Buhok, mga sugilanon ug binutbot
Ikaw si Gerard, no? Nangutana ang ang usa ka babaye nga akong kasugat nga wa na usab ako makaila. Sa dihang mitando ko, miingon siya og, “Wa na man kay buhok.” Nagngisihay kami ug nanamilit sa usag usa. Wa ko makapangutana sa iyang ngan ug nanghinaut lang ko nga di mi magkasugat og usab. Maayo na lang kay wa siya makabantay nga daghan na usab og kuwang ang akong ngipon.
* * *
Ang parte sa lawas sa tao nga tubuan og buhok mao ang ulo, ilok, ang palibot sa baba ug ang palibot sa kinatawo. Mas minus of buhok ang babae sa parte dapit sa baba. May nag-ingon nga ang parte diin daghan ang buhok maoy parte nga dali tugnawon ug maong mitubo ang buhok dinhi para muhapin batok sa tugnaw. Ug may artikulo ako nga nabasahan nga miawhag sa mga nanimuyo sa parte sa America nga ma-igo sa heat wave, nga kon bation na nila ang grabing ka init, sa pagbasa sa ilang mga parte sa lawas diin dunay buhok—armpits, pubic area ug sa ulo (kana kon duna pa silay buhok dihang dapita).
* * *
May usa ka bugaw nga miingon kanako nga ang babaye kuno nga way buhok sa kinatawo init ug bigaon. May kaila usab ako na babae nga miingong di gyud siya mamarbas sa buhok sa iyang pribadong bahin kay bigaon ray mohimo niini. Gani may nadungan akong istorya nga may parte sa China nga dili ganahan nga mamarbas sa ilang ilok ang ilang kababaenhan. Tungod kini kay ang mga babae lang nga mosalida ug magpaibog (showgirls, entertainers ug burikat) maoy mo-shave ug magpabuti sa ilang ilok. Ang babae nga conservative, alang kanila, dili magpaibog, dili magsayasayag pakita sa iyang binarbasang ilok.
So makita nato nga dunay cultural aspect ang buhok.
* * *
Gipangutana ko ang akong guru nga si Sawi Fox kon unsay iyang mas ganahan ang babae nga taas og buhok o ang mubog buhok. Miingon man hinuon ang hanggaw og, “I don’t know. I can’t make up my mind. But I’m sure it has something to do with sex.”
* * *
Maingon ta nga si Bella Ruby Santos mao ang archetype sa mga tabunon nga tag-as og buhok nga maoy gipangita sa mga puti nga moanhi sa Pilipinas para mangitag paris. Gani mahiubos kuno kining mga puti nga bana kon magpaputol og buhok ang ilang mga Pinay nga asawa. Tingali may symbolic value ang taas nga buhok. Tingali romantic ug wild ang taas nga buhok samang domesticated na ang pinutlan.
Gani daw iskandalu man niadto kon magpa boy cut og topi ang babaye. Ug karon duna pay gamay nga kurat kon magpa-opaw ang babaye. May nag-ingon nga mahibawo-an mo lang nga gwapa gyud ang babae kon opaw kini kay di ka naman mailad a iyang buhok.
