Shadow boxing?
Kagahapong adlawa, duha ka inila nga babaye ang giingon nanumbag, usa artista, ang usa mayor. Mi-deny ang artista nga si Maricel Soriano nga gikulata niya ang iyang mga katabang apan dili maka-deny ang mayor sa dakbayan sa Davao nga si Sara Duterte nga iyang gidapog ang sheriff sa ilang lugar kay nakuha man kini sa media.
Natabi kining giingong gihimo ni Maricel kay mipasaka man og sumbong ang iyang duha ka mga katabang batok kaniya sa gikaingong iyang pagpanapat kanila. Hinuon walay live coverage sa giingong gihimo ni Maria. Apan bisan pa man niani silang duha milugwa sa balita kagabii.
Maingon tag shadow boxing kining ilang gihimo (kon pananglitan tinuod man gani kining sa bahin ni Maricel), kay klaro man kaayo nga dili makabawos ang ilang mga kontra.
Wala kita masayud sa mga domestic drama tali ni Ms Soriano ug sa iyang duha ka katabang. Apan daw nahulagway na sa TV ang tibuok scenario sa paghimo ni Mayor Duterte og punching bag sa ilang sheriff.
Nganong nahimo man kadto ni Mayor Duterte? Duna akoy upat ka butang nga masugyot.
Una, sapot. Ikaduha, ang kasagarang batasan sa naanad na sa gahum. Ikatulo, kasakit sa leader alang sa iyang mga sumusunod. Ikaupat, pogi points.
Dunay court order nga gipatuman ang sheriff sa RTC nga si Abe Andres ug kini mao ang pagdemolish sa 200 ka pinuy-anan didto sa ilang dakbayan. Mitawag si Duterte sa sheriff nga tagaan pa unta niyag lugway nga duha ka oras sa dili pa sugdan ang demolisyon. Wala pay duha ka oras mimando ang sheriff nga sugdan na ang pagpangguba. Ug tuod man nagkaguliyang. Bunal diri, bunal didto.
Gatuo si Duterte nga napabugnaw pa unta niya ang mga tawo kun naabtan pa niya ang pagsugod sa demolisyon. Duha ka oras ang iyang gipangayo kay didto pa man siya sa relief operation sa mga biktima sa baha. Ug nganong wa man sab makahatag ang sheriff sa mayor ning duha ka oras? Hinuon way katungod ang mayor nga mosugo sa sheriff kay sa lain man kining sanga sa gobyerno.
Gisapot si mayor kay gikan pa siya sa kapoy nga trabaho gisugat siya og gubot. Sayon ra kaayo niya ang pagpanapat sa sheriff kay daan na siyang naa sa gahum og gatuo siya ang mga dunay sayop angay silutan. Labi na kun ang iyang mga tawo, mga botante, maoy nasakit. Naanad na ang naa sa gahum nga bisan pa og supak sa balaod ang ilang himuon basta gatuo sila nga ika-ayo kini sa tanan. Makaingon tang pogi points kay di man gyud mahimo niyang kapugngan kining maon demilisyon. Unta gipangdaman niya kini sa wa pa moabot ang court order, sa wala pa ang baha nakahasol kaayo sa ilang dakbayan. Apan pinaagi sa iyang pagkulata sa sheriff, nahimo siyang Fernando Poe sa mga informal settlers.
