Di na masabtan ang ubang ginikanan

Ambot kun unsay damlag sa  mga  anak nga mga linghod pa kaayo og pangisip ug pangidaron unya gisugo  sa mga  ginikanan pagpahubo atubangan sa webcam?

Subo kaayong palandungon nga dunay  mga ginikanan nga  ingon ani  ang mentalidad nga nakig-uban sa  puwersa ni Satanas  nga tagagawas  sa nasud.

Lisud  na gyud ba kaayong  sumpuon ang cyber pornography sa Sugbo ilabina sa lungsod sa Cordova tungod kay hamugaway sila  niining matang sa panginabuhi kay sa manakop og mga bakasi?

Niadtong acting vice governor pa si Acting Gov. Agnes Magpale iyang gitug-an sa among programang “Dialogue on the Air”  ang mga  makapanimbawot sa balahibo nga eksena kay dunay  mga magtiayon nga mag-sex atubangan  sa  webcam aron lang makasapi og dako.

Diha  sa Cordova miabot  na og  tulo  ka paresan sa  mga  ginikanan ang gipangdakop tungod kay pulos mipahimulos sa ilang mga anak sa cyber pornography.

Ambot kun unsay  gihimo nila  ni Cordova  Mayor Adelino Sitoy, Provincial Board Member Arliegh Sitoy ug 6th district Rep. Luigi Quisumbing aron paghunong na sa hingpit niining kabuang sa mga  ginikanan.

Unsa  katinuod nga bisag nagkabayayat ang balay ug bisag unsa ka gamay sa puy-anan dunay kutay sa linya sa Internet? Para asa mani? Hubo-hubo ug triple-X nga sex scandal?

Maglaum ko nga mohimo pa ug subsob nga operation ang  mga ahente sa  National Bureau of Investigation ug US Homeland  Security aron pagpuhag  niining mga yawan-ong binuhatan.

* * *

Bilib ko sa eleksiyon  sa  lungsod  sa  San Fernando kay  wa  pa  gihapon magdaug. Bisan ang  eleksiyon  niadtong 2010 wa pa gihapon mahuman tungod kay ang mga Reluya  nga  nangaparot miduso og election protest sa husgado.

Makaingon ko nga puwerte gyung  datoa  nila  ni kanhi  mayor Lakambini  “Neneth” Reluya  ug  sa bana nga si  Nonoy Reluya kay gasto  gyud baya  kaayo ang pagprotesta sa korte.

Hinuon ila kining katungod  kay  ilang  garbo ang nakataya human nangaparot pagkamayor ug pagkabise  mayor.

Sa managlahing  election   protest, si Neneth miprotesta kang  Mayor-elect  Antonio “Abe” Canoy samtang  ang  bana mikuwestiyon  sa kadaugan ni Vice Mayor-elect Mikko Canoy.

Ang  duha  ka petisyon nadestino og  managlahing korte. Ang  usa atua nadestino sa Regional Trial Court (RTC) Branch 18 samtang ang ikaduha  atua sa RTC 19.

Way  plano  ang husgado  nga usahon  na lang og usa ka korte kining duha ka mga election protest aron  mausa ra og ihap kun sublion man pag-ihap?

* * *

Kaming mga sakop sa Cebu tri-media nga maoy mga front liners sa commentary, news and public affairs naghinam-hinam na karong Domingo sa alas-7:30 sa buntag  alang sa opening ceremony sa duwang basketball diha sa Cebu Eastern College (CEC).

Dako kaayo kini ug ikatabang kanamo kay kini  ray paagi nga  manggawas  ang  among dagkung singot gikan sa stressful ug pressure kaayo nga trabaho.

Gikan  niadtong buwan sa Nobyembre sa miaging tuig  diin  kami sa GMA-7/dySS Super Radyo maoy  mi-champion batok sa TV-5 karon  pa sab kami makabalik  tungod sa ka busy sa pagpangandam sa coverage sa bag-o lang  natapos  nga eleksiyon.

Karong  tuiga unom ka teams ang  magtigi unya dunay mga teams  nga nag-usa og puwersa aron paglig-on ug langkaton ang among titulo.

Ang mga teams mao kining mosunod: Cebu Daily News ug The Freeman combined team; Sun.star Daily Superbalita ug dyMF Bombo Radyo; CCTN-47; TV-5; ABS-CBN/dyAB ug kami sa GMA-7/dySS Super Radyo.

Kaming mga  opisyales sa  Newsmen Basketball Association of Cebu (NBAC) nagkasabot nga human  sa opening isunod dayon ang pagbunot kun kinsay magdula sa first game, second game ug third game.

Kadtong team nga makabunot alang sa 1st game unya di makakompleto sa ilang mga players automatic nga forfeit.

Si NBAC Commissioner Bro. Bobby “Knight” Inoferio hugtanong mopatuman sa policy sa scoring system nga ang team  nga ma-forfeit automatic zero ang score sa standing samtang one point  sa mapilde ug two point sa winning team sa elimination round.

Niining maong liga sa NBAC 2013 akong pasalamatan sa gihimong suporta sila si Chester Cokaliong, chief executive officer sa Cokaliong Shipping Lines ingon man sila si Sir Jefferson Go, Sir Sammy Sia, Sir John Maraat ug sa kinatibuk-ang management  sa Cebu Eastern College ug si Apas Barangay Ramil Ayuman uban sa iyang  mga referee ug sa mga officiating officials.

Magpasalamat  sab ko sa way putol nga abag  nila ni  Sir Elias Baquero president ug iyang mga kaubanang opisyales  sa Cebu Federation of Beat  Journalists kon CFBJ.

Good luck kanatong tanan ug kitakits  ta didto sa CEC!