Gilupig si Mayor Rama sa sinipsipay?
With all due respect wa ko maka-ila ni outgoing City Treasurer Ofelia Oliva ug sa iyang assistant nga si Ms Tessie Camarillo nga maoy mopuli pagka City Treasurer dinhi sa dakbayan sa Sugbu.
Apan in fairness ngadto ni Mayor Michael Rama ug ni Oliva, nahug gyud nga binastos ni’ng gihimo ni Kongresista Tomas Osmeña kun way mga tinunto sa ilang mga transaksiyon diha sa City Hall.
Apan kun konpirmado nga dunay mga kabuang, angayan lang sab nga itaral sila si Rama ug Oliva sa Ombudsman.
Nagpasabot ba sab kini nga si Camarillo tawo ni Osmeña ug maoy magamit sa kanhi mayor pagbabag sa mga proyektu ni Rama aron tipik sa iyang plano pag-sabotahe sa liderato diha sa City Hall?
Kun tinarong pa sab ni’ng katuyu-an sa mga kanahan nga taga Department of Finance, nganong wa man nila imbestigaha si Oliva.
Hinoon prerogative nila ang pagputol na sa serbisyo ni Oliva apan mas maayo gyud unta kun naminaw sila ni Mayor Rama ug ilang gi-respetohan ang pagsalig ug kompiyansa sa mayor sa ilang tawo.
Mao kini ang nakaporke sa ubang mga national agency kay magpagawong sa mga pulitiko.
Nagpakita lang nga kining ilang gihimo sama ra nga ilang giguba ang ilang kaugalingong institusyon ug ilang mga tawo nga anaa sa mga local government units.
Magpasalamat pa gani unta ang mga kadagkuan sa DOF ngadto ni Mayor Rama nga nangayo ug extension pagdumala ni Oliva.
Sama sa akong giingon nga di lang unta kutob nga paundangon na si Oliva sa puwesto kun di kinahanglang imbestigahon siya aron masubay kun kini’ng binuhatan ni Osmeña ug taga BOF linihukan ba kini sa mga responsableng opisyal sa kagamhanan.
* * *
Wa pa gyud motagam sila si Alegria Mayor Emelita Blanco Guisadio ug Dr. Samson dela Peña, municipal health officer, sa miaging typhoid fever nga miigo sa ilang mga residente niadtong pipila pa lang ka buwan ang nakalabay?
Siyaro pud! Gikan niadtong unang outbreak wa pa sila maleksiyon sa paghimo’g mga lakang nga di na mausab ang pagtakboy sa matang nga balati-an.
Tubig na sab ang hinungdan? Kun tubig maoy na-ingnan sa maong sakit, nagmika sila sa pag-monitor sa ilang tinubdan? Kapila man sila gustong mapalpak sa trabaho una nila masulbad ang problema?
Akong nahibaw-an nga niadto pa’ng Biyernes nahitabo ang laing outbreak diha sa Alegria. Apan na report sa Kapitolyo niadto na’ng Lunes.
Unsa may buot ipasabot niini? Blind ang taga Kapitolyo sa nahitabo? O ba kaha nasayod na sila apan way nangahas pag-adto gumikan sa away sa pulitika?
Kumusta man tuod ang mayor diha sa Alegria? Suod ba ni Gobernadora Gwendolyn Garcia?
Pagka wa gyu’y ayo kun ang pulitika maoy hinungdan nga mapalpak ang serbisyo ngadto sa katawhan.
* * *
Misamot ang akong pagtoo nga gitabangan gyud ug patay nila ni Rolando ug Marilyn Aburot ug sa ilang anak nga lalaki ang Canadian national nga si Darcy Hans Reutenberg duol sa ilang panimay sa barangay Adlaon ning dakbayan.
Si Rolando nga akong na-interview sa piskaliya miingon nga praktisado ang biktima sa karate. Gawas pa daku kaayong tawo.
Sama sa akong giingon nga tulis gyud ang motibo sa pamilya mao nga ilang giplano ug tarong ang krimen hangtud nga milampos sila sa paghimo.
Maila kaayo ang mga actuations sa inahan ug anak samtang gidala sila sa piskaliya kay wa gyud makit-i sa ilang mga dagway nga nagmahay ug naguol nga gi-apil sa kaso.
Ang mga tawong inosente mohimo gyud ug mga lakang aron sila makalingkawas sa kaso. Apan ang duha mingaw pa sa tirana morag way nahitabo.
Among kauban sa GMA-7 “Balitang Bisdak” nga si Chona Carreon ug ubang mga sakop sa media hayan patestigohon na sab unya sa korte niining maong kaso kay importante kaayo kadtong pangangkon ni Rolando atubangan sa among camera.
Si Cebu City Prosecutor Nicolas Sellon miingon nga iyang manduan ang piskal nga mo-prosecute sa kaso nga pa-subpoenahan unya ang mga sakop sa media nga naka-interview sa way puangod nga si Rolando Aburot aron pagseguro sa ilang conviction.
