Leksyon nato tanan ang nahitabo sa Mindanao
Dili nato basolon ang Ginoo ug kinaiyahan sa dakung flash flood sa Cagayan de Oro ug Iligan cities.
Definitely, wa matulog ang Ginoo. Apan kitang tawo maoy natulog ug wa magpakabana sa pagka-peligro sa atong mga binuhatan.
Sa akong basa, gipamata lang kita sa Ginoo kun unsa kaandam kitang wa pa makatilaw og tagam. Kumusta na kita ug unsa na kita kaandam sa atong kaugalingon sa panahon nga mobalik kita Kaniya?
Ambot kun kanus-a makonsensya ang mga impluwensyadong mga tawo ug mga politiko sa Mindanao nga maoy nagpasiugda niining pag-abuso sa atong kalasangan pinaagi sa illegal logging?
Mao kini ang nakapait, kay mahimong inutil ang gobyerno kay ang nangalagad sa kagamhanan kakonsabo sa mga responsable sa pagpamutol sa mga kahoy.
Alang sa mga nanaglingkod karon, panahon na kini nga tinud-on ang paggamit sa police power sa estado aron hinginlan na gyud sa hingpit ang mga nanagpuyo kilid sa mga creek ug kasapaan.
Hagit kini karon nila ni Mayor Michael Rama sa Cebu City ug Mandaue City Mayor Jonas Cortes sa paghimo ug hiniusang lakang pagpalayas sa mga informal settlers diha sa Mahiga Creek.
Lisud na kaayo nga moabot ang panahon nga igo na lang kitang mamunit og mga patay tungod sa pamulitika sa mga politiko nga way hinungdan.
* * *
Dili na lang unta magminaot ning uban nga nagsigeg panaway karon kang Presidente Noynoy Aquino nga nakaako pa pagtambong sa Christmas party sa mga sakop sa Presidential Security Group (PSG) sa Malacañang Park niadtong Domingo sa gabii taliwa sa kasub-anan sa grabeng trahedya sa northern Mindanao.
Alang nako, wa koy nakitang dautan sa Presidente nga mitambong sa Christmas party kay sa unang bahin, wa man siya matulog pag-monitor sa iyang mga sinaligan pagtabang sa mga biktima sa trahedya.
Tungod ba lang kay Presidente si Noynoy ug ato na siyang hikawan sa pagtambong og party sa mga tawo niya nga naghatag og seguridad 24 oras?
Dili ba normal nga mokatawa ang tawo sama kang P-Noy nga nalingaw sa mga pasiaw, pasundayag ug sa mga kanta sa actress nga si Valerie Concepcion?
Kun di mopakitag katawa ang Presidente, dili kaha siya dudahan sa iyang mga kaatbang nga may deperensya siya?
Akong sublion nga ang pagtambong sa Presidente sa party wa magpasabot nga nagpakabuta-bungol siya sa kasakit sa kabanay sa mga biktima.
Kitang mga tawo nga normal mokatawa ug mobahakhak sa oras nga dunay kataw-anan apan motibi ug modangoyngoy sa takna sa pagbangutan. Ingon ani kita mopakita og respeto sa mga butang nga atong tambongan.
Ang dautan ug insulto mao kun niadto pa si Noynoy og Christmas party sa Iligan ug Cagayan de Oro unya wa mopakita ug way gitunol nga tabang ngadto sa mga biktima sa trahedya.
* * *
Lisud na kaayong tuhoan karon nga gibalbal kon giungo ang 10 pa lang ka adlaw sa mahayag nga bata nga si John Edison Malacay nga namatay didto sa barangay Tangke, Talisay.
Kining klase sa istorya, panahon pang mampor ug wa gyuy proyba ang mga istorya bahin sa mga ungo-ungo.
Sa akong kabatan-on kaniadto sa Casay, Dalaguete makadungog ko og tingog sa kuwi ug kikik inig ka gabii apan way gidungog nga gibalbal sa amo.
Apan nakasaksi ko nga mas mo-grabe ug magsigeg balik-balik ang mga kuwi ug kikik kun dunay tawo nga himalatyon kon buntis nga nagmasakiton.
Ang kabanay sa bata nagtuo gyud nga giungo ang bata tungod kay miburot ang pusod, unya nanggawas ang dugo sa ilong ug baba ug dunay mga pat-ak sa dugo sa ilang sawog, sa banggera ug sa atop.
Hinoon maklaro kining tanan inig gawas sa resulta sa autopsy. Kun mga doctor paistoryahon, posibleng nag-internal hemorrhage ang bata gikan nga nahug o ba kaha nagkuwang lang sa bitamina ilabina nga sa balay ra gianak.
