Kasub-anan ang Pasko sa uban

Samtang naghinam-hinam nga nagpaabot sa extra bonus kadtong dunay mga trabaho apan sagad sa atong mga kaigsoonan karon ilabina ang way trabaho ug gikan sa pamilyang pobre gyud kaayo ang nangindahay intawon nga duna silay makaon sa Pasko.

Pagkadaghang pamilya karon ang nagpanghamoy sa tudlo ug  nag-ilaid  sa  tumang kalisod. Malipay na kun dunay nilugaw  ug asin nga saw-an sa pamilya matag kaon.

Wa sab ta maignorante sa kamatuoran nga daghan karon ang nagpanglimos sa kadalanan aron lang masudlan ang nagkutoy nga tiyan.

Bisan sa atong mga silingan  ug sa atong palibot anaa ang ingon ani nga sitwasyon nga makaluluoy gyud kaayo nga naglaum  nga makakaon sila og kan-on nga gahi  inig  ka Pasko.

Mao nga maka-ingon ko sa akong kaugalingon nga pagkabulahan sa mga pamilyang naglisod kay gamay ra kaayo ang pangandoy sa Pasko nga makapalipay  kanila sukwahi sa mga tawo nga manghinobra ang pagka-materialistic.

Wa nay lami ang Pasko sa uban kun way mga bag-ong butang nga mapalit ug way mga lamiang pagkaon nga giandam sa lamesa nga pang-Noche Buena hangtud makalimtan ang pagkamanggihatagon.

Wa lang gyud huna-hunaa  sa uban kun unsa kanindot nga pinaskohan  nga gihatagan kita og maayong panglawas ug himsog nga relasyon sa mga kuyog sa banay ug sa maayong pakigrelasyon sa ubang sakop sa katilingban.

* * *

Unsay kaugmaon sa lima ka mga anak sa mag-live-in didto sa Badian human  aksidenteng  napatay sa asawa  ang bana niadtong Domingo?

Makaluluoy kaayo ang mga bata  kay sayo kaayong  nailo sa mga ginikanan. Ang kinamaguwangan  nag-edad  og 9 anyos samtang tuig pa ang kinamanghuran.

Alang lagi  nako, mas maayong hiloton kining  maong kaso sa kapulisan ug sa kabanay sa biktima tungod na lang sa mga bata.

In fairness sa asawa,  napatay  niya ang iyang bana tungod kay igo ra siyang  midepensa  sa pagkamadagmalon panahon nga makainom.

Ambot lang kun maatiman ba, kun prisohon ang inahan unya adto itugyan ang lima ka mga bata sa mga apuhan ug sa mga igsoon?

Og adto sab sila ihatag sa Department of Social Welfare and Development kon DSWD,  lahi  ra ba gyud ang bata nga  magdaku sa laing tawo nga layo sa ilang ginikanan.

* * *

Lanog kaayo ang pagsupak ug pagbabag karon sa mga mayor sa lain-laing mga local government units ang pag-iban sa ilang dawaton nga Internal Revenue Allotment kon IRA sunod tuig.

Unsaon  na lang  kun madayon ang pag-minus og  4.8 percent nga share sa IRA nga kini maoy gisaligan  matag tuig nga budget sa kalungsuran.

Tiaw muna mitug-an karon si Bacoor, Cavite Mayor  Strike Revilla kinsa maoy presidente  sa pundok sa mga mayor nga 60 porsiento ngadto sa 70 porsiento sa  IRA ang gikuhaan og tinubdan sa ilang annual  budget.

Sigurado ko nga apektado kaayo ang mga LGUs sa mga ipatuman nga mga  proyekto ug paghatag sa mga basic services  ngadto sa katawhan  kun idayon ang pagkaltas  sa IRA share.

* * *

Kun wa lang seguro masudli og corruption ang Korte Suprema sa panahon ni kanhi presidente Gloria Macapagal-Arroyo, dili unta ingon ini kainit  si Presidente Benigno Aquino III sa labawng  hukmanan.

Mismo si Chief  Justice  Reynato Corona  nasayod siya kun unsa ka kwestyonable nga gidali-dali  siya pagtudlo sa maong katungdanan.

Tinuod nga insulto kaayo  nga giharap-harapan sa Presidente si Corona apan makiangayon lang ug aron ipakita sa nasud nga seryoso si P-Noy paggukod sa mga kurakot ug sa mga kaalyado nga nakapwesto.

Kun tarong pa ang Korte Suprema ug wa pa  sila magpagamit sa mga Arroyo,  nganong gibabagan man ang pag-umol sa “Truth Commission”?

Makiangayon lang nga tugbangan og grabeng pang-insulto si Corona kay  wa  siyay respeto  sa  katawhan  nga nagtinguha nga matugkad  ang mga anomalosong transaksyon sa mga Arroyo.