Piskal Ipong-Avila, kasohan og obstruction of justice

Sa 14 ka pahina nga sworn statement sa 21-anyos nga biktima sa “gang rape,” nasaysay gyud og tarong sa biktima ang pagdupadupa ni Asst. Regional State Prosecutor Llena Ipong-Avila kang code named Billy nga ang tinuod nga pangan Romelo Pabroa.

Ang biktima nagpasabot nga dihang mi-insister siya nga mogawas sa “safe house” sa Banawa, Guadalupe aron ikihag rape si Pabroa nihimog mga lakang sila si Ipong-Avila nga dili gyud siya pagawson.

Mitanyag si Ipong-Avila ngadto sa biktima nga dili putlon iyang pag-avail sa programa hangtud makahuman pagtungha sa kolehiyo aron taas na og pagtan-aw kaniya ang mga tawo nga nagpalibot ug aron makatabang sa iyang mga ginikanan nga tiguwang na ug pobre sab kaayo.

Laing butang gitinguha nila ni Ipong-Avila nga kasamtangang paeskuwelahon siya sa Alternative Learning System kon ALS aron makalimot sa iyang mga bangungot sa Department of Justice (DOJ) witness protection program human matud pa nalugos sa iyang mismong bantay nga marshal nga si Pabroa.

Apan wa gyud magsilbe ang gihimong pagpanglingla nila ni Ipong-Avila sa 21-anyos kay mi-insister gyud nga mogawas sa programa aron pag-angkon og hustisya ug depende na kini sa pamilya kun daginoton nila pag-kiha si Ipong-Avila ug piskal Graeme June Elmido.

Tipik sa depensa nilang Ipong-Avila mao nga “buang” ang biktima unya ilang gipa-eksamen og doctor sa behavioral sciences sa Vicente Sotto sa wa pa nila tugti nga makagawas sa hingpit.

Ako gyung barugan nga wa gyuy diperensiya sa pangutok ang biktima kay ako siyang personal nga na-istorya ug wa gyud intawn molikoy.

Nakahinumdum ko sa importante kaayong punto ni psychologist Emmanuel “Tata” Hernani niadtong Sabado sa among programang “Dialogue on the Air” sa dySS Super Radyo, nga usa sa makapahiuli sa maayong panghunahuna sa mga biktima gikan sa trauma sa pagpanglugos mao nga kun mapasaka na ang kaso sa piskaliya o sa korte.

Alang sa psychologist, ikalipay na kaayo sa mga biktima ang pagpasaka og kaso.

Wa gyud masipyat ang psychologist kay dihang nagpakita ko sa 21-anyos nga biktima niadtong Lunes sa hapon sa cubicle ni Asst. City Prosecutor Anna Lou Fernandez Cavada nakita nako ang iyang panagway nga nagmaya ug nagmalipayon na sukwahi sa among pag-istoryahanay didto sa Guadalupe Police Station nga Biyernes Santo kaayo og dagway uban sa mga ginikanan.

Gani, dihang nakapabor ko og pangutana sa iyang gibati didto sa piskaliya, dali siyang miingon nga “nalipay nako nga na-file na ang kaso, Sir.”

Bisan ang iyang mga ginikanan mipadayag kanako nga natagbaw na sila karon nga nakiha na si Pabroa.

Ang amahan nga akong gipangutana kung mosugot pa ba siya nga ibalik iyang anak sa “safe house” sa DOJ kay andam pang modawat si State Prosecutor Graeme June Elmido, miprangka nga wa na gyud silay salig sa gobyerno human gi-unay iyang anak og lugos sa marshal unya gi-duphan pa nila ni Asst. Regional State Prosecutor Ipong Avila.

In fairness sa kinatibuk-ang gobyerno, dili tanan ang di na gyud kasaligan kay duna pay daghang masaligan.

Samtang ubos kining maong kaso sa preliminary investigation sa Cebu City Prosecutor’s Office dako ko og salig nila ni City Prosecutor Nicolas Sellon nga maresolbar kini sa way pagpanig taliwa nga ang suspetsado ilang kaalyado sa DOJ.

Unya na ko moingon nga way salig sa DOJ kun ang kinatibuk-ang liderato ni Secretary Leila De Lima momando sa pagpa-dismiss sa kaso og babagan gyud ang pagtaral ni Pabroa ngadto sa korte.

Akong sublion nga responsibilidad sa mga nangalagad sa gobyerno nga mahatagan gyud og hustisya ang mga biktima ug katungdanan usab nila ang pagprotehir sa mga biktima ug dili pagdupa sa mga manyakis.

* * *

Dili gyud maayong sudlan ang komplikadong relasyon nga magsakripisyo sa kinabuhi sa uban.

Sa pinakabag-ong krimen nga nahitabo didto sa Lilo-an niadtong Lunes sa kadlawn, laing mensahe kadto sa gugmang way padulngan.

Apan naglibog ko sa uban kay taliwa sa mga daghang panghitabo nga krimen nga naglambigit og love triangle, duna pay mikopya niini.

Sa Lilo-an incident, unsa may naa sa taxi driver nga maoy nakalangkat sa gugma sa babaye gikan sa laing nilalang nga medyo tubig-tubigan?

Naigo kini sa sikat nga kanta nga “Kinsa Siya” nga ang tipik sa linya sa kanta nga: “Kinsa siya? Ngano, nganong nagbudhi ka? Kinsa siya nga labaw pa kanako? Unsay anaa kaniya nga wala ako.” Pait, no!

Mao nga di na lang gyud ko magpakasala sa paghigugma ug lain, hehehehe, kay dili diay lalim ang gugma kay moresulta sa katapusang dayon. Inay malipay diha sa gugma, ikaguol na hinuon sa mga apektado.