May kasaypanan gyud si Padre Jonathan Lao

Bisan sa kalayo sa lungsod sa Compostela among  gisakripisyo ang among mga kaugalingon aron adto gyud makapahigayon sa among programang “Dialogue On The Air” pagsubay  niining  mga reklamo sa mga parokyano  kang Padre Jonathan Lao parish priest sa Saint James The Apostle Church.

Wa gyuy church official nga mitunga kay mibalibad sila si Cebu Archbishop Jose Palma,  District Bishop Emilio Bataclan ug  mismo si Padre Lao.

Bugtong mitunga og misanong sa among invitation mao si Brother Socrates Fernandez kinsa maoy mayor sa dakbayan sa Talisay ug ingon man ang  mga nangreklamong mga parokyano.

Apan sa wa pa kami magsugod sa among programa didto sa barangay hall sa Poblacion Compostela  agig  pagbaton og pamatasan akong giadto  personal si Padre Lao aron gyud makatambong.

Apan miingon ang duha niya ka mga sinaligan nga pulos mga babaye nga  di gyud padisturbo ang pari kay  natulog.

Wa na lang sab ko mamugos kay gimanduan na si Padre Lao sa iyang  labaw nga magpakahilom.

Atol sa among programa mitumaw ang mga bug-at nga mga alegasyon  sama sa pagbalibad sa pari niadtong nagpabendeta og imahen ni Señor Santo Niño.

Nagsangyaw usab ang pari nga  di motuo sa mga imahen. Niadtong Enero 15 nga atol sa Sinulog Grand Parade nadunggan usab siya sa mga parokyano  nga mihangan og mga “buang” sa mga nanayaw sa Sinulog dinhi sa dakbayan sa Sugbo.

Laing reklamo mao nga gipaundang ang devotion sa Holy Face, Alliance of Two Hearts, God the Father ug Birhen sa Regla. Gipaundang usab  ang mga naandan nga pag-procession sa Holy Face, Aurora ug ang Santos nga Rosaryo.

Si Brother Soc miingon nga bisan diskresyon sa mga pari kining  mga butanga apan makapahiubos gyud kaayo sa mga parokyano kay ang gihimo sa pari “dili angay ug dili tukma.”

Daku gyud kining hagit  ni Archbishop Palma kun unsaon niya kini pagsulbad kay nasukwahi na ang pari sa doktrina sa Simbahang Romano Katoliko.

* * *

Self-defense ang depensa ni SPO2 Cresente Español Dacillo sa iyang pagpusil patay sa iyang silingan nga  si Primo Gallego Jr. sa sitio Laguna barangay Bulacao ning dakbayan.

Sa akong interview sa pulis, iyang giangkon nga napugos siya pagpusil sa biktima niadtong Marso 19 paingon nga magkilom-kilom tungod kay medyo dunay dautang plano sama sa pagpatay kaniya ang biktima nga nagsigeg  panglili sa ilang tindahan-panimalay.

Matud sa pulis nga samtang gikan siya  nangompra nga nagbitbit  sa mga  kinompra, iyang gipangutana kun unsay tuyo. Apan kalit nga nibunot sa dalang armas ug didto iyang gitukmod ug wa siya maglangay sa pagpusil agig pagdepensa sa kaugalingon.

Miingon ang pulis nga di gyud tuyo niya ang pagpatay sa biktima kay gani didto niya gipunting sa paa ug wa  niya ig-a sa ulo ug dughan.

Midugang ang pulis  nga kun duna pa siyay tuyo nga mopatay og tawo  di niya himoon sa  nataran  sa iyang panimay.

Gawas niini miingon ang pulis nga di sab siya hanggaw nga klaseng  pagka-amahan nga mohimog krimen og eskandalo sa pamilya niadtong higayuna ngan nga niadtong adlawa maoy pag-abot sa iyang anak nga gikan abroad.

Apan ang kabanay sa biktima  ilabina ang inahan  nga si Angelina Gallego ug ingon ang lalaking igsoon  sa biktima di gyud motuo sa version sa pulis kay duna silay mga testigo  nga way dalang armas ang biktima.

Miingon ang inahan nga nagselos  lang ang pulis sa iyang anak kay may insaktong barug nga nagtan-aw sa asawa sa pulis nga giingong nagsul-ob og pakigol.

Nahibaw-an sa inahan nga tigpalitan gyud ang iyanganak sa tindahan sa pulis og sud-an ug mga mainom kay medyo barato ang  presyo.

Ug nahibaw-an sa pamilya sa biktima nga sukad nagselos ang pulis tabis na kaayo ug tinan-awan sa  biktima ug gani nabantayan ang pulis nga kun moagi sa gipuy-an sa biktima sa wa pa ang krimen magsige na og  paniid sa mga kalihukan sa biktima.

Usa sa mga testigo sa krimen nga si Melvin Ebrado miklaro nga wa gyuy armas ang biktima. Iyang nasaksihan nga samtang namalit siya ug patuktok sa manok sa tindahan sa pulis iyang nasaksihan nga gitawag og gipabalik ang biktima sa pulis ug dayon gipusil sa pulis.

Nadunggan pa ni Melvin ang pulis nga nagkanayon nga “Tabang mo    diha ron, kay apil ta mo og dug.” Gawas niini ang asawa sa pulis nadunggan usab nga miingon nga  “Ngano imo man nang gipusil nga wa man nay sa”.

Dihang akong gibalikan ang  pulis ug interview sa version sa mga kabanay ilabina sa anggulo nga selos ug  isyu sa “love triangle,” iyang gipasabot nga di gyud tinuod kining tanan kay wa siya  makaila sa biktima.

Gawas pa iyang gipasabot nga kun may intensyon nga manguyab ang  biktima ngadto sa iyang asawa nagpakita lang nga way respeto kaniya ang biktima isip usa siya ka tinugyanan sa balaod.

With all due respect kang Cebu Asst. City Prosecutor Mario Ley Guidayawan wa sa iyang gahum nga motuo sa habig ni SPO2 Dacillo nga homicide  lang ang ipasaka kay basi sa sirkumstansiya angay ra gyung determinahon sa korte ang tanan. Gawas pa dunay mga testigo nga nagpalig-on sa kasong murder.

In fairness sa pulis ug sa kabanay sa  biktima korte na lang ang maghukom kun unsay tukmang silot.

Apan daku ang akong pagtuo nga selos ra gyud ang hinungdan ning tanan. Pwerteng paita gyud kay makapaalaut kining gugma sa selos.

Leksyon sab ni sa mga asawa nga di gyud maayong magsul-ob og makapahagit kay bisan daan na sila sa mata sa ilang mga bana apan bag-o pa sa uban.