Mo sees momo and runs
Unsa man kabahin ang isuwat ko ning madag-umon nga Lunes para basahon mo karong martes? Kabahin ba ni Rhian o kabahin ni Erap? Unya na lang tingali si Erap.
Sayo ko nakamata ganina mao nga naabtan ko sa News TV si Mike Enriquez ug kauban. Nagkomedyahay sila kun unsay isumpay ning linya nga, “Ang dati kong girlfriend…” Dunay mitubag og, “Mrs. ko na ngayon.” Ila kining gisalikway kay kumon na kuno kini nga sumpay. Nalingaw sila sa sumpay nga, “Boss ko na ngayon.”
Unsa kahay itubag ni Mo Twister kon siya maoy pangayoag sumpay sa maong linya?
Daghan ang naglagot nianing DJ Mo. Una kay tungod baba-on siya daghang gatuo nga mas bayot pa siyang Piolo, nga gituohan sa kadaghanan nga bading. Ikaduha mao nga bisan sa iyang ka kuwang og barug daghan kaayo siyag gwapa nga uyab.
Miangkon si Mo nga daghang wa ganahi sa iyang pagka baba-on. Pero nanagang siya nga “it goes with the job.” DJ ug talk show host man siya. Tinuod nga video killed the radio star pero daw duna pay nahabilin nga lana ang mga DJ nga ilang gamiton sa pagbihag on mga hitsuraang binuhat. Ubay-ubay nag nabihag kinis Mo.
Si Rhian Ramos maoy katapusang natingkwa ni Mo. Apil kanunay sa akong lista sa five prettiest actress sa Pinas si Rhian Ramos. (Uban kang Angel Aquino, Megan Young, Maricar Reyes ug Heart Evangelista.)
Ug kun tuhoan ta ang mga gipanulti ni Mo, si Rhian ra gyud kunoy naka-damage kaniya.
Kun ingnon ta nga susama kang Mo nabuang kas gugma sa usa ka babaye nga mas gamhanan pa kanimo unya modesidir kining maong babaye nga magpakuha sa iyang gisabak nga ikaw ang amahan, unsa may imong buhaton?
Daw katuhoan man ang salimuang ug bankoliya ni Mo. Bisan pas iyang pagkabayuton og batasan, daw natandog ang iyang garbo pagkalalake nga wa siyay nahimo sa pagluwas sa iyang liwat. Daw natandug usab iyang tanlag nga sa wa niya pagbabag nahimo siyang konsabo sa kamatayon sa usa ka binuhat nga wa pa mahimugso.
Daghan ang nangutana kun kahibawo man diay siya nga career oriented ang iyang uyab, nganong wa man siya mag condom? Wala untay pagmabdos nga makasamok sa ilang kinabuhi.
Kun tinuod man kining gipangyawit ni Mo, lain na pud kini nga ebidensya sa kabangis, kangilngig ug kasalbahis sa negosyo, labi nas negosyo sa kalingawan, diin panalipdan gyud ang ilusyon para makakumkum ug mahakup og bahandi, bahala nag kinsa o unsa ang maligsan. Ang nakakataw-anan lang niini kay ang mipakita sa kangil-ad sa maong negosyo mao ang ila ra sang way puangud nga sakop. Kun usa ka pagbuto ang balita kabahin sa sexuality ni Piolo, kining Rhian-Mo abortion issue daw usa ka pagsuyop sa lilo diin daghan ang mabira sa ilawom.
Hinuon duna say moingon nga tulitoy lang gyud kining si Mo ug dili tinuod kining iyang mga pagarpar nga iya lang gihimo agig panabla sa mibiya kaniya.
