Tubag ni Katrina sa mga speculations
In fairness intawn sa nagbangutang kabanay ni Philippine Drug Enforcement Agency in Central Visayas information officer ug dyRC anchorman Jesus “Jessie” Tabanao, mi-esplikar ang asawa nga si Katrina bahin sa pagpanag-iya nila sa luho nga sakyanan nga Strada Mitsubishi nga maoy gisakyan ni Jessie atol nga siya gipusil-patay sa may dalan Escario unahan sa Golden Peak Hotel niadtong Sabado sa gabii.
Miingon si Katrina nga ang kantidad sa maong sakyanan P850 mil gikan kang Talisay City Councilor Danny Caballero ug iyang giklaro nga second hand na kini.
Akong nahibaw-an gikan sa akong mga amigo nga ang brand new mobalor og P1.7 million.
Matud sa asawa nga gi-utangan ug dakong salapi ni Jessie ang maong sakyanan unya mitampo usab si Katrina sa iyang bahin sa halin sa yuta ug ang pag-trade in sa ilang awto ug nakatabang usab ang ilang negosyo.
Kabahin sa P46 mil nga anaa sa possession ni Jessie, giklaro ni Katrina nga giandam kadto ni Jessie aron ibayad sa Pag-ibig fund sa palta nilang lima ka buwan nga monthly amortization sa ilang bay sa Camella Homes sa Talisay ug gawas pa ang uban niadto itabang kadto sa igsoon ni Jessie nga nikuha og working visa para gawas.
Ang hinungdan nga adto nila ilubong si Jessie sa Moalboal tungod kay dili nila kaya ang presyo sa mga pribadong sementeryo dinhi sa dakbayan sa Sugbo pun-an pa nga tali-anak na siya.
Mihangyo si Katrina nga unta undangon na sa ubang mga tawo ang pagpagawas og mga negatibong isyu batok sa iyang bana kay dili na intawn kini makatubag.
Mihulga ang asawa nga kun di na gyud kaya ang mga alegasyon batok ni Jessie hangtud nga makadaot sa reputasyon andam niyang ipangtaral sa kasong libel.
Maglaum ko nga matabangan sa pag-angkon og hustisya ang kabanay sa giumol nga Special Task Force sa Cebu City Police Office kinsa hangtud karon blangko pa.
* * *
Bilib ko sa pagkabaga og nawng sa atong mga magbabalaud nga nalambigit sa grabeng anomaliya sa pork barrel kay wa gyud maghikog ang mga kanahan.
Kanus-a man kini pang-suspensohon ug panaktakon human nakiha na niadtong Lunes?
Sa Japan pa siguro ni nahitabo hurot-hurot na ang atong mga magbabalaud niining higayuna sukad natribukar ang P10 billion pork barrel fund scam.
Daku ko og pagtuo nga sa umaabot nga mga adlaw dunay mga Sugboanong magbabalaud ang maapil unya sa kaso.
Niadtong Lunes gitaral na sa kasong plunder sila si senators Jinggoy Estrada, Juan Ponce Enrile ug Ramon Revilla Jr. nga nakasakiyo og P581 million nga kickbacks sa ilang Priority Development Assistance Fund (PDAF).
Kang Enrile P172,834,500 samtang kang Revilla moabot og P224,512,500 unya kang Estrada mo-abot og P183,793,750.
Apil usab ang giingong mastermind nga si Janet Lim-Napoles, ingon man sila kanhi kongresista Rizalina Seachon-Lanete nga nibulsa ug P108,405,000 ug kanhi kongresista Edgar Valdez nga nakabulsa og P56,087,500.
Samtang ang ubang nalambigit sa scam gikasohan og mga kasong malversation, direct bribery ug anti-graft and corrupt practices tungod kay wa makaabot og P50 milyones ang na kickback nga sila si former Rep. Rodolfo Plaza nga nakabulsa ug P42,137,800, Samuel Dangwa, P26,770,472 ug Constantino Jaraula P20,843,750.
Apil usab ang mga chief of staff sa mga magbabalaud nga sila si manlalaban Jessica Lucila “Gigi” Reyes kang Enrile, Richard Cambe kang Revilla, Ruby Tuazon ila ni Enrile ug Estrada, Pauline Labayen kang Estrada, Jose Sumalpong ug Jenanette de la Cruz kang Lanete, Erwin Dangwa ug Carlos Lozada nga staff.
Giapil usab pagtaral sa unang batch ang mga opisyal sa mga implementing agencies nga sila si Allan Javellana, kanhi presidente sa National Agribusiness Corp. (Nabcor); Gondolina Amata, president, National Livelihood Development Cooperation (NLDC); Antonio Ortiz, kanhi director general sa Training and Research Center (TRC); Dennis Cunanan, kanhi deputy director general ug karon director general sa TRC; Salvador Salacup, former president, ZNAC Rubber Estate Corp. nga karon assistant agriculture secretary.
Gitaral usab ang nagkupot sa mga peke nga NGOs ni Napoles sa kasong plunder and malversation nga sila si Jocelyn Piorato sa (Agricultura para sa Magbubukid Foundation), Nemesio Pablo (Agri and Economic Program for Farmers Foundation), Mylene Encarnacion (Countrywide Agri and Rural Economic and Development Foundation), Evelyn de Leon (Philippine Social Development Foundation) ug Ronald John Lim (Ginintuang Alay sa Magsasaka Foundation).
Apil usab ang ubang mga opisyales ug mga kawani sa implementing agencies sa kasong plunder ug malversation, bribery ug anti-graft human mikonsabo nga sila si Victor Cacal, Romulo Revelo, Ma. Ninez Guanizo, Julie Johnson, ug Rhodora Mendoza, nga pulos konektado sa Nabcor; ug sila si Alexis Sevidal, Sofia Cruz ug Chila Jalandoni sa NLDC ingon man sila si Francisco Jover ug at Marivic Jover sa TRC.
Bantay bitaw kun manibat ning mga kanahan! Dili kaha ni maparehas kang Imelda Marcos nga wa gyud mapriso?
