Bintaha nalang nga wa pusila ang foreigner

Ang estudyanteng langyaw nga taga-Papua New Guinea nga si Bennedict Penini kinsa nakulatahan sa atong duha ka mga pulis nga mga sakop sa Special Weapons and Tactics (Swat) group way kalainan sa ubang mga anak og impluwensyado ug kwartahan dinhi sa ato sa Pilipinas nga mga abusado kaayo.

Kun wa kita makahatag og special treatment ni Joavan Fernandez nga anak ni Talisay City Mayor Socrates Fernandez ug sa ubang mga abusado, kinsa man sab ning maong langyaw nga abusado nga atong hatagan og maayong pagtratar?

Tungod ba lang kay ang amahan niining maong langyaw usa ka magbabalaod ug sakop sa parliamento sa ilang nasud mokakak na ang atong mga kadagkuan sa gobyerno sama sa Commission on Human Rights nga moimbestigar dayon?

Kun wa pa kini magmaoy ug wa pa manglabay ug bato nga nakapeligro sa kinabuhi sa kapulisan ug sa ubang katawhan dakpon kaha to siya ug makulatahan?

Mensahe kini sa ubang mga langyaw nga mga abusado. Kinahanglang magbaton sila og maayong pamatasan dinhi sa atong yutang natawhan kay kun kita bitaw makasala didto sa ilang nasud sobra pa man sa binaboy ang ilang himoon sa ato.

In fairness nila ni PO1 Philip James Tanza ug PO1 Bradford Labandero nga sa sinugdanan pa lang grabe ang ilang pagpaubos ug nipatuman sa maximum tolerance.

Diha na sila natandog ug nahagit dihang nanglabay na og bato si Penini. Swerte pa gani ning maong langyaw nga wa pusila.

Bisan tingali kun akoy pulis nga akong tan-aw naingon ug higante ang dakpunon moapply ko og excessive force aron pag-neutralize.

Mas maayong makauna ang mga tinugyanan sa balaod kay sa maoy maapiki ug mainutil.

Kun simbako wa ma-neutralize si Penini delikado pa to nga makailog og armas sa atong kapulisan nga moresulta sa daghang mapagan.

* * *

Unsa ka tinuod nga kadtong pagkaaria sa Sugbo ni late interior and local government secretary Jesse Robredo sa wa pa ang plane crash, nagbitbit na kadto sa suspension order alang kang Cebu Gov. Gwendolyn Garcia?

Akong kasaligang tinubdan miingon nga si Robredo matud pa maoy mopersonal pagtunol sa suspension order ngadto kang Governor Garcia.

Apan ambot lang kun unsa kini ka tinuod? Puwede diay ma-implementar bisan adlawng Sabado? Kun duna may suspension si Garcia nganong hangtud karon wa pa man ipatuman ni Secretary Mar Roxas?

Sa unsa man sang kasoha nga ang Department of Interior and Local Government maoy mosuspenso? Kadtong ilang away ni Garcia ug kang late vice governor Greg Sanchez?

Bahin sa giingong suspension nga ipatuman sa Ombudsman o ba kaha sa Sandiganbayan sa kontrobersyal nga pagpalit sa Balili property nanggawas sab kining impormasyon nga karon nang buwan sa Nobyembre i-implementar ang six months suspension.

Tan-awon ta kun may ngipon ba gyud ang anti-graft court nga mobangga sa mga impluwensyado nga nasakyan na sa mga dagkung politiko.

* * *

Kun modayon og lansar si Governor Garcia pagkasenador o ba kaha pagka-kongresista sa ikatulong distrito sa Sugbo dili na diay kinahanglang mo-resign pa siya sa katungdanan kay usa siya ka elected official.

Kagahapon giklaro ni manlalaban Edwin Cadungog sa Commission on Elections nga base sa R.A. 9006 o “Fair Elections Act,” dili na kinahanglang mang-resign ang mga incumbent elected public officials sama kang governor Garcia.

Sa balaod kadto rang mga appointed o mga tinudlo nga mga opisyal sa gobyerno ang mang-resign sa pwesto kun manglansar.

Pero hugtanon ba gyud si Gwen magsenador? Kun di kaya ang Senado nganong pugson man? Nganong di man i-grab ang sigurado nga puwesto nga mao ang pagka-kongresista sa ikatulong distrito?

* * *

Panahon na nga ang mga buhatan sa gobyerno ug mga lain-laing establismento magbutang gyud og rack alang sa mga helmet sa motor aron adto ibutang ug ibilin ug kinahanglang dunay mag-gwardya ug moisyu og claim stub.

Ako kining gisugyot tungod kay dili na basta-basta ang kantidad sa mga bag-ong helmet karon nga nakapasar sa standard. Naa lay amo sa dySS Super Radyo nagkantidad og dul-an P2 mil ang buok.

Dili gyud maayong biyaan lang sa motor ug ipasaya-saya og butang kay halinon kaayo sa kawat. Pwedeng ikaprenda!

Karon ang mga tawo nga di mokompyansa inconvenient gyud kaayong tan-awon kay bisag maglaag sa mga dagkung mall ug mga tindahan itabikong gyud ang mahalon nga helmet kay bug-at kaayo sa bulsa.