Akoy P-Noy, sakyan na lang ang mga Kiram

Niining pagsamot karon sa tension didto sa Sabah diin daghan nang kinabuhi  ang  nakalas sa habig sa mga Filipino-Muslims dili na  ikaulaw ni Presidente Benigno Aguino III sa international community nga mohimo  og  formal representation  didto  sa United  Nations aron  sakyan kining pangangkon nila ni Sultan  Jamalul Kiram III sa Sabah.

Kining mga tawhana nga agaw-pansin kinahanglang tagdon na  sa Presidente kinsa maoy amahan sa  nasud.

Mangambot lang ko kun mo-surrender ba sila si Kiram ug iyang mga tawo nga nakamanukad na didto.

Sa report kagahapon sa buntag, medyo wa mosanong ang puwersa  sa gobyerno sa Malaysia sa panawagan ni Presidente Aquino nga ipatuman ang “maximum tolerance” tungod kay mibombardiyo ilang tropa  didto sa  mga lugar nga giokupahan sa 180 ka mga Filipino-Muslims.

Nagtuo ko nga mohulpa lang  ang tensiyon didto kun mangunay sila si president Aquino ug si Malaysian Prime Minister Najib Razak sa negotiating table sa UN pagresolbar ning  maong  isyu sa pagpangangkon sa lugar nga dunay  insaktong pundo  sa lana.

* * *

Supak ko nga ibaligya ang kontrobersiyal  nga Cebu International Convention Center kon CICC ngadto sa kagamhanan sa dakbayan sa Mandaue.

Kun buot hunahunaon kinahanglan pa man gani nga modugang  pagpatukod og mga facility  ang kagamhanang probinsiyal. Mamaligya na hinuon! Naunsa mo?

Atong ibutang nga naalkanse kita sa income sa CICC sa iyang  maintenance sa mga milabayng tuig apan dili kini rason nga ato nang ibaligya.

Pagkadaghang activity sa probinsiya nga puweding anha  ipahigayon.

Kun inutil man ang mga nagdumala sa CICC, sila maoy pangilisan ug dili sulbad  ang pagbaligya sa  CICC.

In fairness hinuon nila ni Mandaue City Mayor Jonas Cortes dili man gyud seryoso nga mopalit sa CICC nga napuno sa kontrobersiya ilabina nga dunay mga kaso nga naka-pending sa pagpatukod niini.

Alang  nako isip  taga-probinsiya maayong konsultahon ni Acting Gov.  Agnes  Magpale ang kinatibuk-ang Sugbuanon una  sila mopagawas og baruganan sa isyu.

Bisan tuod  napuno sa kontrobersiya  ang CICC apan timan-an  nato nga sa makausa nakakulit siya ug makasaysayanon  nga  12th ASEAN Summit nga usa ka international event.

Dili lang diha, wa ta masayod nga sa mosunod nga katuigan usa na ka income generator sa probinsiya ang CICC ilabina nga misaka pag-ayo ang  ekonomiya sa Sugbo.

Kun i-convert nato ang CICC ngadto sa usa ka sports facility, puwede man siguro!

* * *

Pagka-imposible gyud nga wa makabantay ang naka-duty nga pulis didto sa Toledo Police Station paggabas sa selda niadtong Sabado sa gabii nga maoy giagian  pag-eskapo sa tulo ka mga piniriso  nga sila si Nilo Lombreno, Joselito Ribaya  ug Apolinario Canumay.

Dili rason ang kakusog sa pagbunok sa uwan niadtong higayona nga wa sila makabantay kay kining atong mga pulis gi-train gyud na  sila nga kinahanglang alerto panahon sa kusog nga uwan kay mao ni ang itayming sa paghimo og krimen ug ubang dautang binuhatan tungod sa kasaba sa ulan.

Ang klaro lang gyud niini mao nga nagtugtog sa pansitan ang mga pulis nga duty isip mga  jailer.

Unsa  may lakang niini ni Police Regional Office in Central Visayas Chief Marcelo Garbo? Pasayloon ning mga danghag  nga mga pulis sa Toledo?

Karong bag-o  nakadawat  pa ko og reklamo nga dili  makadakop sila si  Supt.  Henry Binas sa  responsable sa pagpangrakrak kay matud pa tawo og politiko  nga  impluwensiyado. Talawan na atong mga pulis?

* * *

Mitiyabaw ang mga empleyado sa Kapitolyo kay matud  pa gubot pas lukot ang implementation sa flexible time schedule nga maoy gustong ipatuman nilang Board Member Arliegh Sitoy.

Sa resolution, niadto pang March 1, 2013 ang effectivity apan akong  nahibaw-an  nga wa  pa kini matuman kay  dunay  giklaro ang mga department heads ilabina sa personnel department.

Maglaum ko nga makatabang paggiya niini ang taga Civil Service Commission sa bag-ong eskedyul sa trabaho sa liboan ka mga kawani aron way malibog ug aron maka-serbisyo ang Kapitolyo sa mga lungsoranon gikan sa alas-7 sa buntag  hangtud sa alas-6 sa gabii.