Kuwang gyud sa latigo si Joavan

Di na lang ko moawhag sa laing biktima sa pagpanghulga ni Joavan Fernandez niadtong Lunes sa buntag diha sa barangay Tabunok, Talisay City, nga mokiha ug modangop sa korte.

Kay nasayod nako sa sunod nga mahitabo ilabina nga trabahante ra sa City of Talisay Traffic Operations and Development Authority (CTTODA) ang biktima nga si Marlorence Monreal, 33, nga taga barangay Linao.

Sumaa gud, unsa may nahitabo sa mga tawo nga gipasakitan ni Joavan ug gipanghulga  sa lain-laing mga panghitabo? Pulos nangatras kay nagmangtas ang pagka-konsintidor ni Talisay City Mayor Socrates Fernandez.

Pwerte na gyud kaayo ang pagpangabuso  sa katungdanan ni Mayor Fernandez kay kadto lang sa kaso ni Raymond Paran, clubhouse attendant sa Vista Grande Subdivision nga gihulga usab ni Joavan, ila manggisawom hangtud nga miatras sa korte ug na-dismiss ang kaso   ni Joavan unya si Paran gipatrabaho na lang sa City Hall sa Talisay isip job-order employee sa Fishermen Sea Ecological Care kon Fiseca.

Daku sab kog pagtuo ni Monreal nga di gyud mokiha kay hadlok mawagtangan og trabaho. Apan di layo ang posiblidad nga kining maong traffic enforcer ibalhin og laing departamento ug hatagan og maayong sweldo ni Mayor Fernandez aron motak-om na lang sa hingpit.

Dili na makabasol si Joavan kanako nga napakyas ko pagmantala sa iyang tubag  kay iyang amahan di mokomentaryo ingon man ang  iyang abogado nga si George Bragat.

Si Joavan nga tig-text sa akong programa sa radyo sa dySS ilabina sa iyang mga pagpa-good image wa na gyud motubag sa iyang mobile phone makatulo ka  higayon nga among gitawgan.

Abi ba nako og tarong na ka, Joavan! Yabag man diay ka bisan unsaon!

Bisag pila pa siguro ka police general  ang mokuyog ni Joavan pag-offer sa seremonya sa Misa sa Simbahang Katoliko, apan di na gyud siya mausab.

* * *

Nabalaka ko nga makahatag ug dugang negatibong epekto sa duha ka mga nag-rival nga fraternity dinhi sa dakbayan sa Sugbo nga  mao ang Tau Gamma Phi ug Alpha Kappha Rho kon Akrho human gi-abswelto ni Regional Trial Court Judge Gilbert Moises si Ramon Ortiz Jr. ug laing kauban sa Tau Gamma sa kasong pagpusil patay kang Romulo Romero kinsa bise presidente sa Akrho Cebu Chapter niadtong Enero sa tuig 2004.

Maayo unta nga makadawat ang taga-Akrho sa hukom sa huwes human namatud-an sa mga husay nga insufficient kaayo ang mga ebidensiya.

Kagahapon,human nakalingkawas si Ramon Jr. nakahilak sa kalipay ang inahan nga kanhi ilado sa natad sa mga drama/teleserye sa lokal nga telebisyon nga  si Chit Ortiz.

Ang amahan usab nga si retired chief inspector Ramon Ortiz Sr. mipadayag og  mga pagmahay ngadto sa mga tawo nga  milambigit sa iyang anak.

Matud sa magtiayon nga nag-antos gyud sila og unom ka tuig sa pagkabalhug sa ilang anak nga nasakripisyo usab ang  pag-eskuwela.

In fairness sa korte, bisan ako nga  nakatayming atol sa pagpusil patay sa biktima ug sa laing kauban kaniadto diha sa may corner Sanciangko ug Leon Kilat duol sa University of Cebu wa ko  makabantay sa dagway sa namusil kay pagbuto-buto nasalipdan kami sa akong asawa sa PUJ ug medyo distansya.

Angako sang  asawa pwerteng lisanga sa pagkahitabo kay nagsakay ra mi og motor. Buot pa unta kong mopaduol apan iya  kong gibadlong nga magpalayo na lang ming duha.

Gani ako pang nakit-an si Romero nga bisag natumba na naningkamot nga makatapi pinaagi sa paghapak-hapak sa iyang dalang papel ngadto sa namusil.

* * *

Kagahapon nakadawat ko og text nga forwarded message nga gikan kuno sa San Pablo City Philippine National Police.

Ambot kun paukyab ba lang? O ba kaha mugna lang sa mga negosyante og pahumot ug sa atong mga telecommunication companies.

Ang text nagkanayon, “Gud am po, Concern lang, if ever may magtinda ng perfume at sasabihin na kahit utang huwag kukuha kasi if maamoy mo, mahihilo ka tapos kukunin ka nila. PLEASE pass to all your friends and relatives. Diskarte po yan ng mga kumukuha ng mga bata at mga dalaga at binata. Pls.
Disseminate.  From San Pablo City PNP. Don’t ignore PLEASE pass it now. Modus sa kidnaper!”

Akong gipangteksan atong mga kadagkuan sa kapulisan bahin sa maong mensahe kun unsa ka tinuod.

Si Cebu Provincial Police Director Senior Supt. Patrocinio Comendador nagkanayon nga, “D cguro lloyd oi.”

Si Cebu City Police Director Senior Supt. Ramon Melvin Buenafe miingon sa iyang reply nga, “Wala pa ta report ingon ana diri sa Cebu.”

Samtang si Chief Insp. Romeo Santander sa Intelligence sa Cebu City Police Office mitubag nga, “As far  as I know, kanang mamaligya og perfume sa gawas mga fake na siya sir. We still have to validate this info sir. But for sure its far from the reality”.

In fairness sab gyud hinuon, dunay mga tawo nga way lingaw  nga gusto lang gyud nga mabalaka ang uban nga mapasahan sa  mensahe ilabina karon nga barato na ang text ug dunay daghang mga promo karon nga unlimited text.

Hinuon mas maayong subayon kini sa atong  kapulisan kay simbako og tinuod kini unya daghan ang mabiktima.