The Dallas win and other stories

Nyor Gamay (NG): Nakadungog kas latest LeBron joke, Nyor?
Nyor Daku (ND): Be, unsa man?
NG: Gikan nis iyang mga biniyaan sa Cleveland—“I asked LeBron for a dollar, he gave me 75 cents back. He doesn’t have a fourth quarter.”
ND: Bitaw, Nyor, no, mao nay problema ni LeBron James—kuwang sa lahutay. Mahutdag paugat inig fourth quarter. Bisan tingalis iyang pagka dakug lawas ug pagkataas og layat ug pagka hingigo, nerbyosong pagkatawo ning player sa Miami Heat. Unya unsa naman lang intawoy tubag ni Dodong LeBron.
NG: Iyang gipanghimaraut kining mga nagpunay og panaway niya. Nagkanayon siya sa interview nga—“At the end of the day, all the people that was rooting on me to fail—at the end of the day they have to wake up tomorrow and have the same life that they had before they woke up today. They have the same personal problems they had today.” Sa ato pa, Nyor, wa mo madatu sa akong kapildihan.
ND: Hahaha. Mao. Daw miingon si LeBron nga—Kun bati mog nawong sa pa ko mapildi, karong napildi nako, bati gihapon mog nawong.
NG: Unya mipadayon pa si LeBron pagingon nga—“They can get a few days or a few months or whatever the case may be on being happy about not only myself, but the Miami Heat not accomplishing their goal, but they have to get back to the real world at some point.”
ND: Mura siyag niingog—Inyo sa ron, ugma inyo lang gihapon.
NG: Matud pa ni Dan Wetzel sa Yahoo Sports, Nyor, “LeBron James had the right to leave. And Cleveland has the right to laugh.”
ND: Tragicomic bitaw ning nahitabo ni LeBron James. Tragic, kay gihinganlan siyag King James apan kanunay nga gihikaw kaniya ang korona. Comic, kay lami man gyung iagik-ik kun dunay seguristang mabulabog.
NG: Kun ikay Miami, Nyor, unsa may imong buhaton?
ND: I-barter nakos LeBron ni Chester Cokaliong. Kay nakabantay ka kuwang og tres ang Miami sa end game.
NG: Nayabag naman intawon ka, Nyor, uy. Unya nganong midagan man sab tos Nowitzki sa dugout bisag wa pa motingog ang buz    zer?
ND: Kaiihion kaayo to, Nyor. Excited kay ma-champion na gyud iyang team. Unya makuha na gyud niya ang Bill Russell Trophy.
NG: Di kaha to siya kahilakon?
ND: Nganong kahilakon man siya, Nyor?
NG: Kay ang tanan niyang abot paingon man sa ngipon.
ND: Ha?
NG: Ang iya gong kapuyo gidakop man kay wa mobayad sa iyang dentista. Unya dihang nabilanggo na kini diha ba nahibaw-i ni Nowitzki nga mabdos na diay kini. Mao nga gipangayo sa palyer sa Dallas Mavericks ang custody sa bata nga naa pa sa sulod sa tiyan sa iyang gikapuyo nga napriso.
ND: Kuyaw diay kaayo nig mga sugilanon ang panagsangka sa Mavs ug Heat. Korona para ni LeBron batok sa bayad sa ngipon para kang Nowitzki.