Mahal ra kaayo ang CCTV camera sa Talisay

Makapanlimbawot sa balahibo ang kantidad nga gi-propose ni Talisay City Vice Mayor Alan Bucao pag-install og camera sa mga strategic places sa ilang dakbayan.

Ambot unsang  kompaniya  ang giduol ni Bucao nga mi-abot og P25  milyones ang package sa iyang CCTV cameras?

Akong nahibaw-an nga 10 ka mga camera ang apil sa package  apan  wa pay siguro kun may night vision ba ug taas ba ang kalidad sa zoom-in  zoom-out.

Unsa may kalainan niining mga CCTV cam ni Bucao kay sa uban?

Niadtong Sabado  atul sa among  programang “Dialogue on the  Air” sa dySS Super Radyo akong nahibaw-an nga dunay mas barato nga CCTV camera nga gitug-an ni Rey Calooy.

Si Calooy sa Filipino Cebuano Business Club mitug-an nga sa iyang kompaniya mibalor lang og P15  mil ang package  sa iyang  upat  ka  mga camera nga gi-install nga maayo og kalidad kay gani klaro ang dagway  niadtong tawo nga misulod sa ilang opisina nga nakakawat og duha ka mga cellular phones.

Gawas niini, si Association of Barangay Councils president  Michael Ralota sa Cebu City mitug-an nga sa  ilang barangay T. Padilla mibalor lang og P150 mil ang package nga may walo ka mga camera.

Apan in fairness ni Bucao, iyang gipasabot nga above board kining iyang proyekto.

Bantay bitaw nga maparehas ni sa decorative lampposts. Mauwaw gyud mo!

* * *

Makaingon ko nga “security nightmare” alang sa  kapulisan dinhi sa  Metro Cebu ang migawas nga intelligence report karon nga mo-strike anytime ang Alferez Robbery Group nga  manulis og mga bangko dinhi sa Sugbo.

Gikabalak-an nga mas lig-on kining grupoha ikomparar sa kang Meloy Garcia sa Bohol Robbery Group ug sa  kang Junjun Cabando sa  Misamis Boys kay kuyaw kini og records sa mga pagpanulis didto sa Metro Manila.

Nasayod na niini ang pundok sa mga bangko nga Cebu Bankers Club sumaa pa sa presidente nga si Christine “Kit” Chua.

Apan giklaro  ni Chua  atol sa among programang “Dialogue on the  Air” sa dySS Super Radyo niadtong  Sabado nga wa gyud sila makaila sa mga dagway sa Alferez Robbery Group.

Kun matinuod man kining maong intelligence report, unsa man kaandam ang atong mga gwardya sa mga bangko ug ang atong kapulisan?

Unsaon man pag-ila sa  mga gwardya nga otro man sab silang wa  makaila sa mga sakop niini?

Maglaum ko nga samtang wa pa mahitabo ang mas gikabalak-an  maestablisar na sa kapulisan ang dagway ning mga kanahan ug maapod-apod sa atong mga negosyante.

* * *

Unsay nahitabo sa tulo ka mga gwardya nga mga saksi ug mga biktima sa tulis uban sa teller sa Metrobank sa La Nueva Supermarket  niadtong Agusto sa tuig 2007?

Wa magsilbe ang giisyu nga bench warrant of arrest ni Cebu City Regional Trial Court Judge Douglas Marigomen ngadto nila ni Medard Rama, Elmer Ian Ilagan ug Nestor Impiales.

Ang tulo giingong nang-resign na sa Cebu Mandarin Security Services, Inc. basi sa  return sa warrant  of arrest.

Kining tulo ka mga gwardya maoy maglig-on sa ebidensya sa kasong robbery with homicide batok nilang Casimero “Meloy” Garcia  daku-daku sa Bohol Robbery Group ug  sa kaubang gwardya nga si Danilo Flores.

Kining pagtago-tago sa tulo ka mga gwardya nagpalig-on sa akong teyorya kaniadto pa nga dunay  kalambigitan  kining  mga tawhana  sa tulis  sa La Nueva.

Kun mga inosente sila nganong di man motabang sa gobyerno nga  mataral sila si Meloy Garcia ug ang kaubang gwardya nga si Danilo Flores?

* * *

Unsa man gyud kaimpluwensyado si Nida Sistona nga napalagpot sa serbisyo nga officer in charge sa Department of Social Welfare and Services (DSWS) dinhi sa Sugbo?

Dunay politiko nga nagpaluyo kaniya aron dili  mataral sa kasong anti-graft  and corrupt practices  act nga  iyang giatubang sa sala ni RTC Judge Simeon Dumdum Jr?

Kun nakahinumdum mo sa  kaso ni Sistona mao ni ang isyu kaniadto nga iyang gipatun-ogan  ang daghang  mga de lata nga pagkaon nga wa  niya ikaapod-apod sa mga biktima sa kalamidad dinhi sa dakbayan sa Sugbo nga mibalor  og dul-an  P30 mil pesos niadtong July 2004.

Makapungot kaayo ang kalamboan sa  iyang kasong criminal nga off-shoot ning maong kaso nga anti-graft and corrupt practices kay hangtud  karon, wa pa gyud  masugdi pag-presentar og mga testigo.

Base sa court records sa RTC branch 7, nagsige lang og ka-postpone ang mga scheduled hearings kay sigeng dili available ang unang testigo nga si Virginia Picio nga kauban ra sab ni Sistona sa DSWS.

Sa akong pag-follow up ning maong kaso niadtong miaging semana akong nahibaw-an nga mitunga man tuod si Sistona apan nagdala og  memorandum nga patambungon og laing kalihukan.

Akong nakita nga daghan na kaayong excuse si Picio. Dili ba kini insulto  ni Judge Dumdum nga nagsubay sa tinarong nga sistema unya  lutsan lang og mga mabaw nga katarungan?

Nganong i-conflict man gyud ang eskedyul sa bista sa kaso? Kinahanglang tutukan ni Deputy Ombudsman Pelagio Apostol ang ombudsman prosecutor ning  maong kaso nga si manlalaba Jess Vincent Dela Peña.