilang sikupon.