Daghan pang gipanglaay ron nga manarbaho
Bisag balik trabaho kita karong adlawa Nobyembre 2 apan daghan ang mangabsent ron ilabina sa mga kawani sa gobyerno.
Bintaha man ang taga gobyerno kay dunay daghang leave credits. Apan kadtong mga kawani sa pribadong kompaniya ilabina sa mga casual ug contractual mapugos gyud og trabaho aron di mayabo ang bugasan.
Ang naka-bintaha niining bakasyuna mao ra gyud kadtong mga tinun-an sa kolehiyo ug sa elementary ug high school sa mga pribadong tunghaan kay taas ang semestral break.
Ugma Nobyembre 3 balik sa klase ang atong mga tinun-an sa mga pampublikong tunghaan.
* * *
Overacting ra sab ning atong bag-ong director sa Police Regional Office in Central Visayas nga si Chief Supt. Marcelo Garbo kay sa report kagahapon sa iyang pag pang-inspection dunay lima ka mga bag-ong pulis nga iyang pa-relibohan ug paesplikahon.
Ang rason kay wa makasul-ob og proper uniform. Nag-rango og PO1 ug PO2 ang lima ka mga pulis nga iyang pasilotan.
Alang nako dili na importante ang proper uniform. Ang importante nga nag-duty, dili lango sa inom ug dili sabog. Mag-unsa nang uniporme, mao nay mogukod sa mga sagbot sa katilingban?
Mas bintaha man gani nga dunay mga pulis nga makasul-ob og sibilyan aron di sab dayon makabantay kining mga badlungon nga mosakay sa panahon ilabina sa mga lugar nga daghang mga tawo.
* * *
Bisan si kinsang Sugbuanon mosuporta gyud sa ipatuman nga master plan for “Mega Cebu.”
Apan mas nindot gyud nga ang tibuok mainland Cebu ang planohon ug palamboon sama sa pagpalapad sa mga kalsada aron pagsulbad sa traffic, drainage ug ubang infrastructure projects.
Alang gud nako, kun mo-limit lang ta gikan dinhi sa dakbayan ug kutob lang sa Carcar paingon sa South ug gikan dinhi sa Ciudad sa Sugbu paingon sa Danao sa norte morag wa sab nato tan-awa nga ugma damlag nga maproblema na sab kita sa mga lugar nga wa maapil niining kasamtangang master plan kay positibo ko nga paingon kitang molambo sa ngadto-ngadto.
Gikinahanglan gyud ang kompehensibong master plan for “Whole Cebu.”
Nasayod ko nga daku gyud ang kuwarta nga atong gikinahanglan. Apan mas maayo nga tutukan kini karong mga panahuna aron ang kalungsoran makamugna sab og ilang mga maayong plano.
Usa man kaha kita ka Sugbo?
Kun i-limit ra gud ang master plan susama ra kini sa atong nasinateng problema karon sa traffic sa Carcar. Akong buot ipasabot mao nga tinuod lapad ang kalsada gikan sa lungsod sa Minglanilla ug Naga apan pag-abot sa San Fernando, Carcar City, Sibonga hangtud sa ubang kalungsoran, gagmitoy gihapon ang mga kalsada.
Niadto lang Lunes nga midalikyat kog Dalaguete nagabin-an ko sa traffic diha sa Carcar paingon dinhi sa ciudad kay morag one lane ang gikan sa Bolinawan, Carcar unya pag-abot sa Carcar Rotunda dunay mga dagkung mga sakyanan nga nagbagat gikan ug paingon sa lungsod sa Barili.
Sama lagi sa akong giingon, gikinahanglan na gyud ang tibuok plano sa kasulbaran ug tibuk-on ang atong panglantaw sa Sugbo alang sa mga infrastructure projects.
* * *
Nakatawa ko nga naluoy niadtong gradwado sa kursong aircraft mechanic nga naghikog pinaagi sa pag-ambak sa Marcelo Fernan Bridge kay paglagapak sa tubig nagpakitabang kini aron maluwas.
Sa mga pulis ug sa mga istambay, nakit-an nga buko-buko ang nag-una sa biktima nga maoy gituho-an nga wa siya modayon pagpakamatay kay nasakitan na man pag-ayo.
Pero naluoy ko niya kay ang hinungdan sa iyang paghikog mao ang kasuko sa iyang iyaan nga maoy migasto kaniya sa pagpa-eskuwela kay wa siya maka-kita ug trabaho.
In fairness sa iyaan, di sab mabasol nga naghikog to siya. Kun nakaantos ang iyaan sa pagpatungha kaniya way rason nga di kini makapaabot nga makakita og trabaho.
Pagka-mabaw ra gyud ug rason sa iyang paghikog.
* * *
Mga kabanay ni Ma’am Teresita Villarosa Vaño, mga sakop niya sa Lahug Christian School ug sa simbahan nagpasalamat sa tanan nga misimpatiya sa ilang pagbangutan sa kamatayon ni Ma’am Vaño.
Didto gipahimutang ang iyang patayng lawas sa Golden Haven sa barangay Binaliw niadtong Domingo sa hapon.
Puwera buyag daghan ang mihatod atul sa iyang lubong. Daghan ang nagpangga ug naanugnan sa iyang sayo nga kamatayon.
Again akong mga pahasubo sa iyang bugtong anak nga si Ma’am Joy ug sa mga igsoon.
