Mosikat si Gwen kun ipadakop si Ecleo

Makatarunganon kining hangyo ni manlalaban Kit Enriquez sa  prosecution panel ngadtong Cebu Gov. Gwendolyn Garcia nga mo-offer og cash reward niadtong may kasayuran kun asa nagtago-tago si Philippine Benevolent Missionaries Association Supreme Master Ruben Ecleo Jr. aron sayon rang dakpon.

Di ko kasabot sa esplikasyon ni Governor Gwen nga way jurisdiction ang provincial government  nga mohimo niini tungod kay dinhi sa dakbayan sa Sugbo nahitabo sa krimen.

Klarohon ko kini nga dili korte ang opisina sa gobernador nga magtuki og primary jurisdiction sa criminal case.

Ang importante dinhi nga makatabang unta ang Kapitolyo batok niining daku-daku sa PBMA nga nagyama-yama sa atong hustisya.

Angayng masayod si Governor Gwen nga bisag dinhi sa dakbayan sa Sugbo gisugdan ang krimen, apan didto gitiwas sa Coro, Dalaguete nga sakop na sa kagamhanang probinsyal.

Gawas pa ang mga Bacolod nga uhaw sa hustisya lumad intawon nga taga-Bantayan nga sakop gihapon sa  probinsya.

Di man sab seguro katarungan nga dili na lang siya motabang pagpadakop ni Ecleo bisag nahitabo niadtong dili pa siya maoy gobernador.

Pero sa akong basa ang klaro niining tanan mao nga di makaako si Governor Gwen nga motabang sa pagpadakop ni Ruben Ecleo Jr. kay ang mga Ecleo apil niyang pangulitawhan aron makatabang sa iyang kandidatura sa pagkasenador  sa tuig 2013.

Momando pa si Governor Gwen og manhunt operation batok ni Ecleo ug motanyag og reward, daghan pang mosaludo kaniya ug mopaluyo sa iyang ambisyon sa politika.

* * *

With all due respect, wa sab ko mahimuot sa gimando ni Cebu City  Mayor Michael Rama ngadto sa iyang mga department heads pagpa-walkout  atol sa budget hearing sa konseho niadtong Biyernes.

Ang pag-walk-out  sa mga importanteng diskusyon pagtimaan kini nga wa kitay pamatasan.

In fairness sa Konseho nga gipanguluhan ni Vice Mayor Joy Augustus Young may punto sila nga wa i-rekognisar si Assistant City Treasurer Emma Villarete kay dili kini signatory sa proposed P11.8-billion annual budget for 2012.

Unsa may gamit sa laing duha ka sakop Local Budget Committee nilang Budget Officer Nelfa Briones ug Planning and Development Officer Alipio Bacalso?  Way alamag? O wa sab siyay salig sa duha?

Nagpasabot na ba hinuon nga di sab andam ang team ni Mayor Rama pagdepensa sa ilang proposed budget?

Katungod unta sa executive department pagpasabot sa budget ngadto sa mga sakop sa Konseho.

Unsaon man pagkonbinse sa Konseho sa gipaabot nga budget kun taposon sa walkout? Ayaw mo pagbinata diha oy!  Kinsa man gud ninyo ang wa  mamulitika?

* * *

Dakpon na gyud kadtong molimos ug kadtong manglimos diha sa atong kadalanan bisan nagkaduol na ang Pasko.

Si Isabelita Ganub, hepe sa Cebu City Anti-Mendicancy miingon atol sa among programa’ng “Dialogue on the Air” niadtong Sabado sa hapon nga dakpon sab kadtong mga manaygon diha sa mga  pampublikong sakyanan.

Apilon sab og dakop kadtong mga sakop sa lain-laing relihiyon nga magpasuroy og sibot diha sa kadalanan ug hingusgan ang pagdakop sa mga dispatchers suma pa ni Senior Insp. Elmer Dacalos sa Traffic Patrol Group.

Niadtong Sabado akong nahibaw-an gikan sa Task Force nga dunay 50 kapin ka mga Badjao ang ilang gidakop (rescue) tungod kay nanaygon sa mga jeep.

Pero balik gihapon sa kadalanan kay lami gyud nila ang pagpanglimos.

Bisan sila si  Dr. Rene Obra  head sa Center for Behavioral Sciences sa Vicente Sotto ug ingon man si Annabeth Cuizon sa Cebu City Task Force on Street Children mipadayag nga bisag ihatod na didto sa Zamboanga ang mga Badjao, mobalik  gyud dinhi sa Sugbo kay alang nila kitang mga Sugbuanon manggihatagon.

Matud pa usab ni Redentor Betito kinsa maoy nagdala diha sa Pari-an Drop In Center  mitug-an nga dunay mga bata nga molayas sa ilang sentro tungod kay mas ganahan gyud nga manglimos.

Si Director Ahmed Cuizon sa Land Transportation Franchising and Regulatory Board seryoso sab sa kampanya batok niining mga bayong-bayong nga mga lalaki nga mo-rap sulod sa sakyanan nga delikado sab sa mga pasahero.

Gani moisyu siya ug direktiba ngadto sa mga operators ug mga drivers nga di gyud pasakyon ug pasak-on sa mga bus kining mga rappers nga ang tumong panaygon ra gihapon.