Nakatilaw og kasaba si Cumar sa Mayor

Akong nasaksihan niadtong Sabado  sa gabii nga ang papel ni Mayor Michael Rama na-ingon sa pagka Fire General sa sunog sa Tejero kay iyang gikasab-an si  Cebu City Fire Marshal  Aderson Cumar dihang  nakita sa  mayor nga  napasagdan nalang ang mga gipangsumpay  nga mga fire hoses sa mga personnel sa Bureau of Fire.

Wa  ikahimoot sa mayor dihang iyang nakita  nga gipang-tunob-tunoban nalang sa mga tawo’ng way labot.

Ang gusto niya’ng mensahe mao nga pagka-human ug gamit kinahanglang hiposon  ug lukoton dayon aron dili mangabuslot  ug magamit pa sa mga mosunod nga mga sunog.

Puwerte’ng daghana sa mga panimay  ang naugdaw.  Gibana-bana ni konsehal Gary Lao nga  moabot ug 500. Luoy gyud kaayo ang mga biktima sa sunog.

* * *

Daghang mga ginikanan ang nakugang sa estorya  bahin sa gihimo niadtong usa ka Alberto Paredes 24 anyos  nga misuway pag-inject sa iyang dalang syringe ngadto sa tinun-an  sa grade 5 sa Pardo Elementary School samtang sakay sila sa trisikad.

Si PO1 Teddy Joy Olano nga akong  na-interview nagkanayon nga samtang ang bata  misakay  sa trisikad   nga iyang gipakyaw paingon sa  ilang pinuy-anan gikan sa eskuwelahan mikalit ug sakay si Paredes ug dayon mi-action pag-inject ngadto sa bata.

Tungod sa kahadlok mi-ambak  ang  batang babaye nga maoy hinungdan  sa  pag-angkon niya ug mga pangos ug bun-og. Suwerte lang kay samtang sige siya  ug dagan  dihay tinugyanan sa Bureau of Jail Management and Penology (BJMP)  ang naka-rescue kaniya.

Alang nako kinahanglang dakpon si Alberto Paredes sa iyang  panghadlok sa bata.

Kinsay di  ma-alarma  nga mikalat na kini’ng  mga estorya karon nga dunay tawo nga gustong  manakod sa iyang sakit nga HIV pinaagi sa pag-inject sa gusto niyang biktimahon.

* * *

Puwerte na gyuy’ng  humota karon ni Joavan Fernandez alang sa kapolisan sa dakbayan sa Talisay pinangulohan  ni Chief Inspector Eddie Recamara.

Ilang hatagan ug pasidungog “commendation” si Joavan kay maoy nag-plete kanilang mga  pulis ug gikuyugan  pa sila ni Joavan didto sa Misamis pag-pick-up kang Noel Simbajon suspetsado sa pagpusil-patay  kang PO1 William Mangubat.

Akong na-obserbahan nga gihimong uto-uto  si Joavan ni Recamara. Insulto  baya  kini sa  kapolisan nga gi-pletehan sila’ng Joavan  kay dunay  budget ang PNP niini.

Sa makamao mobasa mora’g  hilas  ra   kaayong  paminawon nga isulti  pa sa publiko ang  gamay nga tampo  ni Joavan ug hatagan pa’g commendation.

Kadtong kuwarta’ng gigamit  ni Joavan sa pag-plete iya   ba gyud kadto o ba  kaha gikan sa discretionary fund  ni Mayor Socrates  Fernandez?

* * *

Sa taud-taud na nako’ng panibya duha na ka mga nangaging information officer sa Social Security System (SSS) ang akong gidayeg tungod kay gawas nga makama-ong  mopasabot mohimo usab  ug kinasing-kasing nga pagpangalagad ngadto sa mga na-problema nga mga miembro sa SSS.

Dili sa ingon nga akong palapdon ang mga atay nila’ng Ma’am Lorna  Zozobrado ug Ma’am  Janice Caballes apan deserving silang daygon kay bisag gipang-insulto na sa mga insultador apan magpabiling kalma.

Akong nakita  nilang duha nga sincero gyud kaayong mangalagad ug kun wa lay mga kakuli-an  andam  kanunay’ng  motubag sa mga pangutana sa mga SSS members panahon nga among  panawgon sa among  mga programa sa radyo.

Maglaum ko nga manakod ang ilang mga maayong gawi ngadto sa mga nagsunod ug sa ubang mga ahensiya sa gobyerno.

Magpasalamat  lang sab diay ko sa ubang  mga bisita namo niadtong Sabado atul sa programang “Dialogue On The Air” sa DYSS Super Radyo nga sila si Noel Rafols sa National Statistics Office (NSO), Dina Cinchez sa PhilHealth ug ingon man sila si Dale Mark Antonio ug Philip Simon Basquez sa Pag-IBIG Fund Mandaue ug Cebu nga mitunga sa programa ug mitubag sa mga pangutana gikan sa mga tigpaminaw.

Ilang  gi-reecho ang gipadayag ni Ma’am Janice nga pulos sila mga epektibo ug competent nga mangalagad ug dunay  insaktong  mga personnel  nga na-trained ug na-seminar kun unsaon pagpa-ambit  ang insaktong panerbisyo.

Samtang bahin sa mga fixers hingpit  nang nawagtang sa NSO apan sa SSS  naa pa gihapon. Samtang sa Pag-IBIG ug Philhealth  giklaro sa mga tigpamaba nga wa gyud mahitabo nga nahugpaan ug mga fixers ang ilang  mga buhatan.

Mangayo lang sab ko’g despensa sa mga texters ug sa mga callers nga wa ma-accommodate ang tanan tungod kay kuwang  ra gyud ang duha oras nga programa.