100

Walay David nga nibabag kon nitirador kang Goliath niadtong Marso 2, 1962. Ug mao tingali nga naka-score ang Goliath sa Philadelphia Warriors niadto og 100 points kay wala may taga-New York Knicks nga nakasanta kaniya.

Ang Goliath, of course, mao si Wilt Chamberlain. Dili siya gusto sa mga angga nga daw mo-sungog sa iyang gidak-on sama sa “The Stilt” ug “Goliath.” Apan matud pas mga sports writers, duna siyay Goliath complex, usa ka pangaduy nga ma “larger than life” sama sa usa ka legend o superhero. Daghan siyang mga sugilanon kabahin sa iyang kinabuhi nga lisud tuho-an.

Usa sa iyang mga “katuohan-dili” nga sugilanon mao nga giambakan siyag mountain lion dihang misuroy siyag bukid. Dihang gipangutana siya kun unsay iyang gibuhat, miingon kini nga iyang gipatay ang lion. Bisan tuod ug 7’1” ang gitas-on ni Chamberlain, wala motuo ang iyang mga teammates sa iyang giistorya. Para pagpatuo kanila, iyang gihubo ang iyang t-shirt ug iyang gipakita ang higanteng kinawrasann sa iyang bukton ug luyo.

Ang lain niyang gipanghambog mao ang iyang pakigbangga sa inom sa pangulo sa Russia. Matud pa niya, dihang miduwa sa Russia ang iyang unang team, ang Harlem Globe Trotters, giimbitar silag kumbira sa gobyerno ning maon nasud. Paghuman nilag pangaon miingon ang presidente sa Russia nga si Nikita Khrushchev nga kinahanglang way moundang og inom hangtud nga usa na lang ka tawo ang wa moligid sa kahubog ug nagpabilin nga galingkod. Ug matud pa ni Chamberlain, buntag na dihang nahuman ang inom ug siya na lang ug si Nikita Khrushchev ang nahabiling galingkod lang gihapon kay ang iyang mga teammates ug ang mga sakop sa gobyerno sa Russia puros na man nangligid sa sawog.

Usa sa nakapa-Goliath ni Chamberlain mao ang iyang mga record nga nahimo. Gawas sa iyang 100 points nga nahimo didto sa Hershey, Philadelphia, nakatener usab siya og record sa blocks (opaw, palak) batok sa Boston Celtics. Gipalakan niya ang mga Celics niadton higayuna og 26 ka higayon. Ug sa iyang duwa batok kang Bill Russell nanglangkat si Chamberlain og 55 ka rebounds.

Naka-establish og kapin sa 90 ka records si Chamberain nga hangtud karon wa pa mabuak. Usa niini mao ang paghatag niya sa iyang team og 33 straight wins. Nahimo kini niya uban sa iyang katapusan nga team sa NBA nga mao ang Los Angeles Lakers.

Ang laing panghambug ni Chamberlain nga niabot og 20,000 ka babaye ang iyang nadulog (o nahilawasan). Dihang wa motuo ang iyang kanhi uyab sa iyang gihisgutang gidaghanon, mi-compromise kini og miingong gipun-an ra niya kinig zero. Niani mituo na ang iyang kanhi girlfiend. Katuhoan kuno ang 2,000 apan dili ang 20,000.