Unsa? Way hakot sa mga tawo atol sa Soca?

Nagkatawa lang ko sa panghambog sa mga opisyales sa Cebu City Hall  ilabina ni chief of staff Philip Zafra nga miingon nga  wa sila manghakot  og mga tawo aron pasaksihon niadtong Lunes sa  hapon sa State of the City Address ni Mayor Michael Rama diha sa Plaza Sugbo.

Di gyud ko ganahan mamakak basta akoy makakita. Sa akong pagkalaagan niadtong  Lunes pwerteng alegreha gyud sa mga barangay hall nga kaalyado  ni Mayor Rama.

Sama sa barangay Busay ug Lahug nga  akong nalabyan human sa akong  pagpaniudto  sa GMA-7 complex, na-busy ang mga opisyal ug mga driver pagpahimutang og pagpasakay  sa ilang mga konstituwente ilabina sa mga idaran.

In fairness hinuon, igo rang gipakaon og snacks didto sa City Hall ang mga gipang-imbitar og way gitunol nga  kwarta.

Hinuon kining pagpanghakot og mga tawo mao nay naandan diha sa City Hall. Mao bitaw nga dali kaayong naka-isyu si kanhi mayor ug karon Kongresista Tomas Osmeña kay  iya man sab ning binuhatan.

Kinsa man say ganahan nga motabi  diha sa entablado nga way mopakpak  ug way maminaw?

* * *

Ambisyoso ra  kaayo Mayor Rama sa  iyang katuyuan nga magbutang og mga cable cars aron pagdugtong sa mga bukirang barangays dinhi sa dakbayan sa Sugbo.

Practically ganahan ko sa idea ilabina kun ang maong mga cable cars mapahimuslan gyud sa mga mag-uuma ug sa mga  kabus nga taga-bukid.

Unsa man ang matag sakay  niini? Libre ba? Kun di man ilibre, barato ra ang plite ug makaya ra ba sa bulsa sa mga  kabus?

Alang nako mas importante pa nga  magbutang og satellite offices ang City Hall  didto sa mga bukirang barangay aron  makahatag og insaktong serbisyo.

In fairness ni Mayor Rama daghan siyag mga  nahimo ug daghan siyang nasugdan nga mga importanteng proyekto.

* * *

Naglibog bitaw ko kun nganong nakapasar sa konseho ning dakbayan ang ordinansahon ni Councilor Lea Japson nga Anti-Corporal Punishment nga magsilot na sa mga ginikanan ug mga magtutudlo nga igo  rang mopasakit og ginagmay sa mga bata agig  pagdisiplina.

Alang gani nako nga duplication na  kini sa mga existing special laws nga child abuse ubos sa Republic Act 7610 ug sa VAWC law kon Violation Against Women  and  Their Children.

Lahi gyud kining pagdisiplina sa bata ug pagdagmal.

Sama sa akong giingon kaniadto nga kun wa pa ko makatilaw og bakus sa akong mga  ginikanan usa na siguro ko sa mga badlungon sa katilingban.

Maglaum ko nga babagan kini ni Mayor  Rama pinaagi sa iyang veto power human sa  makuting pagtuon nila ni Councilors Edgardo Labella ug Joey Daluz.

* * *

With all due respect, kutob ra gyud sa paukyab si Capitol consultant on peace and order Cesar Veloso kinsa nagkanayon nga  daku ang posibilidad nga dunay kawani sa Kapitolyo nga namaligya og shabu sa sulod sa building.

Kining  ingon ani nga linya sa istorya  mahug nga way klaro. Nagpakita lang gyud kun unsa kataphaw sa trabaho. Nindot unta kun nakadakop sila si Veloso ug iyang mga sakop  nga duna gyuy transaksyon sa sulod.

Kun wa maeskandalo sila si Cirilo Abrenica Jr. ug Cyril Solita way buhi-ang istorya si Veloso. Duda lang ko nga  napasubo si Veloso sa iyang taphaw nga pamahayag.