Dili gyud tawon buang ang biktima sa rape!

Misamot ang akong kaluoy sa biktima sa “gang rape” nga midangop sa among sibyaanan sa dySS Super Radyo uban sa iyang mga ginikanan kay positibo gyud ang iyang alegasyon batok sa mga opisyales sa Department of Justice (DOJ) Witness Protection Program nga puwerteng nakadepensa sa ilang marshal nga milugos kaniya.

Akong nasabtan sa akong pakighinabi nila ni State Prosecutors Llena Ipong-Avila ug Graeme June Emido nga maoy nagdala sa programa dinhi sa Sugbo nga dili gyud sila makatuo sa alegasyon sa 21 anyos.

Tungod kay alang kanila buotan si Code Name Billy. Ang nakaporke pa gyud kay ilang gipadaku ang punto nga “buang” ang biktima ug dili maayo ang kadungganan ug maoy mag-una-una sa lalaki.

Nakasabot na ko sa gihimo ni Ipong-Avila sa iyang pagtapok sa mga hand-written testimony sa mga kauban sa biktima sa safe house sa Banawa nga nagdaot sa pagkatawo sa reklamante kay kini maoy sumpay sa ilang pagdepensa ug pag-cover-up ni Billy ug pagtabang mismo sa ilang kaugalingon panahon nga dunay imbestigasyon ang mga kadagkoan sa DOJ Manila.

Usa sa mga testimoniya, nga magdrama og kirig-kirig ug patuskig-tuskig ang biktima aron gakson ug tabangon sa mga guwapo nga mga marshal. Akong tan-aw dili gyud drama kay ang biktima miingon kanako nga motuskig siya og kalit sa panahon nga magdamgo siya sa pag-gang rape sa walo ug mahadlok gyud siya sa mga lalaki sukad nga siya nalugos.

Akong tan-aw nga kining sitwasyon sa biktima resulta kini sa iyang  traumatic experience kay dili lalim ang iyang naagian.

Sa punto nga “buang” ang biktima nga maoy gipasabot sa mga kadagkoan sa witness protection program nga maoy hinungdan nga ilang gipamintal,  with all due respect dli gyud intawon siya buang.

Makaila ko sa tawo nga may diperensiya kay simang kaayo ug tinubagan. Apan sa kaso sa 21 anyos  nga akong na-interview sa akong programa sa radyo ug sa on-cam sa among “Balitang Bisdak” nasimba nako nga straight forward ang iyang testimoniya unya coherent ug logical kaayo nga motubag sa akong mga pangutana.

Miingon si Ipong-Avila nga kun duna pa silay gitagoan dili unta nila pagawson sa safe house ang reklamante.

Pero mao lagi, diha na nila gipagawas, dihang nakaandam na sila sa idepensa sama sa pagpahiling sa biktima sa psychiatric ward sa Vicente Sotto Memorial Medical Center ug ang pagkuha daan sa mga tetimoniya sa kauban sa safe house nga pabor ni Billy.

In fairness sa mga kauban sa biktima nga ubos sa programa, motuman gyud kun unsay mando nila ni Ipong-Avila kay sila under custody pa man.

Maglaum ko nga imbestigahon ni Secretary Leila De Lima ug silotan si Billy ug kadtong ang mga opisyales nga mi-cover-up sa hitabo.

Manghinaut  ko nga suportahan ug tabangan kining biktima sa pundok sa kababayenan sama sa Crusade Against Violence ug sa Provincial Women’s Commission.

Kun gipaubos na sa preventive suspension si Billy, mas maayong apilon sab ang duha ka mga state prosecutor’s nga pakyas pagprotehir sa ilang testigo.

Laing butang nga moingon ko nga puwerteng nakadepensa nilang Ipong-Avila kang Billy tungod kay wa gyud nila ihatag sa mga sakop sa media ang tibuuk pangalan ug wa gyud nila  ipresentar aron unta maoy mangunay ug tubag sa pasangil.

Dili ba kini unfair sa 17 ka mga marshal nga kauban ni code name Billy kay silang tanan pagkakaron puwedeng pang-akusahan sa publiko nga maoy alyas Billy sa panahon nga mo-escort sa korte sa mga testigo?

Akong paabuton nga  matinuod ang pasalig sa duha ka mga opisyal nga dili gyud maka-eskapo si Billy ug andam  nga moatubang sa bisan unsang kaso.

Miingon si Elmido kanako nga  nanghimakak sa pasangil si Billy. Way kawatan nga moangkon.

Kun tarong pa si Billy dili siya maka-ako sa pagpahimulos ngadto sa biktima. Gani angay pa unta niyang alalayan ngan nga nagtahirig na pag-ayo ang kinabuhi human gi-among-amongan sa iya rang paryente sa dakbayan sa Lapu-Lapu ug nabiktima pa gyud sa gang-rape sa walo ka mga lalaki nga mibinaboy kaniya.

* * *

Salamat nga mi-champion gyud tawon mi kagahapon sa buntag sa among tournament sa Newsmen Basketball Association of Cebu (NBAC) diha sa Cebu Eastern College (CEC) batok sa combined team sa Cebu Daily News (CDN) ug sa The Freeman (TF).

Kung wa ko masayop kini maoy ikalima na ka higayon namo sa GMA-7/dySS paglangkat sa kampiyonato sa NBAC nga way putol sukad namugna ang NBAC.

Kami man tuod ang nakalangkat sa finals apan among angkonon nga di gyud basta-basta ang among nakontra  nga maoy na-second karon nga mao ang CDN/TF.

Nakuha ang ikatulong ganti sa CCTN-47.

Sa ngan sa kinatibuk-ang mga sakop sa NBAC akong pasalamatan sila si Sir Chester Cokaliong sa Cokaliong Shipping Lines, ingon man sila si Sir Jeff Go ug Sir Sammy Sia  nga mga Executive Board sa CEC ug ni Sir John Maraat ang property custodian sa CEC nga mga buotan kaayo ug way putol sa pagsuporta  sa NBAC.

Salamat sab kaayo ni sir Bobby Inoferio among commissioner ug ilabina kang Sir Elias Baquero federation president sa mga beat reporters ug sa mga referee nga gipangolohan ni Sir Rey Cañete.