Viva Pit Señor!

Nagpakita lang gyud kun unsa ka relihiyoso kitang mga Sugbuanon tungod sa atong way puas sa pagkamainampoon ngadto sa Balaang Bata nga si Señor Sto. Niño nga maoy “Batang Jesus.”

Ang ubang deboto naandan na nila kining panaad sa  pagsakripisyo  gikan pa sa pagtambong  sa siyam ka sunod-sunod nga Misa sa kadlawon pagsugat sa Pasko nga mao ang “Misa De Gallo” ug ang pagtambong sa  siyam ka adlaw nga novena Masses sa kapistahan ni Señor Sto. Niño.

Ang labing daku nga religious activities sa Fiesta Señor mao ang fluvial procession ug solemn foot procession karong adlawng Sabado.

Samtang karong Domingo mao usab ang atong  pagsaksi sa Sinulog Grand Parade.

Manghinaut ko nga way dagkung trahedya nga mahitabo ug way dagkung krimen.

* * *

Wa ko makasabot kun nganong gi-ambush-patay ang among  kanhi station manager sa Super Radyo General Santos City nga si Christopher “Cris” Guarin kinsa  usa na ka radio block timer announcer sa usa sa mga sibyaanan didto ug editor-in-chief sa usa ka  tabloid.

Natingala ko kay akong nahibaw-an nga  dili siya matawag nga hard-hitting commentator kay ang gi-promote  niini sa  kahanginan mao ang herbal medicine sumaa pa ni Sir Bobby Nalzaro.

Kun ang asawa pa-istoryahon, way kontra  iyang bana.

With all due respect, wa kaayo ko makaila kaniya ug wa ko makadungog sa iyang mga banat sa radyo kaniadto ngan nga  layo na ang GenSan dinhi sa ato.

Hinuon, ngan nga siya gipatay dunay naglagot kaniya. Posible nga personal ug posible usab nga may kalabutan sa iyang trabaho.

Usa ko sa mikondenar niining laing krimen  nga naglambigit  og laing sakop sa prensa. Kun may kalagot, nganong di na man lang pasakaan og kasong libel ug damages?

Maglaum lang ko nga kahatagan siya og hustisya sama sa panawagan karon sa iyang  mga  kabanay.

* * *

Sa tinuud lang, risgo gyud kaayo alang namong sakop sa media kining matang sa trabaho nga among gisudlan kay di malikayan nga duna gyuy  mapungot  ug maglagot.

Mao nga pabor gyud ko nga armasan kaming  mga sakop sa media ug kun mahimo pasakyon gyud og sakyanan nga bullet-proof aron di maalkanse sa panahon nga interesan gyud.

Sama  gud unta sa nahitabo ni Cris Guarin nga kun may armas pa ug nakabawos sa pagpamusil dili unta siya sayon nga mapatay sa duha ka mga  responsable nga nag-motor.

Tiaw muna, migawas na lang si Cris Guarin sa ilang sakyanan ug nagpatara  na lang  aron  dili  maapil og  kamatay iyang asawa ug anak.

Ang estado karon sa mga sakop sa media dinhi sa Sugbo kanya-kanya  ang diskarte nga makaarmas ilabina kadtong mga interesado nga  makahupot.

Sa tinuod lang, daghan ang gusto nga magdala og armas pero tungod sa kamahal sa genuine nga armas maoy usa sa mga hinungdan nga moatras na lang ilabina nga pamilyado na kay palabihon ang pagkaon sa  pamilya.

Gawas niini, daku sab og bayranan ang pagpa-lisensyaug pagpa-renew sa lisensya  sa armas.

Ang laing rason mao ang kamahal sa pagbayad sa Philippine National Police sa pagpangayo og permit to carry fire-arms outside residence.

Duna say ubang sakop sa media nga armado  man tuod apan way practice tungod kay way panahon.

Ang bugtong hinagiban  sagad kanamo mao ra gyud ang pangaliya sa Kahitas-an ug ang  pagka-responsable sa among profession nga di magpasagad og suwat ug tuki sa mga isyu.

* * *

Nalingaw ko nga nagtan-aw sa mga kawani sa korte niadtong Biyernes sa hapon nga naglumba  pagpailis sa ilang nadawat nga tseke nga tag P10,000 nga maoy nagkompleto sa ilang tag P25,000 nga grocery allowance gikan sa Korte Suprema.

Pero ang wa nako mauyuni niadtong higayona kay na-convert ang opisina sa korte ngadto sa usa ka money changer.

Pwera buyag wa gyuy delicadeza ang mga trabahante sa usa ka lending firm kay migamit  pa og lamesa  ug didto pa sa sulod sa Palace of Justice ang ilang transaction.

Ambot kun gitugtan na ba sila diha ni Regional Trial Court Executive  Judge Sylvestre Maamo nga mohiklad sa ilang negosyo kay niadtong  panahon ni RTC Executive Judge Mienrado Paredes gibadlong ug gi-ban na sila sa pagsud.

Nagtuo ko nga dunay mga kawani sa korte nga kakonsabo  ug   maoy nagpahibawo sa maong lending firm nga magdala og daghang kwarta niadtong higayuna aron maoy makailis sa mga tseke sa mga trabahante.