Unsa may nindot sa pagka fire marshal?

Nahulga na sab niining mga panahuna si Cebu City Fire-marshal Supt. Aderson Comar kay ibalhin siya sa Manila base sa  kamanduan ni Interior and Local GOvernment Secretary Jessie Robredo.

Sigurado ko nga magpatabang na sab si Comar sa iyang mga padrino sa  politika aron dili gyud siya mabalhin.

Kay kun di maningkamot si Comar pagduol ug pagpatabang sigurado ko nga  maibot gyud siya dinhi sa dakbayan sa  Sugbo.

Pero unsa may mawa dinhi sa dakbayan kun bag-o na unya ang atong City fire marshal?

Kun nakontento si City Mayor Michael Rama sa performance ni Comar, nganong iya  mang pugngan nga unta promotion man  kini alang kang Comar?

Maka-negatibo ba sa liderato ni Rama kun wa nay Comar?

Kinsa may ipuli ni Comar dinhi sa dakbayan sa Sugbo? Tawo ni kongresista  Tomas Osmeña nga si Supt. Esmael Codilla?

Mao ni ang nakadaut kun sudlan sa mga politico ang BFP.

* * *

Way plano ang prosecution panel nga kuhaon na lang state witness si Merly Laguitao kinsa uyab ni Junjun Cabando  aron maoy maglig-on og samot sa kasong robbery with homicide batok sa Cabando robbery group?

Akong n-obserbahan nga gamay ra ang participation ni Merly sa pagtulis sa teller sa China Bank nga paingon nga mohatud og kwarta sa ilang suki nga money changer sa Robinson’s Place sa miaging tuig.

Sa sitwasyon karon bugtong si Rolien Castro Jr. ra ang wa moangkon sa krimen.

Bisan wa moangkon si Cabando atol sa arraignment kagahapon, wa kadto magpasabot nga iyang baruganan ang bakak kay pwede niyang angkonon ang krimen sa korte samtang nagdagan ang asunto.

Ang duha ka mga pulis nga nangaangol  motumbok gyud kang Castro nga maoy namusil kanila.

Alang nako tayming kaayo nga kuhaon siyang state-witness tungod kay  makaluluoy ang kahimtang ni Merly kay buntis kini og upat ka buwan unya wa gyuy klarong partisipasyon sa krimen.

* * *

Nakatawa  ko sa pagkaestrikta kagahapon sa branch clerk of court ni Regional Trial Cour Judge Wilfredo Navarro nga si manlalaban Ophelia Delos Reyes ngadto namong mga sakop sa media samtang nag-cover sa arraignment nilang Junjun Cabando.

Ambot kun mao bay nabag-ohan tungod sa among kadaghan o ba kaha gisapot lang sa uban niyang mga staff nga parehas niyang  langayan kaayong  moabot.

Haskang paeta gyud kay siyay magbuot sa mga cameraman ug photographers kun asa  magpahimutang nga dili makaigo sa insaktong angle.

Kun decorum ilang gusto wa gyud  makasupak ang mga sakop sa prensa.

Pero dihay among nakit-an kagahapon nga bisag nagbista si Judge Navarro wa gyud makabadlong si Ma’am Ophelia sa babaye nga nagpasagad lang og lingkod nga gipatong ug gipatanos ang duha ka mga paa nga naglingkod sa bangko.

* * *

Politika ra gyud ang hinungdan niining pagbabag ni Gov. Gwen Garcia ngadto kang Gigi Sanchez Zaballero nga himoong consultant ni Vice Gov. Agnes Magpale.

Kun kaalyado pa nila si Magpale, bisag paabton pa siguro og napulo ka mga consultant ang opisina sa bise gobernador.

Ingon ani gyud kapaet ang poltika!

Si Sanchez kinsa anak ni late vice governor Greg Sanchez maoy mopadayon sa programa sa organic farming.

Apan ambot kun ganahan ba kining  motrabaho nga way proper recognition pun-an pa nga ang iyang sweldo adto kuhaon gikan sa personal nga bulsa ni Magpale.

In fairness ni Gigi akong nakita nga wa pa intawon kini magkamang sa kalisud kay dunay insaktong bahandi nga gibyaan sa amahan.