Dunay mga Koryana nga mga CSW?

Naalarma sila  si Department of Tourism in Central Visayas (DOT-7) Regional Director Rowena Montecillo ug ang uban namong mga  bisita  sa programang “Dialogue on the Air” sa dySS Super Radyo niadtong Sabado nga dunay mga Koryana nga mo-offer og sex bugti sa kantidad nga P2,500.00 ngadto sa P3,000.00 dinhi sa Siudad.

Ang kapolisan pinaagi  nila  ni Senior Insp. Ranulfo Espina, chief, Tourist Police Unit sa Cebu City Police Office ug Senior Insp. Maria Theresa Macatangay, chief, Regional Anti-Human Trafficking Task Force sa Police Regional Office in Central Visayas mosusi niining maong  istorya.

Nagtuo sila  nga kun  tinuod  man  kini, posibleng gidala  kining mga bayhana  sa mga sindikato gikan sa South Korea aron maka-operate dinhi sa Sugbo isip mga commercial sex workers.

Mao ni ang kuyaw kun tinuod man kay way taga-Cebu City Health ang nag-monitor niini nga  mo-conduct  og proper hygiene.

Si DOT-7 Director Montecillo nga di motuo nga ang Central Visayas maoy nag-una  karon  nga sex tour destination seryosong miapelar ngadto kang Cebu City Mayor Michael Rama nga gub-on ug bungkagon ang mga prostitution den diha sa barangay Kamagayan nga pirmeng starring sa mga balita.

Maglaum ko nga matutokan gyud pag-ayo sa mga frontline natong mga ahensiya sa gobyerno ang presensiya sa mga Korean nationals dinhi sa nasud kay daghan nata og mga negatibong reports bahin nila.

Dunay mga nalambigit sa carnapping ug kidnapping syndicate gawas sa mga illegal nga negosyo.

* * *

Dunay makapaluya kaayong sugilon sa kawsa sa gobyerno batok niining mga opisyales sa kagamhanan nga gipangtaral sa kasong  malversation of public funds ubos sa Article 217 sa atong Revised Penal Code (RPC) nga mas nailhan nato kining pagpangdispalko sa kuwarta  sa katawhan.

Makapadismaya  tungod  kay inay silotan og dako, igo rang  gipamulta og P1,000 sa korte ang sinumbong nga opisyal sa Land Transportation Office.

Akong gipasabot dinhi ang resulta sa kaso niadtong cashier III sa Land Transportation Office in Central Visayas Cebu City District nga si Luciana Dicdican nga unang gikataho nga nakadispalko og P701,000  base sa  audit niadtong  June 4, 2009.

Base sa tqo-page decision ni Judge Simeon Dumdum,  nagpasabot  nga dihang gi-arraign si Dicdican gipaangkon kini sa iyang abogado nga si  Richard Bauzon aron mogamay ang sentensiya.

Tinuod, pribileheyo kini sa akusado nga maka-plea bargain to a lesser offense ug pagpa-down grade sa kaso hinungdan nga  igo  ra  kining  gibasahan sa  kasong kalapasan sa Article 218 sa RPC  nga “failure of an accountable officer to render accounts” gikan sa malversation of public funds.”

Ang nakaparat kay  ang “Resident Ombudsman Prosecutor” sa Regional Trial Court Branch 7 nga si Jerry Patcho  wa  mo-object sa sentensiya nga igo rang pabayron og P1,000 si Dicdican.

Subo sab kaayong palandungon kay kini  si Bauzon  kanhi  kawani sa Ombudsman nga ang akong pagtuo kuyog pa sa kawsa sa anti-graft office  batok niining mga  nakadispalko  sa gobyerno.

Wa kaha magsabot-sabot sila si Bauzon ug Patcho aron himoong kiko ang anti-graft office?

Kining hitaboa puwede baya  kining kopyahon niadtong mga kurakot  nga gipangkiha og malversation of public funds nga nakadispalko og minilyon  ka pesos.

Kun mao ning kalakiha, daghan pang  mga opisyales  sa gobyerno ang mangdispalko.

Ambot kun seryoso ba ug competent ba ang ingon aning klase nga  Ombudsman Prosecutor?

* * *

Dakung leksiyon sa tanang nagdala og managerial positions ang  nahitabong pagpusil-patay sa Toledo City Jail Warden nga si Insp. Anacleto Dusaran niadtong Biyernes.

Ambot kung giunsa pagdala sa warden iyang tawo nga si Jail Officer 3 Donald Isidore Ramas nga misangpot sa pagpamusil ngadto sa warden.

Ang istorya nga  nanggawas mao nga si Ramas napungot dihang gipakapinan pa og  kasaba sa warden  nga  manghud  niya ug edad bisag gibalibaran na sa application for leave of absence alang sa iyang  schooling.

Kun gipasabot lang siguro og tarong ug dunay respeto sa mga magulang og edad di tingali  mahitabo kadto.

Di sa ingon nga akong gilabanan ang jail officer kay otro sab kining  init ra kaayo. Angay sab siyang itaral  ug taktakon sa serbisyo kay kuyaw sab  ning  klaseha  sa mga tawo nga putong kaayo.

Si Chief Insp. Michael Bastes, hepe sa Toledo City Police Office mitug-an nga  karong adlawa  nila  ipa-inquest  sa piskaliya  si JO3 Ramas kinsa nagmakuli gyud sa pagkomentaryo sa nahitabo gawas sa pagpadayag og  mga pagmahay.

* * *

Congratulations sa akong mga teammates sa GMA-7/dySS sa among paglampos kagahapon pagpilde sa team sa CCTN-47  sa semi-finals diha sa Cebu Coliseum sa padayong torneyo sa Newsmen Basketball Association (NBAC) nga maoy hinungdan nga nagpaabot  na lang kami alang sa  championship.

Karong umaabot  Domingo mag “do or die”  ang team sa Cebu Daily News/The Freeman versus Sun.star/Bombo human milampos ang Sun.star/Bombo pagpukan sa CDN/The Freeman kagahapon.

Buot  ipasabot  kun kinsa  man ang modaug niining duha ka team  karong Domingo maoy makigtigi  kanamo alang sa best-of-three nga championship.

Again magpasalamat na sab ko sa mga buotang tawo nga maoy nagpaluyo niining among liga nga sila si Sir Chester Cokaliong sa Cokaliong Shipping Lines, Sir Jef Go, Sir Sammy Sia, Sir John Maraat mga tagdumala sa Cebu Eastern College, Sir Elias Baquero sa Cebu Federation of Beat Journalists, NBAC Commissioner  Sir Bobby Inoferio, ug ang pundok sa mga referee nga gidumala  ni Sir Rey Canete.

Daghan gyud kaayong salamat ninyong tanan sa way putol nga suporta sa NBAC.