P-Noy 39

Politics they say is a numbers game. Let’s play a numbers game.

39. Miingon si President Aquino nga mapakanaug niya ang dolyar ubos sa 40 pesos karong tuiga. Hinuon murag mitapot pa sa kwarenta ang dolyar; mosaka gamay, manaug gamay, apan wala pa mobahar sa kwarenta. Hinuon Enero pa man ta. Pero mao man rong panahona nga kusog ang remittance sa nanarbaho sa gawas. Sa pagkakaron dream number pa ang 39 peos to a dollar.

13. Karong Mayo 13 ning tuiga (2013) ipahigayon ang bugnong lugaynon (election ba). Mao kini ang midpoint sa pagkapangulo ni Noynoy Aquino. Ang resulta ning maong piniliay maoy basihanan kon may purohan bang modaug si Mar Roxas (Liberal Party kon LP) batok kang Vice Prsident Jejomar Binay (United Nationalist Alliance kon UNA). Nianing tungora murag giplanohan na sa UNA nga ang Sugbo maoy himuon nilang sentro sa oposisyon. Kini tungod sa drama karon sa Kapitolyo diin buot nila nga mahulgway ang masudnong pamunuan nga mapalabilabihon.

2.5. Dos punto singko milyones ang giingong botante sa tibuok lalawigan sa Cebu. Usa usab kini sa mga katarungan kun nganong nainteresado mopapil sa drama ang pundok sa UNA. Ang botante sa sugbo nga gi lista sa Commission on Elections sa 2,509,520 maoy giingong pinakabaga sa tibuok nasud. Kun mahinumduman ang ulogulog ni Gloria sa mga botante sa Sugbo kaniadto mao man ang, “You can make a president.” Kay sa Cebu man kuno gikan ang iyang usa ka milyon nga labaw batok kang Fernando Poe Jr.

40. Kun katuohan ang survey nga gihimo sa mga estudyante nga gi-comission ni Glen Soco, si Soco ang makakuha sa 40 percent sa mga boto para sa pagka-bise gobernador. Sa maong survey si Acting Gov. Agnes Magpale nakakuha og 36.1 percent ug ang pagumangkon niani nga kandidato sa One Cebu nga si Ramon “Boboy” Durano IV.

Sa bangga sa pagka-gobernador, mibutyag kining maong survey nga nakakuha si Pablo John Garcia, nga igsuon sa suspended governor Gwen Garcia og 48.7 percent samtang ang kandidato nga sa LP nga si Hilario Davide III nakakuha og 47.9 percent.

Hinuon 1,466 ra man ang respondents ning maong survey. Morag daghan pang survey nga mobutho unya nga makapalabad sa atong ulo. Sayo pa kaayo.

Ayaw suwayi pagkumbinar ang mga numero nga atong nahisgotan diri para sa Swertres, sa Lotto ug upan pang sugal kay murag .000000001 percent ray purohan sa inyong kadaugan.