Premature

Paggawas nako sa among gate dunay pipila ka tawo nga gitapok sa Type O. Dihang miagi ko sa tulo nga nanadig sa among paril may nadungan ko nga nangutana-Kinsa man diay kontra ni Rama? Si Tomas?

Daghan na tuod kita nga nalingaw ug nahasi ning local nga politika, daghan pa sab diay ang wa gali kaila sa mga kandidato. Ug kun way partido nga moguroy kanila, magpabilin kini sila nga di manumbaling ning bugnong lugaynon.

Mao nga tungod niani makaingon kita nga premature pa paghisgot kon kinsay dehado o gauna ning eleksyon nga pagahimuon karong Mayo 13.

Sa mga hugonhugon hinuon nga akong nadunggan gauna pa gihapon kuno ang Bando Osmeńa – Pundok Kauswagan nga naila na karon nga Type O apan dili na kuno kini maka-lock out sa mga kandidato sa oposisyon sa Konseho.

* * *

Premature pa usab para mohimog preemptive strike ang America sa Pyongyang, North Korea nga karon gasigeg pagarpar nga ilang tunawon ang America ug ingon man ang ilang silingang nasud nga South Korea.

Di na magpataka ang America og asdang kay basig mahimong “quest for weapons of mass destruction II” ang ilang opensa.

Kay kun pananglitag hangin sa panuhot ra diay kining gipahungaw ni Kim Jong Un nahog og nagubot ang tanan tungod lang sa utot.

Hinuon dili angay kompyansaan ang mga nasud nga dunay hinagibang nuclear.

* * *

Tingali premature pa alang sa mga Lakers fans ang pagminatay kay di na makasulod sa finals ilang team. Duna pay pipila ka duwa og half game behind lang sila sa Utah Jazz para sa katapusang lugar sa play-offs.

Hinuon nagkangitngit ang purohan ning maong team. Apan kun ang higala kong si Joseph A ang pasultion “fight pa.” Hinuon mahilig man og drama ang Lakers. Kay mao man lagi kini ang padagan sa show time!

* * *

Makadakop ba kaha og asteroid ang robotic spacecraft sa America? Premature pa ang speculation kabahin niani kay ipakita pa ni Obama ang budget para niani ug nga aprobahan pa kini sa ilang mamamalaud.

Kon mahinumdoman gauwan og meteorites sa Russia human mibuto ang usa ka asteroid pagsulod niani sa kalibutan.

* * *

Tungod tingai kay gasugod pa ang semana ug ang buwan puros pa premature ang mga topic ning atong lindog karon.