Imposible kun way bugti ang pasaylo ni Atan

Taliwa  nga gipanghimikak nila ni Congressman Tomas Osmeña ug sa negosyante nga si Jonathan “Atan”  Guardo,  ako nagtoo nga ang public apology  ni Atan sinugdanan sa iyang  pagsud sa Bando Osmeña Pundok Kauswagan kon BOPK.

Nagpasabot lang nga gitolon sa negosyante ang iyang garbo kay bisan sa iyang  pagka-kuwartahan pilde man gyud  siya sa kongresista.

Nakamao sab si Guardo kay kun di siya  mosud sa BOPK wa gyuy paglaum ang iyang political career.

Imposible lagi kaayo nga way bugti ang pagpangayog  pasaylo ni Guardo  kinsa  misakripisyo  sa  iyang garbo isip gi-ilang daku-daku sa oposisyon kaniadtu.

Makigpustahanay ko kun way mahitabong alliance sa umaabot  nga  pili-ay  karong tuig 2013  tali nilang  Guardo ug Osmeña.

Akong basa  niini, mora’g  gi-usikan na si Guardo nga mogasto ug daku sa  duwa  sa pulitka nga way kapa-ingnan.

Kinsa guy dili mo-grab sa opportunity. Naay sayon, adto gyud sa lisud?

* * *

Ambot kun tinuud  ba gyud ang gisulti sa akong  amigo nga nagpa-retoki na  sa dagway ug nagpa-putol na sa  iyang buhok  si  Bella Ruby Santos.

Nahibaw-an  sab niya nga atua sa Manila si Bella ug di  tinuud nga atua karon sa Zamboanga.

Dili makompirmar kini’ng  impormasyon kun dili motahan bolontaryo si Bella  o ba kaha kun di siya madakpan.

Sukad nga nahimong fugitive si Bella  daghan kaayo’g  mga hungihong ug mga kasayuran nga way kamatuoran.

Alang  lagi nako  mas  maayong motahan si Bella ug atubangon niya ang kaso aron maklaro ang tanan.

Pero kun magpabilin siya’ng idlas magduda ko nga may kalambigitan siya  sa  kasong  pagdagit ug  pagpatay sa bata nga si Ellah Joy  Pique.

* * *

Padayon karong gi-obserbahan sa mga kadagkuan sa Department  of Social Welfare and Development (DSWD-7) ang 15 ka mga babayeng batan-on  gikan sa Getafe  Bohol  nga gipang-recruit aron pahubo-on unta atubagan sa  internet didto sa Pampanga.

Si Rosemarie  Salazar  Women Welfare Specialist sa DSWD nagkanayon nga dili sila magpasagad  ug release sa 15  ka mga batan-on ngadto sa  ilang mga ginikanan nga na-rescue diha sa pantalan.

Gisubay  nila kun safety ba ang mga bata  nga ibalik  sa ilang mga ginikanan.

Alang gani nako mas maayong i-apil pagtaral ang mga iresponsable’ng mga ginikanan nga nagtukmod sa ilang mga anak ngadto  sa  dautan.

* * *

Nakadayeg ko niining gihimo ni Cebu City Fire Marshall Aderson Comar sa  pag-inspection sa mga Barangay  ug sa mga kalsada nga dunay makababag sa  ilang mga fire-trucks nga mo-responde sa mga sunog.

Kaniadtu pa gyud  kini’ng  maong  problema kay kun dunay sunog nga  mahitabo dili dayon  makasulod ang mga bombero kay dunay mga sakyanan nga nagbabag sa  kalsada.

Bisan ako naglibog  kun nganong  ang mga  Barangay Officials  ug ang taga CITOM  di makabadlong niining  ubang mga motorista  nga morag  nakatag-iya sa kalsada kay ila nang gihimong parkinganan sa  ilang mga sakyanan.

Manghinaut  ko nga tabangan si Comar  sa ubang mga kadagkuan kay kaayohan  ra gihapon natong  tanan  ang iyang  katuyu-an.

* * *

Nahimong alegre ang  among  diskusyon niadtong Sabado atul sa among  programang “Dialogue On The  Air”  sa DYSS Super Radyo bahin sa  kontrobersiyal nga “Anti-Corporal Punishment”  nga  magsilot sa mga ginikanan  nga mobunal, mokusi, molarot sa buhok ug uban pa’ng  matang sa desiplina  ngadto sa  mga anak.

Nakatawa ko kay  di lang diay ako ang biktima sa lapdos sa akong mga ginikanan kaniadtu. Halos sa akong  mga bisita nga dagku’g  ranggo sa gobyerno nakatilaw sab diay.

Sama sa akong giingon,  epektibo gyud gihapon ang pagbakus sa bata. Apan di sab palabi-an. Di na sab na mao nga mora’g nagbunal ug halas ang mga ginikanan ngadto sa ilang mga anak.

Akong  respetohan  ang baruganan sa akong  mga bisita nga  uyon sa balaudnon nga sila si professor Tata Hernani kinsa usa ka psychologist, Atty. Joan Saniel  sa Children’s Legal Bureau, Supt. Milagros Soliano  Chief sa WCPD sa PRO-7,  Rosemarie  Salazar sa DSWD  ingon man sila si Dr. Berna Ysulan,  Leah Apao  ug Ida Cabantan sa DepEd-7.

Matud pa ni Professor Tata  nga makahatag ug dautang epekto sa bata nga biktima sa bunal.

Pero sama sa akong giingon nga mas daghang kinabuhi ang nahimong tarong ug tul-id kay produkto sa bunal.

In fairness magpasalamat  pa ko sa akong  mga ginikanan nga wa ko nila  pasagdi ug puwera buyag way dautang epekto sa akong  pagkatawo ang mga  labhag kaniadtu. Hehehe.

Ako sa’ng  pasalamatan ang akong  mga kauban sa GMA-7 Cebu nga wa gyud  mamakak nga susama nako nga nagdaku sa  latos  nga sila si Kapusong Lou Anne Mae Rondina ug Marylou Ann “Me-Ann” Alivio.

Salamat  sab  nila ni Yowee Gonzales sa CLB ug sa participation ni Sir Allain Aliño nga matud nila wa sila  makatilaw ug bakus.

Salamat sab kang  Pedro nga estudyante  sa kolehiyo kinsa hangtud karon may pagdumot sa iyang mga ginikanan kay puwerte sa’ng naka-abuso kaniya.