‘Tomas versus Mike maoy nindot nga away’
Way lami ang away sa pulitika dinhi sa dakbayan sa Sugbu karong 2013 pagka-mayor kun di si Kongresista Tomas Osmeña maoy mokontra kang incumbent City Mayor Michael Rama.
With all due respect, linghod pa si Margot o ba kaha si Miguel anak nilang Tommy nga mosakbang ni Mayor Rama. Bisan si Vice-Mayor Joy Young di pa magsilbe ni Rama.
Mas maayo gyud nga Tomas versus Mike aron makita ang katag kun kinsay lig-on nilang duha ug kinsay gipangga sa mga konstituwente dinhi sa dakbayan sa Sugbu.
Alegre gyud kun madayon ang Tomas versus Mike kay pulos gyud silapanington ug bugbog sama niadtong unang bangga nilang Tomas ug kanhi City Mayor Alvin Garcia.
Maglaum ko nga bisan mibuwag na si Mayor Rama sa Bando Osmeña Pundok Kauswagan (BOPK) dili maapektahan ang mga basic services sa City Hall ngadto sa katawhan.
Akong gipaabot nga niining nagka-init nga panagbingkil nilang Mayor Rama ug Kongresista Osmeña dunay makuha ang katawhan pinaagi sa pagyagyag sa mga kuwestiyonable’ng transaksiyon.
* * *
In fairness ni Cebu City Mayor Michael Rama maki-angayon kini’ng iyang gihimo nga hinugtanay sa bakus sa tres mil ka mga casual ug mga job-order nga mga kawani sa City Hall ug ingon man sa mga opisyales nga naghupot og katungdanan sa City Hall.
Normal kini’ng mahitabo sa bisan asang opisina nga mag-loyalty check gyud ilabina nga giputol na niya ang pakig-alyado sa BOPK ug kang kongresista Osmeña. Sagad sa mga apektadong kawani tinudlo ni Tomas kaniadtu.
Ngan nga salida karon ni Mayor Rama sa City Hall makapa-buot siya kun kinsay iyang ipabilin nga mga kawani.
Di man seguro lisod ang pag-reapply sa ilang trabaho. Kun mo-sipsip lang seguro ngadto ni Rama ang mga nahulga nga mga kawani segurado sila’ng makabalik. Tig-a na gyud kaayo ug balati-an si Rama kun di gihapon niya i-renew.
Usa kini sa mga strategy sa pulitika. Kun di gyud matulon ni Rama kadtong mo-apply og balik puwede man nga adto magtuk-ong sa district office ni Osmeña.
* * *
Gibana-banang mo-abot sa 1.5 milyones ka mga tinun-an sa tibuuk Central Visayas ang mosulod sa klase karong adlawa kini suma pa ni DepEd-7 Assistant Regional Director Carmelita Dulangon atul sa among programa’ng “Dialogue On The Air” sa DYSS Super Radyo niadtong Sabado.
Matud niya nga magklase gyud dayon karong adlawa apan kinahanglang dawaton sa mga principal kadtong mga tinun-an nga ma-late og pa-enroll ilabina kun dunay balido nga rason.
Mihangyo siya sa kapolisan ug mga Barangay Tanod nga magpakita gyud sa mga ganghaan sa mga eskuwelahan ug alerto nga motabang sa mga estudyante panahon nga hilabtan sa mga badlungon.
Iyang gitug-an nga duna gihapo’y pagkuwang sa mga magtutudlo, mga lawak, mga libro ug mga lingkuranan.
Apan gipaneguro nila nga sa matag lawak mo-abot lang og 40 ka mga tinun-an. Kadtong mga tunghaan nga magkuwang ug classrooms kinahanglang pangitaan og paagi sama sa paggamit sa ilang school library ug ang principal’s office. Kun di gyud kaya ang gidaghanon sa mga tinun-an makig-alayon sa mga pisyales sa Barangay aron solosyunan ang problema.
* * *
Si Cebu City Fire Marshal Aderson Cumar nanawagan ngadto sa mga tinun-an sa kolehiyo nga segurohong luwas ang ilang kaugalingon sa bay nga ilang abangan.
Kinahanglang likayan ang pagpuyo sa mga boarding houses o dormitory nga gubot ang koneksiyon o (octopus connection) sa koryente kay delikado gyud sa sunog.
Miingon si Cumar nga magpadayon ang ilang pag-inspection sa mga bay puy-anan nga maoy mandu sa ilang ulohang buhatan.
Di lang mga boarding houses, apil usab ang mga apartments ug dormitory segun pa ni Cumar.
Pero unsa man gyud ka subsob ang kampanya sa Bureau of Fire Protection batok sa mga tag-iya ug building nga nakalapas sa Fire Code?
Dugay naman unta ni’ng balauda apan wa ko makabantay nga duna sila’y gipamulta ug gipangkiha nga mga malapason.
Wa kahay under the table sa ilang pagpang-inspection?
