Wa na pakita ang mga tulisan

Dili gyud unta maayong paminawon nga modangop na lang ang uban sa summary execution batok niining mga salbahis sa katilingban ilabina sa mga tulisan.

Apan makasabot ko nga ipaagi sa vigilante style killing kining mga bilyako kay mainutil gihapon ang gobyerno paghipos niining mga kanahan kay sayon ra kaayong makasibat.

Sama sa nahitabo sa mga mitulis kang Maria Lina Mier, tag-iya sa sikat nga Ma. Lina Catering Services, nga wa na manunga sa korte human nakapyansa sila si Sim Abordo ug Roldan Ranolo.

Gipangkonbikto man tuod ni Judge Gilbert Moises apan unsaon man pagtanggong nga gikan sa pagpyansa wa naman igkita.

Sigurado ko nga kining mga kanahan naniid lang sa panahon ug magmata lang unya tag buntag nga anaa na say laing mabiktima sa pagpanulis ilabina niining nagkaduol na ang Pasko.

Kagahapon nag-abot mi sa piskaliya sa hepe sa Tabogon nga si Insp. Lamberto Hibaya kay duna say tulis sa mga pasahero sa Ceres Bus didto apan nakasibat ang tulo ka tulisan.

Ang bugtong nadakpan nila mao si Brian Sentillas Garcia. Si Brian nga mipakitag pagsukol sa mga otoridad napusilan sa tiyan nga maoy hinungdan pagkalanding diha sa Vicente Sotto Memorial Medical Center.

Mipasabot kanako si Inspector Hibaya nga di gyud tuyo niya nga ig-on ang tiyan ni Brian apan gumikan sa pagkalihok wa gyud niya maigo ang tiil nga maoy target.

Pero kun naulo pa to impas unta ug makuhaan ang mga sagbot sa katilingban.

* * *

Angayng panaminan sa kababayenan ang nahitabo didto sa lungsod sa Barili niadtong Domingo nga di gyud mokompyansa kay dihay usa ka babaye nga hapit malugos samtang nangihi sa CR sa simbahan sa Barili.

Ang biktima lumad nga taga dakbayan sa Lapu-Lapu nga misurprisa pagduaw unta sa iyang igsoon sa Barili.

Giingong wa kaabot ang biktima sa iyang igsoon kay ngan nga Domingo misimba daan siya sa simbahan sa Barili apan dihang mituman sa sugo sa lawas miadto siya sa CR.

Apan dihang nahuman na siyag pangihi gihapak ang iyang ulo apan wa molampos ang batan-ong suspetsado kay naningkamot siya nga di mahubo ang iyang pantalon ug nanigkamot nga makagawas sa CR hangtud nabulabog.

Nadakpan hinuon ang batan-on nga gituhoang tiggamitan og drugas.

Sa nahitabo di gyud kakompyansahan ang bisan asang lugar kay simbako dunay dili alagad sa Diyos ang masaag ug nagtakuban sa iyang pagkatawo nga mohimog lawasnong kalipay sa biktimahon malalaki man o babaye.

* * *

Kinahanglang lab-ason natong mga Sugbuanon ang pagsupak sa tinguha nga isibog na sa buwan sa Setyembre ang ting-able sa klase sa mga estudyante tungod kay naklaro na gyud nato nga wa magtumo-tumo sa data si Director Oscar Tabada sa Philippine Atmospheric, Geophysical and Astronomical Services Administration sa Mactan nga mas grabe ang uwan sa buwan sa Setyembre ikomparar sa Hunyo basi sa 25 na ka tuig nga pagtuon nila.

Sa pagtungtong pa lang ning kasamtangang buwan, nakasinati dayon kita og grabeng pag-uwan niadtong Sabado Setyembre 1 nga nakamugna og mga landslide ilabina didto sa Manipis sa dakbayan sa Talisay.

Bisan niadtong Domingo, Setyembre 2 pwerte gyung uwana pagkagabii. Gani basa kaayo ko nga misimba sa Saint Therese Parish Church sa Lahug sa 7 p.m. nga eskedyul.

Pagka Lunes Setyembre 3, sayo pa lang sa buntag nagtaligsik unya pagkagabii mibunok na sab ang uwan.

Samtang kagahapon Setyembre 4 pwerteng kusoga sa uwan human sa paniudto hangtud na sa pagkahapon. Sama sa akong giingon nga kun sakripisyo alang sa taga-Manila ug ubang parte sa Luzon ang buwan sa Hunyo nga maoy ting-able sa klase mas maayo nga sila na lang didto ang mag-school opening sa buwan sa Setyembre.

Sumpay niining pagsige nag uwan nga naghatag og abnormal nga gidaghanon sa tubig makapabalaka kaayo kini kanato.

Kinsay magdahum nga bahaon sab ang arrival area sa mga domestic flights didto sa Mactan Cebu International Airport.

Way kumo sa pagmatngon ug paglikay sama sa paghikling niadtong mga nagpuyo sa mga risgo nga lugar ilabina nga gibana-banang tulo ka mga bagyo ang mo-igo sa Pilipinas niining buwana sigun sa Pagasa.