Upat-upat lang

O Dagat! Pagkanindot mong tan-awon, pagkalisud mong tugkaron. Muhatag ka og kinabuhi apan kamao ka usab mobawi.

Tungod ba sa ilang pagsabot sa pagkadi matag-an nga kinaiya sa dagat mao nga silang mga mangingisda maoy gibarkada ni Kristo? Nganong ihulagway man usahay si Kristo nga isda? Ug sa iyang mga milagro dihay milakaw siya sa dagat ug diha say gipa-daghan niya ang isda para makakaon ang tanan nga nanambong sa usa ka panagtigom.

Nakahibawo na tingali kamo kabahin sa bag-ong aksidente sa dagat nga naglambigit na usab sa Sulpicio Lines. May pipila ka dosena na usab ka kinabuhi ang nakalas ug dul-an sa 200 ang wa pa makit-i.

Giusab na sa Sulpicio Lines ang ilang pangan.

Narehistro na sila karon isip Philippine Span Asia Carrier Corporation (PSACC). Matud pas ilang presidente (nga sakop ra usab sa pamilya nga GO nga maoy nanag-iya ning maong kompaniya) nga ang pag-usab sa ngan sa ilang shipping line may kalabutan sa ilang desisyon nga dili na sila mamasahero o mag-passenger shipping ug mo-concentrate na lang sila sa pagbiyahe og kargamento (cargo). Apan daw gi-sunod man sa dimalas ang maong kompaniya sa barko.

Giingon nga under investigation pa ang panagbangga sa MV Sulpicio Express Siete (sa PSACC) ug sa MV Saint Thomas Aquinas (sa 2GO nga shipping line). Apan dunay mga panahum nga ang barko sa PSACC maoy gibanggaan. Pero hinuon under investigation pa lagi kini.

Apan dili mahibung kun daghan ang mopakasa sa kanhi Sulpicio nga kompaniya. Kay sa 40 nila ka tuig nga panerbisyo sa kadagatan, ka 45 na sila ma disgrasya. Lakip ning maong mga aksidente mao ang pagkalunod sa MV Dońa Paz niadtong tuig 1987 diin dunay 4,000 ang patay.

Nianing bag-ong disgrasya, nga nahitabo sa dagat sa dakbayan sa Talisay, daghang mga mangingisda ang nakasaksi. Ug sa nabasahan ko sa gisulat sa akong higala nga si Januar Yap, usa kanila mao ang 38 anyos nga Noe Lastimada.

Suma sa akong nabasahan mibugsay si Noe paingon sa mga nanglangoy nga pasahero ug mikarga siyag upat nga iyang gihatud sa baybayon. Daghan untang nangumpayot sa iyang katig apan iyang gi-hangyo pagbuhi kay basig ma-unlod unya hinuon ang iyang sakayan. Iyang gibalikan ang uban pero wala na diha ang iyang gi-saarang balikon. Lain na usab nga mga tawo ang nanglangoy paingon sa iyang sakayan. Ug sama sa gihapon, gihangyo niya nga pabuhian ang katig ug misaad na usab siya nga upat ray iyang madala. Hinuon ning ikaduhang pagbalik diha na ang barko sa Coast Guard ug didto na lang niya gihatud ang mga misakay sa iyang sakayan.

Gibalikan usab ni Noe ang iyang pukot nga iyang gibiyaan sa lawd ug giuli sa ila dayon na usab niyag balik sa nahitaboan. Gipasakay niya ang uban pang nang langoy—tingali upat-upat gihapon—ug gihatod sa mga barko sa Coast Guard.

Kun palandungan mo kining gihimo ni Noe nga mitabang sa way pagduha-duha sa mga nagkalisud sa dagat maka-ingon ka nga maayo mangitag kabarkada si Kristo; Gipili niya kadtong mga dagkog kasing-kasing.

“Noe’s Ark” ang gi-title ni Januar sa iyang blow by blow account sa pagtabang ni Noe sa mga nanglangoy nga pasahero.