Suspensohon si Gov. Gwen?
Ang worst case scenario nga atubangon niining panahuna ni Gov. Gwen Garcia mao nga suspensohon siya sa katungdanan human napasaka na sa Sandiganbayan ang duha ka mga kasong anti-graft ug usa ka kasong technical malversation subay sa pagpalit sa kontrobersyal nga Balili property sa Tinaan, Naga City.
With all due respect mao ra ba gyud kini ang naandan sa Sandiganbayan nga mopatuman og suspension sa katungdanan niadtong mga opisyales sa gobyerno bisag way mosyon ngan nga kasong anti-graft.
Kun masuspenso si Governor Gwen pagkahayahay ni kanhi board member Agnes Magpale nga sulagma kaayo nga nahimong Bise-Gobernador tungod sa kamatayon ni kanhi vice governor Greg Sanchez ug magobernador sa Sugbo.
Sa gihimong voluntary surrender ni Governor Gwen niadtong Biyernes ug nipyansa sa mga kaso timailhan nga abtik kaayo ang iyang legal panel paglikay sa eskandalo nga dakpon pinaagi sa warrant of arrest samtang maglingkod sa Kapitolyo.
Akong naobserbahan nga sinugdanan pa lang kini sa pagkamat-an pas pinya sa kampo ni Garcia niining dakung buruka nga iyang sagubangon.
Ang best option nga himuon sa kampo ni Governor Gwen mao ang paglangay-langay sa kaso nga di kapatuman ang Sandiganbayan sa suspension pinaagi sa pagdangop sa Korte Suprema ug kwestyonon ang findings sa Ombudsman Manila sa existence sa probable cause hangtud na sa pagpa-nullify sa mga kaso.
Kun masuspenso man si Governor Gwen posible nga makaapektar kini kaniya apan tingali gituyo sab kini sa kahigayunan aron makapaturagas na siya sa iyang panahon sa pagpangampanya ug maka-focus sa iyang ambisyon sa Senado.
Pero sama sa akong giingon nga daghang paagi unsaon paglubag ang kaso. Kun kaya sa ubang mga abogado paglusot sa ilang mga kliyente way duda sa mga Garcia nga family of lawyers.
Kun tan-aw sa publiko nga anomaloso ang pagpalit sa Balili property nga lubog sa tubig dagat apan lahi ang tan-aw sa mga Garcia kay alang kanila magamit kaayo ang lote alang sa kabulahanan sa dakbayan sa Naga ug sa probinsya sa Sugbo.
Apan anaa ra gyud sa korte ang pag-appreciate niining tanan ilabina sa ebidensya ug sa mga tawo nga angay gyung manubag.
Trabaho na usab sa Sandiganbayan ang pagsuta kun duna ba gyuy grand conspiracy.
Akong sublion nga kining pagka-palita resulta na kini sa sobrang kompyansa sa pagpangalagad sa lungsod og resulta kini sa pagmika.
* * *
Salamat nga naminaw ang konseho sa dakbayan sa Sugbo sa sentimento sa mga ginikanan nga nagsupak sa ordinansahon nga prisohon ug unom ka buwan ug pabayron og P5 mil ang mga ginikanan nga mobakos, mokurit ug ubang matang sa corporal punishment isip pagdisiplina sa mga anak.
Si Cebu City Councilor Lea Japson nga maoy proponent mipasalig nga ilang tun-an pagbalik ang kontrobersyal nga ordinansahon nga magmandu sa mga ginikanan pagpatuman lang og “positive and non-violent” nga paagi sa pagdisiplina sa mga bata.
Apan wa malikayi niadtong Sabado atul sa among programang “Dialogue on the Air” nga nakapadayag sa pagsupak ang mga ginikanan sa ordinansa ni Japson.
Apan sa hinapos nga bahin sa programa nakita nga daghang mga ahensya ang misuporta ni Japson pagpatuman sa “positive and non- violent form” sa pagdisiplina.
Alang nako di man gyud angayng silotan ang ginikanan nga igo rang nagdisiplina sa mga anak nga nagtan-aw sa kaugmaon.
Mas maayo gyud nga ang gobyerno mopahigayon og seminar sa mga ginikanan nga nagkuwang sa mga techniques pagdisiplina sa mga gasa sa Diyos.
* * *
Daghang interesado nga mokandidato sa pagka-kongresista sa Cebu City South District.
Gawas nila ni former congressman Tony Cuenco ug Cebu City Councilor Bebot Abellanosa nagpakita usab og interest sila si Renato Osmeña Jr. ug former Department of Transportation and Communications assistant secretary manlalaban Aristotle Batuhan.
Ambot lang kun interesado ba sab si magpapatigayon Jonathan Guardo.
Niadtong Sabado si Batuhan kinsa usa sa mga dinapit nga bisita sa general assembly sa federation sa Parents Teachers Community Association miprangka nga magpapili siya bahalag di makasakay og partido. Andam siyang mag-independente.
* * *
Maayo kay milugak karong bag-o ang taga-Department of Trade and Industry (DTI) bahin sa pagpatuman sa standard helmet.
Sugod karong adlawa i-libre na sa DTI ang processing fee nga tag P100 alang sa inspection sa helmet ug tag P1.25 alang sa sticker.
Si Director Asteria Caberte mitambag niadtong mga nakabayad na nga adto lang sa ilang rehiyonal nga buhatan kuhaon ang ilang nabayad aron dili maghugop sa provincial office sa DTI.
