Euphemism

Matud pas usa ka online dictionary, ang kahulogan sa euphemism mao ang—“the substitution of a mild, indirect, or vague expression for one thought to be offensive, harsh, or blunt.”

Ug mipadayon ang maong source—“the expression so substituted: ‘To pass away’ is a euphemism for ‘to die.’”
Ug dinhi misulod sa akong hunahuna ang mga pasumbingay nga “manukon” kun guapa, libat kon apiki og hitsura. O kon sikat, surprise guest, gate crusher kon wa-il.

Nisulod man gud ang pulong nga “euphemism” sa akong bagul-bagol samtang gatan-aw ko sa RH bill debate sa News TV kagabii. Diha man guy nangutana kang Pia Magalona (ang pro-RH nga byuda ni Francis M nga karon spokesperson na sa awareness sa cervical cancer) kon giunsa niya pag-sex educate ang iyang mga anak. Wala modiritsog tubag si Magalona ug miingon lang siya nga open siya sa iyang mga anak sa tanang topic.

Niining tungora, ma-paraphrase ko ang Americano nga manunulat nga si Donald Barthelme. Duna siyay gisulat nga ingon niini—What do you do when your little daughter sees your penis? Just pretend that it’s nothing but a dumb big toe.

Here evasiveness seems to be the order of the day. Kay ang-ang man sab og moingon ang character—look here daughter, this is the penis, this took part in making you. Kuyaw og motubag ang bata og—Oh, really daddy! Can I see you use that in making another one like me?

Niining mga mubo nga linya ni Barthelme na dramatize niya ang tension sa mga ginikanan pagtudlo kabahin sa reproductive system.

Usa ka minor obstacle mao ang paghimo og taboo (o pagdili sa paggamit) sa pulong alang sa mga kinatawo. Sama pananglit sa napatik sa usa ka tabloid sa ato nga may headline nga —Rihanna ganahag dakug bunal. Wala mauyon ang akong higala nga si Orly Cajegas niini. Basin unya kunog mangutana ang iyang pagumankong bata kon nganong magpabunal man si Rihanna? Basig maghuna-huna ang bata—unsa may nahimo niini nga bunalan man? Wa manglampaso? Wa mouli sa sukli sa suka?

Kun balikan ta ang maong debate sa TV, daw gatakilid ang anti-RH Bill. Dili tungod kay wa silay punto o argumento apan tungod kay duha sa ilang mga speaker—ang usa ka obispo ug usa ka maestra sa UP mga nervous wreck. Ang obispo di mahimutang sa iyang lugar magsigeg atras abante ug masigeg ngisi-ngisi sa iyang hilaw nga ngisi ug nga imbis mangutana mosermon hinuon—out of order. Ug kadtong maestra sa UP nga magsigeg Tinagalog kanunay nga gapirok-pirok ang mata ug kanunay nga mabagtingan kay magtuyoktuyok man ang iyang tubag. Daw gilupig ang maestra ni Pia sa pag communicate sa ilang mga mensahe.

Tingali sayon na lang ni Pia pagpakighisgot sa sex sa iyang mga anak nga artista sama kanila ni Maxine ug Elmo. Pero unsa kahay iyang pamaagi sa mas gagmay niya nga bata. Tingali iyang lang huwaton kini nga mangutana ug nga iya kining tubagon sa way tabon-tabon. Dili na tingali siya mogamit og euphemism para di na sila maghuna-huna kun nganong bunalan si Rihanna.