Maayo kay nangunay na si P-Noy sa Tacloban
Nakapaminaw ko kagahapon sa tipik ug kabahin sa nationwide nga interview nila ni Sir Mike Enriguez ug Sir Joel Reyes Zobel sa Super Radyo GMA ngadto kang Tacloban Mayor Alfred Romualdez.
Sa maong interview, tabla ra nga nanghagit si Mayor Romualdez kang Presidente Benigno Aquino III nga deretsohon na lang siya pagtangtang nga dili na mag-agi og due process.
Akong tan-aw, nidako sab ang ulo ug nilapad ang atay sa mayor nga nalabhan ang Presidente sa international community.
Kun wa sab ni mamolitika si Romualdez dili kini maoy tuno sa nagpakitabang ug isip biktima sa kalamidad. Bisag gipangdukol na sa Ginoo, naglumba gihapon sa pamolitika. Pastilan! Paubos tawon mo uy ug hinay-hinay lang!
Wa koy gilabanan nilang duha. Pero nganong moabot man sa punto nga dunay imbestigahon nga kun buot hunahunaon parehas man silang mga inutil kay gipakagamay ra man gud nila ang warning sa weather bureau bahin sa “storm surge” kon dagkung mga bawod nga mohapak sa kabaybayonan mugna sa bagyo.
Si Director Oscar Tabada sa Philippines Atmospheric Geophysical and Astronomical Services Administration Mactan mipasabot nga wa gyud sila magkuwang sa mga pahimangno ug pagpasabot sa publiko sa epekto sa storm surge.
Miingon ang opisyal nga bisan way bagyo, posible nga dunay storm surge ilabina kun dunay kusog nga unos.
Mao lagi ni kun dili maigo, dili ta maleksiyon ug di magbinasolay.
Akong sublion nga di lang palpak ni Mayor Romualdez ang kapakyas sa pagpabakwit sa mga biktima kun dili paltos sab kini sa Malacañang ilabina kang Local Government Secretary Manuel Roxas II kinsa nangunay og supervise sa Tacloban sa wa pa si Yolanda.
Miingon si Romualdez nga gidayeg pa siya ni Roxas sa ilang mga pagpangandam.
Apan diay kuwangan kaayo hinungdan nga daghang patay. Sa report sa Office of the Civil Defense sa Eastern Visayas miabot og dul-an 4,000 ang patay samtang 17,000 kapin ang missing.
Wa gyuy maayong laki sa storm surge kay ang ubang survivors misugilon nga kun wa sila makakapyot sa pinakataas nga bahin sa lubi apil sila og kamatay.
Patay man gani ang lima ka mga sakop sa Bureau of Fire Protection sa Tacloban nga pulos nakaagi og mga ngilngig nga training sa survival ingon man mga pulis ug mga sundalo. Mga sibilyan pa kaha ilabina mga bata?
Maglaum ko nga niining presensiya ni P-Noy sa Tacloban wa nay mahitabong kinawatay, matul-id ang distribution sa mga relief goods, mapadali ang paghipos sa mga minatay ug mabalik ang kuryente, tubig ug negosyo aron balik sa normal ang pagpuyo sa katawhan.
* * *
Wa ko makasabot sa mga kadagkoan sa Department of Social Welfare and Development in Central Visayas kon DSWD-7 nga nagpatuman og media ban sa mga evacuation centers dinhi sa dakbayan sa Sugbo nga maoy temporaryong gipapuy-an sa mga namakwit gikan sa Tacloban.
Kinsa man tawon ning desisyon? Kang DSWD Secretary Dinky Soliman nga otro sang palpak sa pagpangandam sa Tacloban sa wa pa si bagyong “Yolanda” apil nilang Secretary Roxas ug Mayor Romualdez?
Gituyo pag-ban sa taga-DSWD ang media aron dili mabisto ang kuwestiyonableng repacking sa mga relief goods gikan sa Indonesia?
O ba kaha nahadlok ang taga-DSWD nga dunay mga evacuees nga motug-an sa lisud nilang kahimtang ubos sa ilang pagdumala?
Akong nahibaw-an nga ultimo diay ang kapitan diha sa Cogon Ramos nga kaalyado ni Mayor Michael Rama dili tugotan sa taga-DSWD nga makasulod sa ilang gym. Unsa man kining kalakiha sa taga DSWD-7? Nagpagawong na sa demonyo sa politika? Dili ra ba Liberal Party sila si Mike!
Si DSWD-7 Officer Grace Yana nga maoy over-all coordinator sa mga evacuation centers nga akong na-interview niadtong Lunes sa gabii mipasabot nga na-ingon ani ang sistema kay dunay ubang mga evacuees nga dili ganahan moatubang sa camera ug sa mga sakop sa media.
Akong gipasabot si Yana sa among papel ug may respeto kaming mga sakop sa media niadtong dili gusto nga magpakuha og video apan daghan pa diha nga gustong moatubang sa media aron makapanawagan sa ilang mga kabanay.
Mipasalig si Yana human sa akong interview nga wa nay media ban ug iyang ipatangtang ang paskin nga gipatapot sa gawas sa Cogon Sports Complex nga nagpahibawo nga “No Media Allowed” ug “No Picture Taking Allowed.”
Pastilan ning atong mga amiga sa DSWD. Kun di panglabhan dili magmigkaw!
Akong sublion nga di sa ingon nga nagpataas mi sa among ihi tungod sa mikropono ug camera. Nagbaton lang sab mi sa among katungdanan sa pagpangalagad ngadto sa mga survivors.
Manghinaut ko nga maghiusa ang media, DSWD ug katawhan pagtabang nga makabangon pagbalik ang mga biktima niining sunod-sunod nga kalamidad.
