Pagkadimalas sa mga tinugyanan sa balaod

Unsa man gyud ang motibo sa pagpusil-patay kang PO2 Gerlito Estremos niadtong sayong kadlawon sa Sabado duol sa Sun.star Daily?

Ang nakaporke kay naglisod og establisar ang kapolisan kun kinsay mga responsable sa pagpatay kang PO2 Estremos.

Haskang paita gyud sa kahimtang sa pamilya ning maong pulis! Duna siyay unom ka mga anak diin 12 anyos ang kinamaguwangan unya 2 anyos ang  kinamanghoran.

Sa autopsy nasuta pa gyud nga kan-on og noodles ra gyud ang gipanihapon sa pulis sa wa pa siya  mapatay og gikompirmar kini sa asawa unya naputlan pa gyud og linya sa koryente iyang panimay sa Sandayong Guadalupe.

Si PO2 Estremos naglisod intawon sa panginabuhi unya wa siya makadawat sa iyang midyear bonus kay under suspension siya tungod niadtong kuwestiyonableng pagdakop sa nangawat og kandeng didto sa lungsod sa Alcoy.

Dunay mga istorya nga nanggawas nga si PO2 Estremos nag-inusara nga mihimog follow-upoperations niadtong Sabado sa kadlawon  aron makuha  og balik ang iyang helmet  nga nakawat.

Unya  gituhoan nga dihang nagsige kini og roving nakatayming kini nga dunay nag-angkasay og motor  nga way helmet unya iyang gikalalis dayon sinumbagay hangtud nga gidukdok pa sa ulo ang pulis nga nakasibilyan hangtud nga gipusil-patay.

Gani gidudahan pa nga mismo ang service fire-arms sa pulis maoy giilog og maoy gigamit sa pagpusil kaniya. Pagkasakit paminawon!

Apan in fairness sa napatay nga pulis di na kita makadungog sa iyang version kay patay na man.

Kun tinuod man nga nailogan sa armas ang pulis dunay katarungan kay  duha kabuok ang kontra unya  nahibaw-an nga gamayon  si Estremos.

Wa gyuy suwerte ning  batch  nilang  Estremos nga “BIGKIS”  kay ang classmate sab niini nga si PO2 Noriel Luage napatay sab sa operations batok sa gituhoang  druglord diha sa barangay Zapatera.

Samtang wa sab ko malipay sa ka-lousy sa mga tinugyanan sa Crime Scene Investigation (CSI) kay dugay kaayong nakaresponde ug matud pa milanat og sobra duha ka oras una sila nakaabot sa crime scene.

Matud pa, daw sama nga napasagdan si PO2 Estremos nga naglunang sa tubig-uwan ug sa iyang kaugalingong  dugo niadtong tungora.

Pagkapaita gyud kay ilang kaubang pulis ang biktima sa krimen unya gilangay-langay pa pagresponde! Unsang klaseng kauban? Kun langay kaayong nakaresponde sa ilang kauban unsa kaha kun pobre ug wa mailhi ang biktima?

* * *

Kun tinuod man  nga dunay “General” nga gikalalis ni traffic enforcer Armando Daligdig sa wa pa gipatay mas maayong subayon sab kun wa ba  gamita sa “General” si dismissed PO3 Geoffrey Borinaga pagpatay kang City Traffic Operations Management personnel Daligdig.

Posible nga si Borinaga maoy mipalit  sa away sa “General” ug kang Daligdig ug nakiglalis sab kini hangtud nga iyang  gi-execute ang plano  sa pagpatay sa estrikto nga traffic enforcer nga igo rang nagtuman sa balaod.

Konbinsido ko nga 100 percent nga si Borinaga maoy nitira kang  Daligdig kay gawas sa mga testigo sa kapolisan dunay kawani sa korte nga nakakita sa krimen og mitumbok gyud kang Borinaga nga maoy responsable bisag unsaon pagbali-bali ang  dagway sa natangtang nga pulis.

Ang depensa ni Borinaga nga alibi ug general denial dili makapatuis sa positive identification sa mga eye-witnesses.

Ang kawani sa korte nga mihangyo nga di lang magpaila, akong gihangyo nga motestigo gyud aron makatabang.

Hinuon makasabot ko nga medyo alanganin ang court personnel pag-testify kay nasayod siya  kun unsa  kahasol ug unsa karisgo ang mamahimong testigo sa krimen.

* * *

Gipahibawo ni Director Oscar Tabada sa Philippine Atmospheric, Geophysical and Astronomical Services Administration (Pagasa) Visayas nga way tsansa nga mo-land fall ang tropical depression nga si “Dante” pero mas makapabalaka kini kay mas mokusog ang hanging habagat ug magdala kini og daghang tubig ulan.

Matud ni Tabada nga ning kasamtangang buwan, dunay duha ngadto sa tulo ka mga bagyo ang moabot pero mas daghang bagyo ang moigo sa buwan sa Hulyo ug Agosto nga dunay tag-pito ngadto sa tag-walo ka bagyo.

Gibutyag usab  ni Director Tabada nga duna nay pagtuon sulod sa 50 ka tuig nga mas daghan og ulan sa buwan sa Setyembre ikomparar sa Hunyo dinhi sa Central Visayas.

Buot ipasabot nga niining data sa Pagasa kinahanglang supakon gyud nga ibalhin ang school opening ngadto sa Setyembre kay mas  daghan og ulan ug bagyo sa Setyembre ikomparar sa Hunyo.

Nagpasidaan ang taga Department of Education ug taga Office of the Civil Defense ngadto sa mga ginikanan nga di na lang gyud pa-eskuwelahon ang mga bata kun peligro na ilabina kun magbunok pag-ayo ang ulan.

* * *

Nahurot na gyud akong bilib sa mga kadagkoan sa Cebu Eastern College nila ni Sir Jefferson Go, Sir  Sammy Sia ug Sir John Maraat kay grabe kaayo ang ilang gipakitang suporta namong mga  sakop sa media sa Newsmen Basketball Association (NBAC) kay sila maoy nagpahimutang namo nga adto makadula sa New Cebu Coliseum kagahapon sa buntag.

Again, salamat kaayo ninyo sir Jeff. Dako na kaayo og ikatabang kining inyong gihimo kanamo aron masibot ug maingganyo kaming mga tigbalita sa pagpahigayon og paugnat sa kusog aron makalikay sa mga bisyo ug ubang abuso sa lawas.

Kagahapon nga duwa sa 1st game, kami sa GMA-7/dySS maoy midaug batok sa ABS-CBN. Samtang sa 2nd game midaug usab ang combined team sa Cebu Daily News ug sa The Freeman batok sa hiniusang puwersa  sa Sunstar Daily ug dyMF Bombo Radyo.