Ceres movies and the DVD blues
Dihang gipost sa Facebook sa akong higala nga si Aldo ang hulagway sa DVDihan nga miladlad og kopya sa mga Binisayang pelikula sa Cinema One nga “Di Ingon Nato” ug “Paranormal Romance,” gilibot ko dayon ang mga DVDihan ning dakbayan para makakuha kog kopya.
Apan wa akoy nakaplagan. Dihay usa apan dili mao ang sulod. Kasagaran sa mga manindahay wala kaila sa mga pelikulang akong gipanghisgotan. Ang uban miingon nga “Apocalypto” ray Binisaya nga DVD ang ilang nahibawo-an. (Ang “Apocalyto” mao kini ang pelikula ni Mel Gibson nga gi-dub sa Binisaya ni Haring Buang.) Ang uban motunol kanako og kopya sa “Amigo,” usa ka American indie nga pelikula nga dunay daghang Cebuano speaking characters ug nga si Joel Torre maoy bida (nga usa ka Ilongo).
Diha akoy napalgang DVDihan nga miingong namaligya niani niadto apan nahurot na kuno ilang kopya ug murag di sila mo-order og usab kay hinay kunog halin.
* * *
Kaupat na tingali ko makasakay og Ceres Tours nga bus paingon sa Negros ug balik nga ang pasundayag sa ilang TV mao ang The Fast and The Furious ug Face/Off (directed by John Woo). Sa una mong tan-aw niani nga magsakay kag Ceres malingaw ka niani. Apan kun kaupat mo na kini makit-an magkatawa kag makaingon nga naa na sab ning awtong manglupad ug nia na sab si Nicholas Cage ug Jon Travolta nga bayloay og nawong.
Niadtong Biyernes miadto mig Negros aron moduaw sa among iyaan nga na-stroke ug nagdahum na sab kong makakita ni Cage ug Travolta apan gipulihan ang duha ni Robin ug Regine, Juday ug Ryan ug Vic Sotto ug Paula Taylor.
Sa unang higayon nagpasalidag Tinagalog ang Ceres ug nahimuot ako niani. Kay tungatunga na may naabtan ko sa pelikula ni Robin wa na lang ko manumbaling pagsunod niani. Ug kay duol na man kami maabot pagpasalida sa kang Vic igo na lang kong mingisi sa mga pasiaw ni Jose ug Wally.
Pero bisan pa man og stereotype ang mga character sa Kasal Kasalo Kasali mada ka sa sipat nga narrative o padagan sa sugilanon. Nahimuot ako ning maong biyahe nga absent si Cage ug si Travolta ug nga tinagalog ang salida.
Sa pagbalik namo gahuwat ko ang team Travolta ba o ang team Juday ang molugwa sa ikang TV apan tungod tingali kay kaadlawon kadto wa sila mopasalida. Hinuon mga kanta sa Asin ug sa Eagles mao ray ilang gipatukar. Sa sunod kaha nga mga tuig di kaha Rivermaya ug Taylor Swift ang lang patukaron? Ug hinaot unta nga maapil na sa ilang playlist sa DVD ang mga Binisayang pelikula sa Cinema One sama sa “Di Ingon Nato” ug “Paranormal Romance” kay anugon kaayo kining maong mga salida nga makalingaw sa mga sama adtong mga Bisdak unya pipila ra nato ang makakita, kay tingali way pambayad ang uban kanato sa sinehan ug ang uban wa poy higayon nga itan-aw sa limited ra nga showing niani.
