Indian explosion

Nyor Gamay (NG): Murag nagkadaghan na lagi ang Bombay o Indian sa Pilipinas.

Nyor Daku (ND): Mao ba? Pero mas daghan tingali ang mga Taiwanese kun ibase nimo sa mga namaligya sa mga tindahan sa Colon. Ug lakip na ang sa ubang dakbayan diin ang tinda pina-Unitop ang set-up.

NG: Gamay ra na sila Nyor. Mas daghan ug mas katag ug mas naka-penetrate sa Pinoy society.

ND: Nganong nakaingon man ka ana Nyor? Tungod sa joke ni Ai-ai nga miingon “Ang taong nagigipit sa Bombay kumakapit?”

NG: Di lang kana Nyor. Kon nakabantay ka ang atong duha ka katapusang kandidata sa Miss Universe Bombay ang mga beauty?

ND: Tinuod. Pero mga Katsila og kaliwat nga makakuhag tabunon nga panit mora na man og Indian ang hitsura. Hinuon dili ko molalis nimo nga nagkadaghan na gyud ang mga Indian sa tibuok kalibutan.

NG: Bitaw Nyor. Duna namay Indian, dili American Indian ha o native American, Indian sa India gyud, nga nagobernador sa America.

ND: Ug ang pinakadaku nga Steel producer sa kalibutan gipanagiya man og usa ka Indian family. Kini ang ArcelorMittal.

NG: Mao ba Nyor? Abi nakog call center ra ug 5-6 nga tanto maoy kamahuan nila.

ND: Daghan ni ilang nahibawoan Nyor. Gani may niingon man nga intuitive kini ilang intelligence. Giingon usab nga anytime mo-overtake na sila sa China sa kadagahan sa mga tawo.

NG: Kuyaw gud ana Nyor.

ND: Ug usa ka Indian patriarch, si Ziona sa Indian state nga Mizoram, ang may pinakadaku nga pamilya sa tibuok kalibutan. Wa pa lang kini ma Guinness kay di siya ganahan mopasikat.

NG: Dagku tingali ilang clan didto Nyor.

ND: Unsay clan? Iyang gyong pamilya mismo. Duna siyay 39 ka asawa, 86 ka anak ug 35 ka apo. Duna siyay mansion nga may 22 ka lawak ug 160 sila kabuok nga nanimuyo didto.

NG: Bilangutaman! Sapyot na kaayo ni siya Nyor.

ND: Ambot lang Nyor. Wala may hulagway nga nagtalikud siya. Apan sa pangidaron nga 69 anyos daw baskug pa man kini. Ang iyang unang asawa 70 anyos na karon. Iya kining giminyuan niadtong 17 anyos pa siya. Ug ang iyang pinakabatan-ong asawa may 31 anyos na nga pangidaron. Dormitory type nga may double deck beds ang arrangement sa iyang four-story building nga pinuy-anan. Magpulipulig dulog kaniya ang iyang mga asawa sa master’s bedroom.

NG: Nganong naingon man sila niani Nyor?

ND: Usa kini sila ka Kristiano nga gihimo ni Chana, amahan ni Ziona, dihang gipalagput siya simbahang Katoliko sa ilang lugar.

NG: Christian sect Nyor? Klaro na kaayo kun kinsay gapaluyo nila Nyor.

ND: Kinsa man ug ngano man?

NG: Aw ang mga Kano. Kinsa pa? Para kun manghasi na ang China magamit nila kining populasyon nga Kristyanos nga nagkadaku sa India pagpakiggubat sa mga Insik.

ND: Hindu ug Buddhist baya ang kadaghanan sa India Nyor.

NG: Sa pagkakaron. Pero kun dunay pipila ka mga Ziona nga magpada sa ilang gibati di madugay lunupan ra nag Kristianos ang India. Unya kay mas kahibawo pa gyud sila mo Ininglis kay sa mo Ininsik, modapig na silas Kano.