Culture of flight

“There’s a feeling I get when I look to the west,

And my spirit is crying for leaving.

In my thoughts I have seen rings of smoke through the trees,

And the voices of those who stand looking.

Ooh, it makes me wonder,

Ooh, it really makes me wonder.”

—”Stairway to Heaven,” Led Zeppelin

Mi-text ako sa akong higalang bangi-itang maniniyot nga si Vic Kintanar kun nakasuroy na ba siya sa Tay Hua Trading sa Binondo, Manila, diin daghang baligya nga mga photo accessories nga di kaabot dinhi sa ato.

Mitubag si Vic nga wa gyud kuno siya makasuroy kay tagdugay kuno kaayo ang ilang klase mahuman kay tabian kuno kaayo ang mga instructor nga langyaw.

Gipangutana ko siya kun para pang-abroad ba kining mga klase nga iyang gi-intrahan kay mga langyaw may lecturer. Mitubag siyag -pang abroad sa Argao.

Kining si Vic nga lumad nga taga-Argao usa sa kontra kaayo sa pangpanarbaho sa gawas labi na kun wala gyud kini kinahanglana. Bokal kaayo kini siya batok sa ginatawag og “brain drain.” Nahisakop si Vic sa minoriya nga misuporta ning maong krusada.

Ug kaganina lang, naabrihan ko sa Internet kining usa artikulo sa Philippine Daily Inquirer kabahin sa mga pagtuon kon ang poverty (o kakabus) ba ang bugtong hinungdan kun nganong gusto manarbaho sa gawas ang mga Pinoy.

Namatngunan sa maong mga pagtuon nga dili ang mga purdoy maoy nanginteres pagtrabaho sa gawas. Kay suma sa ilang na-obserbahan, daku man og gasto ang pag-process sa mga papeles para panarbaho sa gawas. Mao nga matud sa maong pagtuon, dili ang mga way sapi maoy buot mogawas.

Gani, daghan na man ang nailad sa mga illegal recruiter apan wala kini makapatagam sa mga Pinoy pagpangitag paagi nga makapanarbaho sa gawas.

Nagkanayon usab ang maong mga pagtuon nga daghan mang nasud nga nag-atubang og krisis ekonomiya apan kita mang mga Pinoy maoy mas kursunada kaayo nga mogawas.

Ang tentasyon sa paglarga lisud lingiwan. Doble ngadto sa kaupaton ang sweldo sa gawas kun itandi sa suhol dinhi sa ato sa susama ra nga trabaho. Kun itandi sa ubang nasud, morag mas dali sab kita nga makuha kay kamao man kita mo-Ininglis, bisan pa man og magkayuring usahay, mas maayo na lang sa uban nga wa gyuy A.

Nagkanayon si Dr. Celement Camposano, usa sa mihimog pagtuon ning panglangyaw sa mga Pinoy, nga “whether we accept it or not, migration is innate to human beings who are influenced by various cultures and their yearnings to discover those cultures by themselves.”

Ang mga naghimo ning maong pagtuon nakaingon nga dili lang ang kakabus maoy bugtong hinungdan kun nganong buot manarbaho sa gawas ang mga Pilipino.

Wala matuki sa maong pagtuon nga ang uban mangutang para sa ilang paglarga ug ang mga mipautang misalig ug milaum nga dili ang utang maoy mabayran ning maong mga OFW kay gatuo sila nga makatabang kining maong mga OFW sa ilang mga kabanay ug nga sandigan kani nila kun sila na usay mahimutang sa kalisud.