Mityabaw na ang mga nagpuyo sa atong bag-ong labayanan

Nangreklamo na karon ang mga nagpuyo diha sa barangay Cabangahan, Consolacion duol sa atong labayanan sa mga basura.

Ang mga residente nanawag kanako nga ang atong mga basura gikan dinhi sa dakbayan sa Sugbo maoy nakapa-miserable karon sa ilang inadlaw-adlaw nga pagpuyo.

Sukad nga gisugdan ang paglabay sa mga basura niadtong buwan sa Nobyembre, dili na sila makatug og tarong tungod sa kasaba kay 24-oras ang operation.

Gawas niini, nanimaho na ang ilang lugar ug nangaguba na ang ilang mga parte sa kalsada.

Ilang gireklamo sa ilang kapitan nga si Edwin Miñoza apan matud pa wa gyuy nahimo sa ilang problema kay itoy-itoy ra sa ilang mayor.

Alang nako, natural lang nga mangreklamo ang mga apektadong residente kay di lalim ang paghingos sa baho nga basura.

Maglaum lang ko nga pangitaan og paagi sa mga ahensya sa gobyerno aron dili kaayo mabalda ang mga nagpuyo.

* * *

Leksyon na kini sa atong mga kawani ug mga opisyales sa gobyerno nga mag-inom sulod sa opisina og oras tingtrabaho ang pagkasuspenso ni Metropolitan Trial Court in Cities Clerk of Court Reynaldo Teves.

Hinuon, mas maayo na lang kining suspension ni Teves kay dili kabahin sa pagpangurakot sa gobyerno.

In fairness ni Teves, nataymingan lang gyud nga nakontra niya iyang huwes nga si MTCC Judge Rosabella Tormis. Pero kun nahitabo pa siguro nga parehas silang lalaki ug ka-drinking buddies, way suspension nga mahitabo sa clerk of court.

Suwayan ni Teves nga moduso og motion for reconsideration aron kun makatsamba, pwede siyang sweldohan sa unom ka buwan aron may mapaabot ang iyang pamilya.

* * *

Kumusta man tuod kining kontrobersiya karon sa duha ka mga campuses sa Mandaue City College diha sa dakbayan sa Mandaue?

Maglaum ko nga nahilot na sila.

Nakadawat mi og fax message nga kopya sa resolution ni Civil Service Commission Director Judith Chicano kabahin sa kontrobersyal nga appointment ni Dr. Susana Cabahug sa duha ka mga katungdanan.

Ang Civil Service mipasabot nga “inorder” o balido ang appointment ni Dr. Cabahug isip Security Officer II sa City Government of Mandaue.

Apan gideklarar nga inbalido ang iyang appointment pagka-OIC College Administrator sa Mandaue City College ug gimanduan na siya nga mohunong pag-discharge sa maong katungdanan.

Mangambot lang ko kun tumanon ba ni Mandaue City Mayor Jonas Cortes kining resolution sa Civil Service ngan nga iyang tinudlo si Dr. Cabahug.

* * *

Naluoy kaayo ko sa usa sa akong tigpaminaw sa akong programa sa dySS Super Radyo nga taga barangay Katipunan, Silago, Southern Leyte nga si Norma Manto Jualo kay migasto og kuwarta, panahon ug kahago nga mibisita kanako sa among sibyaanan niadtong Miyerkules sa buntag.

Gidad-an ko niya og humay nga pilit pang-biko ug manok nga dumalaga.

Nahimangod lang ko sa iyang tuyo kay numero sa masyaw o ba kaha numero sa lotto iyang pangayoon sa ako-a aron intawon makabayad sa obligasyon og ipalit og abuno sa ilang mga uma nga humay.

Matud niya nga dunay mga numero nga akong mahisgutan sa akong programa og moigo gyud sa matang nga sugal.

Mao nga nangindahay intawon siya nga makahatag ko og numero aron iyang tay-an.

Dihang akong giprangkahan nga dili gyud intawon ko makahatag og numero sa masyaw, nagpatulo intawon sa iyang mga luha. Ako siyang gipasabot nga kun tinuod pa nga mahibawo mi sa mga numero nga manggawas, siguradong mahaw-as na sab mi sa kalisud sa panginabuhi.

Mao nga samtang ako siyang gipakaon ug gitunulan og pamlite, ako siyang gipasabot nga obligasyon sa gobyerno ang pagtabang sa mga mag-uuma pinaagi sa Department of Agriculture.

Sa among kukabildo ni nang Norma, nahinumdum lang ko sa isyu niadtong Undersecretary Joc-joc Bolante sa fertilizer fund scam diin gisakiyo ang minilyong salapi sa Arroyo administration ang pang-abuno sa pananom sa mga mag-uuma.

Asa ka manangkong niadtong maong anomaliya nga hasta ang Makati City nga way umahan naapil sa listahan nga naka-avail og abuno.

Maglaum lang ko niining pamunuan karon ni P-Noy uban sa mga municipal agriculturists nga mohatag og tinuod nga tabang ngadto sa mga mag-uuma.